තරුණී අපෙන් ඔබට

ජනප්‍රියම කාන්තා පුවත්පත වන තරුණී පුවත්පත ලෝකයට ගෙනහැර දක්වන මනාලියන් දැක්මයි මේ. ඔබ මනාලියක් වන ජීවිතයේ සොඳුරුම අවස්ථාව අර්ථවත් කිරීම අපේ ප්‍රාර්ථනයයි. ඔබට සුබ මංගලම්!

විශේෂාංග

රූපලාවන්‍ය සිරස්තල

2018 නොවැම්බර් 05, සඳුදා 16:12

රුව සපිරි සුව දිවිය රැකගන්න ජල බිඳුවක අගය දැනගන්න විශේෂාංග

ලිව්වේ  සාගරිකා දිසානායක ජයසිංහ
අගයන්න
(0 මනාප)
  නිරෝගී ජීවිතයක් සඳහා අත්‍යවශ්‍ය ආහාර හා පෝෂණය ගැන අප නිතර කතා කරනවා. එහෙත් නිරෝගී ක්‍රියාශීලී දිවියක් පවත්වා ගෙන යාම සඳහා නැතිවම බැරි වටිනාම සාධකයක් වන “ජලය” ගැන අපි එතරම් අවධානයක් යොමු කරන්නේ නෑ. බොහෝ දෙනකුට ‘ජලය’ යනු තවමත් නොමිලේම ලැබෙන සම්පතක් වන නමුදු එහි ඇති වටිනාකම දන්නේ අප අතරින් කීයෙන් කී දෙනා ද?

 

මිනිසාට ආහාර නොමැතිව දවස් 3-4 ක් ජිවත් වන්නට පුළුවන්. එහෙත් වතුර නැතිව දින 3-4 ක් ඉන්නට අපහසුයි. අපි ආහාර ගැන උනන්දු වෙන තරමට ‘වතුර’ ගැන උනන්දු වන්නේ නෑ.

එහෙත් ජීවිතය පවත්වා ගන්නට, නිරෝගීව ක්‍රියාශීලීව කටයුතු කරන්නට මෙන්ම රුව රැකගන්නටත් වතුර කොතරම් වැදගත් වන්නේ දැයි කාන්තා ඔබ විශේෂයෙන්ම දැන සිටිය යුත්තේ එය ඔබේ මෙන්ම පවුලේ හැම දෙනාගේම සුවපත් දිවියට වැදගත් වන හෙයින්.

ජලය පානය අපට වැදගත් වෙන හේතු රැසක්ම තිබෙනවා. මිනිස් සිරුරේ බරෙන් 60% කට වඩා අඩංගු වන්නේ ‘ජලය’ බව ඔබ දන්නවා ද? ජලය අපේ ශරීරයේ බොහෝ කාර්යයන් සඳහා අත්‍යවශ්‍යයි.

අප ගන්නා ආහාර පානවල අඩංගු පෝෂණ ද්‍රව්‍ය හා ඔක්සිජන් වායුව සිරුර පුරා බෙදා හැරීමට ජලය අවශ්‍ය වෙනවා. අප ගන්නා ආහාර ජීර්ණයට, සිරුරේ උෂ්ණත්වය නිසි පරිදි පවත්වා ගැනීමට, ශරීරය අනතුරුවලින් රැකගැනීමට, මුඛය, ඇස්, නාසය වැනි ඉන්ද්‍රිය පටලවල තෙතමනය පවත්වා ගැනීමට, මුත්‍රා සහ දහදිය නිසිලෙස සිරුරෙන් බැහැර කිරීමට මලබද්ධය වළක්වා ගැනීමට මෙන්ම මොළයේ ක්‍රියාකාරීත්වය නිසි ලෙස පවත්වා ගැනීමට ජලය නැතිවම බෑ.

පුරුද්දට වගේ අපි වතුර බිව්වට දිනකට සාමාන්‍ය පුද්ගලයකුගේ සිරුරට කොපමණ තරම් ජලය අවශ්‍ය වෙනවා ද? ළමා යොවුන් හා වැඩිහිටි වියේ දී ගත යුතු ජල ප්‍රමාණය කොපමණ ද යනාදී කරුණු ගැන වැඩිදෙනකු තුළ අවබෝධයක් ඇත්තේ නෑ.

සාමාන්‍යයෙන් අපි වතුර බොන්නේ තිබහක් ඇතිවුණොත් නැතිනම් කෑම වේලකින් පසුවයි. ඒත් නිරෝගී දිවියක් සඳහා ඒ ඒ වයස් කාණ්ඩයට අයත් පුද්ගලයන් දිනකට අවශ්‍ය ජල ප්‍රමාණය පානය කිරීමට උත්සාහ කළ යුතුයි.

වයස් කාණ්ඩ අනුව පුද්ගලයකු විසින් දිනකට පානය කළයුතු ජලය ප්‍රමාණය ලෝක සෞඛ්‍යය සංවිධානයේ උපදෙස් අනුව මෙසේ දක්වා තිබෙනවා.

 

වයස් කාණ්ඩය ජල පරිමාව

ළමා අවධිය (අවු.1-5) මිලිලීටර 750-800

ප්‍රාථමික අවධිය (අවු. 6-10) ලීටර 1-1.5

නවයොවුන් අවධිය (අවු. 11-18) ලීටර 1.5-2

 

වැඩිහිටියන් සඳහා දෛනික පානීය ජල අවශ්‍යතාව ඒ ඒ පුද්ගලයාගේ ශරීරයේ බර අනුව ගණනය කරගන්නට ඕනෑ. ඒ මෙසේයි.

දිනකට අවශ්‍ය ජල පරිමාව (ලීටර) = ශරීරයේ බර කි.ග්‍රෑම්/ 30

 

ඉහත සඳහන්වන්නේ පුද්ගලයකුට දිනකට අවශ්‍ය ජල ප්‍රමාණයේ දළ අගයක්. සාමාන්‍යයෙන් නිරෝගී පුද්ගලයකු දිනකට වතුර ලීටර 1.5-2 ක් හෝ වීදුරු 6-7 ක් වත් පානය කිරීම අවශ්‍යයි. උණුසුම් කාලගුණික තත්ත්වයන්හිදී හෝ උණ, පාචනය වැනි ඇතැම් අසනීප ඇති වූ අවස්ථාවන්හිදී සාමාන්‍ය පමණට වඩා වැඩිපුර ජලය පානය කළ යුතුයි.

කුඩා දරුවන්ට වුවත් උෂ්ණ කාලවලදී හෝ ඇතැම් රෝගී තත්ත්වයන්හිදී වෙනදාට වඩා ජලය බීමට දිය යුතුයි. උෂ්ණ කාලවලදී ක්‍රීඩාවල යෙදෙන ළමුන්, ක්‍රීඩකයන් හා අව්වේ දහදිය හෙළා වැඩ කරන ගොවීන් කම්කරුවන් වැනි පුද්ගලයන් වෙනදාට වඩා වැඩිපුර ජලය පානය කළ යුතුමයි. එවැනි කාලයට පිපාසය දැනෙන තුරු නොසිට හිතාමතාම වතුර බොන්නට ඕනෑ.

පුංචි දරුවන්ට හිතාමතා වතුර බොන්න මතක් වෙන්නේ නෑ. එහෙයින් ළදරු පාසලට හෝ පාසලට යන දරුවන්ට උෂ්ණාධික කාලවලට වතුර බෝතල් දෙකක් යවන්න. වතුර බෝතලයේ වතුර ටික ගෙදරට එන්නට පෙර බීලා එන්නැයි කියන්න.

වතුර වෙනුවට පැණිබීම, කෘත්‍රිම පානවර්ග හෝ රස කළ කිරි වර්ග දරුවන්ට පුරුදු කරන්න එපා. එවැනි පාන වෙනුවට තැඹිලි, දෙහි, දොඩම් වැනි ස්වභාවික පානවලට දරුවන් හුරු කරන්න. පලතුරු යුෂ හදන විට සීනි සහ ලුණු භාවිත නොකරනවානම් වඩා සුදුසුයි. සීනි මෙන්ම ලුණු රසටත් දරුවන් හුරුවන්නේ අප ඒවාට ඔවුන් පුරුදු කරවන නිසයි.

වැඩෙන දරුවන්ගේ ශරීරයේ ක්‍රියාකාරකම් වේගයෙන් සිදුවන නිසා ඔවුන්ට වැඩිපුර ජලය අවශ්‍යයි. ක්‍රීඩාවක යෙදෙන විට නියමිත පරිදි ජලය පානය කළ විට හොඳින් ක්‍රීඩා කරන්නට පුළුවන්. ඒ සඳහා ක්‍රීඩාවවක යෙදෙන්නට පැයකට පෙර වතුර මිලිලීටර් 500 ක් බීම සුදුසුයි. ක්‍රීඩාව හෝ ක්‍රියාකාරකම අතරතුරදී සෑම මිනිත්තු 15 කට වරක්ම වතුර මිලිලීටර් 250 ක් සහ ක්‍රියාකාරකමට පසුව වතුර මිලිලීටර් 250 ක් බීමත් සුදුසු බවයි වෛද්‍ය උපදේශය වන්නේ.

හොඳින් වතුර බීමෙන් සමෙහි තෙතමනය රැකෙනවා. සම වියළී වියපත් බවක් දිස්වන්නේ නෑ. මුහුණේ කුරුලෑ ඇතිවීම වළක්වාලයි. විඩාව දුරලයි. පිපාසයට වතුර හැර වෙනත් බීම වර්ග බීවාට පිපාසය සංසිඳෙන්නේ නෑ. පැණි බීම බොන්න බොන්න තව තවත් බොන්න හිතෙනවා. එමඟින් සිරුරෙහි සීනි ප්‍රතිශතය ඉහළ ගොස් දියවැඩියාවට ඔබ ගොදුරු වෙන්නට ඉඩ තිබෙනවා.

ජලය සහිත ආහාර බොහෝ තිබෙනවා. පලතුරු, එළවළු, පලාවර්ග, කිරි ආහාර, තැඹිලි, කැඳ, සුප් වැනි ආහාර ද පොල්පලා, රණවරා, බෙලිමල් වැනි ඖෂධීය පාන වර්ග ද දවසේ යම් යම් අවස්ථාවල බීමට ගත හැකියි.

උදෑසන අවදි වූ විගස පිරිසුදු වතුරු වීදුරුවක් බීමෙන් සිරුර ප්‍රබෝධවත් වේ. බහිස්‍රාවය පහසු වේ. රාත්‍රී නින්දට පෙර මෙන්ම ස්නානයට හෝ පිහිනීමට පෙර වතුර වීදුරුවක් බීම සෞඛ්‍යයට හිතකර වනවා.

රූපවාහිනිය නරඹන විට, පරිගණකය භාවිත කරන විට හෝ රාජකාරි වේලාවේදී ද හිතාමතාම වතුර බොන්න. ඔබ ගෘහණියක නම් ගේ දොර වැඩපල අතරතුර හිතා මතාම වතුර බොන්න පුරුදු වෙන්න. කාර්යාලයට, පාසලට හෝ වෙනත් ගමන් බිමන් යන විටද වතුර බෝතලයක් රැගෙන යාමට පුරුදු වන්න.

දිනකට අවශ්‍ය තරම් වතුර පානය නොකළහොත් ඔබට අධ්‍යාපන කටයුතු හෝ රාජකාරි කටයුතු සඳහා හොඳින් හිත එකඟකර ගැනීමට අපහසු වෙනු ඇත.

ප්‍රශස්ත මට්ටමින් ක්‍රීඩා හෝ විෂයය බාහිර ක්‍රියාකාරකම්

කිරීමට නොහැකි වේ. සිරුර විජලනයට ලක්වී පිපාසය දැනේ.

මුඛය හා ඇස් වියළීම නිසා ඒවායේ විෂබීජ වර්ධනය වේ.

නිදිමත ගතිය හා ශාරීරිකව අලස, දුර්වල ගති ඇතිවේ.

ඉක්මනින් කේන්ති යයි.

සම වියැළෙයි. රැලි වැටෙයි. ඉක්මනින්ම මහලු පෙනුමක් ලැබෙයි.

රූමත් බව රැකගන්න මෙන්ම කෙස් කලඹේ දීප්තිය රැකගන්න ද ප්‍රමාණවත් තරම් ජලය පානය කිරීම ප්‍රයෝජනවත් වේ.

සෞඛ්‍යයමත් ලෙස ජලය පානය කිරීමට A B C D E F  යනුවෙන් පහත දැක්වෙන සවිධි සැලැස්ම අනුගමනය කරන්න.

 

A - Adequate Amount -  ඔබේ බර අනුව ප්‍රමාණවත්තරම් වතුර බොන්න.

 B- Bottle of Water පානීය ජල බෝතලයක් නිතරම ළඟ තබාගන්න. නැවත භාවිතයට සුදුසු ප්ලාස්ටික් බෝතලයක් භාවිත කරන්න.

C - Clean Water - හැම විටම පිරිසුදු වතුර බීමට ගන්න.

 

D - Day All day  - දවස පුරා ජලය පානය කරන්න.

E- Extra Water  - උණුසුම් දිනවල, ශාරීරික ක්‍රියාකාරකම් හෝ වැඩිපුර කය වෙහෙසවන දිනවලට වැඩිපුර ජලය පානය කරන්න.

F- Food -- ජලය අඩංගු අලුත් එළවළු හා පලතුරු, තැඹිලි , කිරි සහිත ආහාර කැඳ, සුප් සහ ඔසු පැන් ආහාරයට ගන්න පුරුදුවන්න.

 

 

උපදෙස් - සෞඛ්‍යය අමාත්‍යංශයේ බෝ නොවන රෝග ඒකකයේ විශේෂඥ ප්‍රජා වෛද්‍ය

ශාන්ති ගුණවර්ධන

 

236 වාරයක් කියවා ඇත අවසන් වරට සංස්කරණය කළේ 2018 නොවැම්බර් 05, සඳුදා 16:13
අදහස් එක් කිරීමට ලොග් වෙන්න