දහසක් තැන්වලදී
මම අවසානයට එළැඹෙයි
මා දැවෙයි
මැකී යන තරුවක් වෙයි
ඒ තරුව ඔබේ අහසේ
නොපෙනී යයි…
ඈ ලියූ A Fading Star කවියේ කොටසකි ඒ. ඇත්තකි, ඒ තරුව යලිදු නොපායන්නට දැවී සදහටම මැකී ගොසිනි. ඒ තරුව ඉබේ මැකී ගියා නොවේ. ස්වභාවික අවසානයකට ලඟා වූවා ද නොවේ. මනුෂ්‍යත්වය පාගා දැමූ ජාතිවාදය, ආගම්වාදය, බෙදුම්වාදය, ත්‍රස්තවාදය මෙන්ම බලකාමයෙන් ද උමතු වූ ලෝකයක ඒ තරුව සුන්නද්දූලි කළ සෙයකි.
ඇය, ප්‍රතිභාසම්පන්න තරුණ ඉරාන කිවිඳියක වූ පර්නියා අබ්බාසි ය. සිය 24 වැනි උපන්දිනය සමරන්නට දින කිහිපයක් තිබියදී ඉරාන – ඊශ්‍රායල් යුද්ධය අවුළුවමින් ඊශ්‍රායලය එල්ල කළ ගුවන් ප්‍රහාරයෙන් බටහිර ටෙහෙරානයේ සත්තාර් ඛාන් වීදියේ ඇයගේ නි‍ෙවස පිහිටි මහල් නිවාස සංකීර්ණය ද විනාශයට පත් විය. ඉකුත් 12 වැනිදා රැය ගෙවීගොස් 13 වැනිදා උදාවෙද්දී එල්ල වූ එම අනපේක්ෂිත ප්‍රහාරයෙන් හාත්පස යුද අඳුර ඉතිරිකර ඒ තුරුණු තරුව නිවී මැකී ගියේ, සිය මව හා පියා ද 14 හැවිරිදි සොහොයුරා පර්හාට් ද සමඟය . ප්‍රහාරයෙන් මහල් 10කින් යුතු එම මහල් නිවාස සංකීර්ණයේ පර්නියා ජීවත්වූ 4 මහල ද විනාශයට පත්වූයේ එහි නිවැසි කිසිවෙක් ජීවතුන් අතර ඇතැයි සිතන්නට නොහැකි තරමටය. ඒ අමිහිරි රාත්‍රියේ දී ජීවිතය ගැන දුටු සිහින, සිහින ලෙසම තිබෙන්නට ඉඩහැර ඇය නික්මගොස් තිබිණි. ඇගේ රෝස පැහැ ඇඳ ඇතිරිල්ල රක්ත වර්ණයට හැරී තිබූ අතර ,කොන්ක්ක්‍රීට් කුට්ටියකට යටින් කෙහෙරැල් රොදක් පමණක් දිස්විය.
පර්නියාගේ පවුල මේ නිෙවසේ පදිංචියට පැමිණ වැඩි කලක් නැත.ඇගේ දෙමව්පියන් වසර ගණනක් තිස්සේ දුක් මහන්සියෙන් ඉපැයූ මුදලින් කොටසක් ඉතිරිකර වැඩි ඉඩකඩක් ඇති නව මහල් නිවාසය මිලට ගෙන තිබුණේ වඩාත්ම දරුවන්ගේ සුවපහසුව වෙනුවෙනි. පර්නියාට සහ ඇගේ සොහොයුරාට නව නිෙවසේ තනි නිදන කාමර දෙකක් ද විය.
පර්නියාට ඉරානයේ කිසිදු මිලිටරි අංශයක් සමඟ සම්බන්ධයක් නොතිබිණි. එම ප්‍රහාරයෙන් ඇය ජීවිතක්ෂයට පත්ව ඇති බව සලවූ විගස ඊශ්‍රායල් පාර්ශ්වය හා ඉරාන විරෝධීහු ප්‍රතිචාර දැක්වූයේ පර්නියා , ඉරාන පරමාණුක බලශක්ති සංවිධානයේ හිටපු ප්‍රධානී ෆෙරිඩුන් අබ්බාසිගේ දියණිය යනුවෙන් වරදවා වටහා ගැනීමෙනි. මෙම ප්‍රහාරයෙන් ඔහු මරා දැමිණි. අබ්බාසි සමඟ ඇයගේ දියණිය ද මරාදමා ඇතැයි මුලින් වාර්තා කළ ද පසුව සනාථ වූයේ, ඇයට එම ප්‍රධානියා සමඟ කිසිදු සම්බන්ධයක් නොවූ බවය.
ඇයගේ පියා , පර්වීෂ් හිටපු බැංකු සේවකයෙකි. ඇතැම් මූලාශ්‍රවල දැක්වුණේ , ඔහු අධ්‍යාපන අමාත්‍යාංශයේ හිටපු නිලධාරියෙක් වන අතර මව බැංකු නිලධාරිනියකවූ බවය. කවදා හෝ දිනෙක පියා මෙන්ම බැංකු නිලධාරිනියක වීම ඇයගේ ද අපේක්ෂාව විය. Qaswin ජාත්‍යන්තර විශ්වවිද්‍යාලයෙන් ඉංග්‍රීසි පරිවර්තනය ඇතුළු විෂයයන් හදාරා උපාධිධාරිනියක ලෙස පිටවූ ඇය , සිය වෘත්තීය සිහිනය සපුරා ගනිමින් Melli බැංකුවේ සේවයට එක්වූයේ මෑතදීය. මේ රැකියාව ලැබූ දා පර්නියා සිටියේ බොහෝ සතුටින් බව ඇගේ මිතුරු මිතුරියන් සිහිකරන්නේ කම්පනයෙනි. ඊට පෙර ඇය ඉංග්‍රීසි භාෂාව ඉගැන්වීමෙහි නිරත වූවාය.
ඇය වඩාත් සතුටු වූයේ කවි කියැවීමෙනි. ඒ බොහොමයක් කවි ඈ වැළැඳගත්තේ හදවතිනි. ඇගේ ප්‍රියතම කවියා වූයේ ඉරාන නව කවි සම්ප්‍රදායේ පුරෝගාමියා ලෙස සැලකෙන නලීර් නදෙර්පුර්ය .
තමා ලියූ කවි ඈ පළමුව බෙදාගත්තේ සිය මව සහ සමීප යහළු යෙහෙළියන් සමඟය. ඒ කවි කියවා ඔවුන්ගෙන් ලැබෙන ප්‍රතිචාර ගැන දැනගැනීමට ඇය දැක්වූයේ විශාල කැමැත්තකි. ” මං මගේ කවි ඉස්සෙල්ලම බලන්න දෙන්නෙ අම්මට. ඊළඟට මගේ යහළුවන්ට. මේ කවි ගැන ඔයාල කියන්නෙ මොකක්ද කියල මං ඔවුන්ගෙන් අහනවා. මා වටා සිටින අයගෙ ප්‍රතිචාර මට හරි වටිනවා. මගේ කවි කියවද්දි මිනිස්සුන්ට දැනෙන හැඟීම කොහොම එකක්ද කියන එක ගැන දැනගන්න මම හරි උනන්දුයි. මෙය දැන් මගේ ජීවිතයේ කොටසක් වෙලා. හැම රැයකම මං පුංචි කවියක් හරි ලියනවා…” ඒ බිහිසුණු රාත්‍රියේ ද ඈ කවියක් ලියන්නට ඇත. එහෙත් වෙනදා මෙන් ඒ කවිය අන්කිසිවෙකුටත් රසවිඳින්නට නොතබාම ඇය සමුගෙනය.
පර්නියා දස්කම් දැක්වූයේ සාහිත්‍යකරණයට පමණක් නොවේ. ඈ සිසුවියකව සිටි අවදියේ පටන්ම ගණිතයට ද දස්කම් දැක්වූවාය. කෙසේවුවද, සාහිත්‍ය හා කාව්‍යකරණය ඇයගේ ජීවන විලාසිතාව විය. සෑම විටෙකම පාහේ ඇය දක්නට ලැබුණේ කවි පොතක් අතැතිවය. ඇය සංගීතයටද ප්‍රිය කළාය. අලුත් අලුත් කෑම වර්ග අත්හදා බලන්නට ද ආසා කළාය. ඉතාලි භාෂාව ද හැදෑරීය. සංචාරය ඇයගේ ප්‍රියතම විනෝදාංශයකි. කවදා හෝ ලෝකය දැකගැනීම සොබා සෞන්දර්යය විඳින්නට ආසා කළ ඇයගේ බලවත් අපේක්ෂාවක් විය. ඉරානයේ උසම කඳු මුදුන , Damavand තරණය කළ දා ඇය සතුටු වූ අයුරු සමීපතමයන්ට මතකය.
පර්නියාගේ ප්‍රියතම කුසුම සූරියකාන්තය. ඇය ද සූරියකාන්ත මලක් මෙන් පියකරු යුවතියක වූවාය. පිපුරුම් හඬින් හාත්පස ගිගුම් දුන් උදානොවිය යුතුව තිබූ ඒ අවාසනාවන්ත රැයෙන් පසු අරුණෝදයේ හිරු දැක හිනැහෙන්නට ඒ සූරියකාන්ත මල විකසිත වූයේ නැත. උදෑසනින් සූරියකාන්ත මලක් වී පිපෙන්නට අන්ධකාර රෑ අහසේ තරුවක් වී පෑයූ පර්නියා යළි කිසිදා තරුවක් වී පායන්නේ ද නැත.
මම ,
ඔබත් මමත් වෙනුවෙන්
අප දෙදෙනාම වෙනුවෙන්
කඳුළු සැලුවා
ඔබ,
ඔබේ අහසේ දී
මා කඳුළු තාරකා නිවා දැමුවා
ඔබේ ලෝකය
නිදහසේ ආලෝකයයි
මගේ ලෝකය
සෙවණැලි සමඟයි
කොහේ හෝ තැනෙක
ඔබත්..මමත්..
අවසානය කරා එළැඹෙයි
ලෝකයේ ලස්සනම කවිය නිහඬ වෙයි
කොහේ හෝ තැනෙක ඔබ වේගයෙන් හඬ නඟයි
ඒ ජීවිතයෙ සිහින් කෙඳිරියයි
දහසක් තැන්වලදී
මම අවසානයට එළැඹෙයි
මා දැවෙයි
මැකී යන තරුවක් වෙයි
ඒ තරුව ඔබේ අහසේ
නොපෙනී යයි.
– පර්නියා අබ්බාසි
