පාඨක නිර්මාණ

Week of ජනවාරි 13, 2021

අම්බපාලියගේ සිහින
සංජය ප්‍රියදර්ශන ~ කෙහෙල්බද්දර - උඩුගම්පොල


 සඳ කිණිති අරන් නුඹ ඔහොම ආවාම
 මගෙ හිතේ විදුලියක් කොටනවා හැමදාම
 දළදාව වඩාගෙන මන්දිරේ දිළෙන කොට
 හීගොතුව සිපගන්න නුඹ ඇවිත් මං ගාව
 
 ආදරේ කියන්නෙම අඳුරෙ ගුලි වෙන එකද
 තද අව්වෙ වේළිලා මඟ බලන් ඉන්නෙක ද
 රෑ පුරා මල ඉහළ මගෙ යහනෙ වෙළෙනෙක ද
 හිමිදිරියෙ අරුණෝදෙ මට හොරෙන් යන එකද
 
 වැව රවුමෙ නුඹ එක්ක ඇවිදින්න ඉඳහිටක
 රිදෙනකොට හිත අරන් නුඹෙ අත්ලෙ සතපන්න
 සීරුවම හෙමිහිටම මගෙ කඳුළු සඟවන්න
 තවම මං ළෙන්ගතුයි හන්තානෙ වගෙ උහුලන්න
 
 ඈත පායන්නෙ සඳ මඬල ඒක මට හරි හැඩයි
 හීනයක සතපලා සඳ මඩලෙ නිදි කරලා
 පොඩි පොකුරු හැඩ වැස්ස පීරුණාම වැව් තලේ
 පිටවාන තුරුළු කර හැංගුණා මට හොරෙන්
 

 

සිනාසුණු කඳුළක්
බී. එච්. එල්. වාසනා ~ පිංහේන - බේරුවල


 
 පාන හිනාවේ - කෝලකමක් නැත
 ආලහිතින් නෙතු ළඟ දැවටේ
 ලීල වඩන්නට - සීල බිඳින්නට
 නාරිලතා මල් - මඟ සුපිපේ
 
 මාල බඳින්නට - තාල වයන්නට
 හීන දකින හිත් ඇතද නඟේ
 සේල බඳට සුදු - තෑගි කරන්නට
 කාසි පනම් අත මිට හිඟනේ
 
 ඕලු සුදට අර - පේන සුපුන් සඳ
 මූණ නුඹේ මගෙ - හිත මැව්වේ
 පාළු ගෙපැල බුදු පාන තියන්නට
 දෝත නුඹේ කවුරුද එව්වේ?
 
 සාළු පොඩිත්තට මුවා වෙලා පෙති
 ගෝමර කාටද ඉඟිකෙරුවේ...?
 යාළු වෙලා හිත සෙනේ පුදන්නට
 පාළු අටුව ඉඩ නොදෙයි නඟේ
 
 කාර බැඳන් නුඹ - යද්දි ගමෙන් පිට
 පාර දිගේ දූවිලි නැගුණේ
 කීරි ගැහුණු හිත - වාරු කරන්නට
 වීරිය ගන්නයි මඟ රැඳුණේ
 
 සාර වුණත් එන වාරෙ අටුකොටුත්
 නෑර නුඹේ සිත - ඇත මතකේ
 බාරවෙයන් යළි - මුණ නොගැසෙන්නට
 සාර ඉමක් නැති - මේ සසරේ

 

ජීවිතය
තීක්ෂණ නිම්සිළු ගුරුසිංහ ~ මඩරංගොඩ කඩුගන්නාව


 සුළඟ හමන්නේ යම් දෙසට ද
 එලෙසින් හමයි ජීවිතය
 විටෙක එය මෘදුය
 තවත් විටෙක ප්‍රචණ්ඩය
 
 සුසුම් හඬ මැද විටෙක
 ජීවිතය සිනාසෙයි
 කඳුළැලි සතුට පිරෙන විට
 ජීවිතය කඩා වැටෙයි
 
 පැන නඟින හැඟුමන් සමඟ
 ජීවිතය දෙස අවංකව බැලිය යුතුය
 අතීතය වර්තමානය හා
 අනාගතය ගැන සිහින මවමින්
 පවත්වා ගෙන යාවි දිවියක්
 
 එනමුත් මරණය නමැති තොටුපළක්
 බලා සිටියි අප එනතුරු
 කොතරම් සිහින මැවුවත්
 කොතරම් ගැහැට වින්දත්
 අවසන තනි වේ අප හැම
 සොහොනේ එක කොන් පැත්තක
 

 

එතෙර ගිය අම්මාට
පි. එම්. පංචලී රවිරංගි ~ පිංහේන - බේරුවල



දිනෙන් දින ගතවෙනව
ඔබ තවම නාවෙ ඇයි
මල් පොකුරු පරවෙනව
ඔබට දුක දැනෙනවැයි

මාව තනිකර දමා
ඔයා එතෙරක ගියා
සිතේ ඔබෙ රූපයම
මැවී මට පේනවා

එපා අම්මේ යස ඉසුරු මට
මං ඉන්නේ හරි පාළුවෙන්
ඔබේ උණුසුම සදා දී මට
අම්මේ ඉන්නකො මං ළඟින්

 

සොඳුරු දසුන
සුමිත්‍රා ලංකා ~ මාපලාන - කඹුරුපිටිය

 

ගේ දොර ඉබේ හැදුණු
කළුකම්මේරිය පඳුරේ
පිනි මුතු කැට හැලෙන උදේ
කොණ්ඩ කුරුලු ජෝඩුවයි...

දම්පාටින් දිළිසි දිළිසි
මුතු ඇට පිපිලා වාගේ
බලන්න හරි ලස්සනයි

කුරුලු තුඩේ අමුණාගෙන
ඇසිල්ලකින් පියඹායන
සොඳුරු දසුන - සද්ද නොකර
බලමි හොරෙන් හරි සතුටින්




 

පාතිමා
පද්මිණී ශ්‍රියාලතා ~ ජාතීන් අතර විරසකය අර්ථ ශුන්‍ය සංසිද්ධියක් බව කිවිඳිය දකී. කාව්‍යානුභූතිය කාලීන වටිනාකමින් යුතුය.

 
 එක පන්තියෙ එකට ඉඳන් අකුරු කරපු පාතිමා
 අපි පන්සිල් කියන විටදි නිසලව උන් පාතිමා
 රාමලාන් හඳ දකින්න ඇඟිලි ගැනපු පාතිමා
 ලොකු වෙනකොට හඳක් වගේ වලාකුළක හැංගුණා
 
 ඉස්කෝලෙන් අස් වුණාට ළෙන්ගතුකම් වැඩිවුණා
 අපේ ම අය තරමට දුක - සැප ළඟ අපි හමුවුණා
 තනි තනියෙන් පාට කළත් හීන එකට පෑහුණා
 අපි ම කරපු වැරැදි වලට අපට ම අපි හිනැහුණා
 
 ඇස් දෙක විතරක් එළිපිට වත හසරැලි වියැකුණා
 හතු වගේ ම රට පුරාම කළු සෙවණැලි මතුවුණා
 අමල් බිසෝ අපි වෙන්කර මහ පවුරක් ඉදිවුණා
 වට අගලේ කිඹුල් කටේ අපෙ හොඳ හිත මියැදුණා
 
 මඟ තොට යන එන අය දැක සියොළඟ කළු වහගෙනා
 ‘බිල්ලෙක්’ යැයි මුමුණන විට පුතු බියපත් දෑසිනා
 සුරතින් පුතු මුව වසමින් ඒ බිල්ලෙක් තුළ පවා
 මට ළෙන්ගතු මගෙ මිතුරිය මං තවමත් හොයනවා
 


  

අනේ කඩුපුල්
ඇල්. ජේ. ආනන්ද පෙරේරා ~ බොනවිස්ටා - උණවටුන


 සැවොම නිදි දෙව් දුව වැලඳගත් පැයේ
 පරවී යාවි රහසින් හිමිදිරියේ
 බිඟුන් සමනළ තුඩකට හසු නොවී සිටියේ
 සුපිපි මලේ සුවයක් වූයේ කෙසේ
 
 බඹර මීමැසි සමනළ තුඩක එතී
 විසුරුවාලන පෙති මත ආදරය ඇතී
 මිහිර නොමැතිව අඳුරේ නෑසී යතී
 කෙසේද මලක්වී සමනළ තුඩකට හසුව නැතී
 
 දෑතින් ගෙන බුදු සමිඳුගෙ සිරිපා කමල වැඳ
 නොමැතිය පින් ඉන්නට මල් අසුන මැද
 කුමටද පිපි රැයේ පරවෙන පූෂ්පයක් විද
 යළි පිබිදෙන්න හිරුපායන කලදි මැද
 

 

Week of ජනවාරි 13, 2021