තරුණී අපෙන් ඔබට

ජනප්‍රියම කාන්තා පුවත්පත වන තරුණී පුවත්පත ලෝකයට ගෙනහැර දක්වන මනාලියන් දැක්මයි මේ. ඔබ මනාලියක් වන ජීවිතයේ සොඳුරුම අවස්ථාව අර්ථවත් කිරීම අපේ ප්‍රාර්ථනයයි. ඔබට සුබ මංගලම්!

විශේෂාංග

රූපලාවන්‍ය ශිල්පින් සිරස්තල

කොණ්ඩා සැකසුම් සිරස්තල

මල් කළඔ සිරස්තල

මෙහෙන්දි රටා සිරස්තල

රූපලාවන්‍ය සිරස්තල

ආභරණ සපයන්නෝ සිරස්තල

සාරි සිරස්තල

2012 ජූනි 28, බ්‍රහස්පතින්දා 16:17

දෙපා හැඩ කරන පාවහන්

ලිව්වේ  දිල්ශානි නදීරා, සුරනි ඒකනායක
අගයන්න
(1 මනාපය)
උත්සව සමය වෙනුවෙන් සාප්පු සවාරි යාමට සූදානම් වී සිටින ඔබ නවීන පන්නයේ ඇඳුම් මෙන්ම පාවහන් ද මිල දී ගැනීමට හිත පිරෙන සතුටකින් ඇති. ඔබේ ඒ තෝරා ගැනීම සඳහා විලාසිතා ලෝකයට එක් වුණු අලුත්ම පාවහන් විලාසිතා සොයා යන්නයි මේ සූදානම.

කොළඹ කොටුව මල්වත්ත පාරේ වගේම මහ වීදියේත් ජනප්‍රිය නාම ඇති අලෙවි සැල් ගණනාවක්ම තිබෙනවා. දේශීය මෙන්ම බැංකොක් හා චීන විලාසිතා රැගත් පාවහන් මේ උත්සව සමයේදී තරඟකාරී මිල ගණන් යටතේ ඔබට මිල දී ගන්නට හැකියි. මේ අතර සින්තටික් හා ලෙදර් නිමාවකින් යුතු විලාසිතා රාශියක් දැකිය හැකි අතර කල් පැවැත්ම අතින් ලෙදර් පාවහන් ඉහළ මට්ටමක පවතී. ඒත් විලාසිතා ප්‍රිය කරන්නන්ට සින්තටික් පාවහන් වඩාත් ගැළපේවි.

ඔබත් මෙවර සාප්පු සවාරියේ යෙදෙන්නට පෙර පාවහන් පිළිබඳ මේ දැනුම ද සිතට අරගෙන ගියොත් නම් මුදලේ වටිනාකමටත්, ඔබේ ලස්සන වැඩි කර ගන්නත් මනා පිටිවහලක් වේවි.

ඔබ සිහින් සිරුරක් ඇති තරමක් උස් කාන්තාවක් නම් උස් අඩියකින් යුතු පාවහන් ගැළපෙන්නේ නෑ. එවැන්නකින් ඔබේ උස ප්‍රමාණය තවත් වැඩි කර පෙන්වන අතර, වෙනස්ම ස්වරූපයක් පිළිබිඹු වේ. එවැනි අය මධ්‍යම ප්‍රමාණයේ අඩි සහිත පාවහන් පැළඳීම ඉතා සුදුසුයි. ඔබ තරමක් සිරුරෙන් මහත උසින් අඩු කාන්තාවක් නම් උසින් වැඩි අඩි සහිත පාවහන් කදිමයි. නමුත් ඔබ දිනපතා ගමනේ යෙදෙන කාන්තාවක් නම් උස් අඩි සහිත පාවහන් රෝගාබාධ රැසකට මුල පුරන්නට හේතු වේවි. දිනපතා උස් අඩි පාවහන් පැළඳීම මඟින් කොන්දේ සහ පාද අපහසුතා ඇතිවීමට ඉඩකඩ ඇති අතර ඒ පිළිබඳ සැලකිලිමත් වන්න.

ඔබ දිනපතා රැකියාවට යන කාන්තාවක් නම් විශේෂයෙන්ම පාවහන් මිල දී ගැනීමට පෙර එය ශක්තිමත් හොඳ නිමාවකින් යුත්තක්දැයි පරීක්ෂා කරන්න. දිගුකාලීන භාවිතය සඳහා එය ඉතා ප්‍රයෝජනවත්ය. එමෙන්ම පාවහන් අලංකාර කිරීමට සහ නිමා කිරීමට යොදා ඇති රෙදි හා අනෙකුත් ආයිත්තම් මසා හෝ අලවා ඇතිදැයි විමසිලිමත් වන්න. බොහෝ විට මසා ඇති පාවහන් කල් පැවැත්ම අතින් ඉහළය. එමෙන්ම පාවහන් අලංකාර කිරීම සඳහා ද බකල්, ගාංචු, විසිතුරු ගල් වැනි දෑ යොදා තිබිය හැකිය. එවැනි දෑ ඔබේ ඇඳුමට හානියක් නොවන සේ් තෝරා ගැනීමට වග බලා ගන්න. ඔබ දිනපතා සාරිය අඳීන යුවතියක් නම් එම ගාංචු පැටලී සාරි ඉරී යා හැකිය.

ඔබ සැරසෙන ඇඳුමේ සහ බෑගයේ වර්ණයට ගැළපෙන අයුරින්ම පාවහන් තෝරා ගත හැකි නම් වඩාත් සුන්දරයි. නමුත් මුදල් පසුම්බිය සලකා බලා කළු, දුඹුරු සහ අළු වර්ණයන්ට හුරු පාවහන් තෝරා ගැනිම වඩාත් උචිත වන්නේ සියලුම ඇඳුම්වලට ගැළපෙන නිසයි. පාවහන් විලාසිතා සඳහා උනන්දුවක් දක්වන යෞවනියන්ගේ ජනප්‍රියම පාවහන් විලාසිතාව බවට පත්ව ඇත්තේ හීනි පටි සහිත පාවහන්ය. කෙසේ නමුදු ඔබට රිසි අයුරින් ඕනෑම වර්ගයක ඕනෑම ප්‍රමාණයේ පාවහන් මිල දී ගැනීමට වෙළෙඳ පොළේ ඕනෑ තරම් ඉඩ ප්‍රස්තාව ඇත. ඉතිං, ඔබත් පාවහන් මිල දී ගැනීමට පෙර මේ කරුණු ගැන ටිකත් හිතලා බැලුවා නම් හොඳයි නේද?

13975 වාරයක් කියවා ඇත අවසන් වරට සංස්කරණය කළේ 2012 ජූලි 05, බ්‍රහස්පතින්දා 09:34
අදහස් එක් කිරීමට ලොග් වෙන්න