වර්ෂ 2016 දී වෛද්ය විද්යාව සඳහා වූ නොබෙල් ත්යාගය ජපන් ජාතික විද්යාඥ යොෂිනොරි ඕසුමි වෙත පිරිනැමුවේය. ඒ සමඟ ලෝකයම ඔහුගේ නව සොයා ගැනීම වෙත අවධානය යොමු කළේය. එනම්; අපගේ ශරීරයට පිටතින් කිසිදු දෙයක් ලබා නොදී තනිවම සුව වීමේ සහ අලුත්වැඩියා කිරීමේ හැකියාවක් පවතින බවයි. මෙම ක්රියාවලිය සක්රිය කිරීම සඳහා ප්රධානතම යතුර වන්නේ ආහාර ප්රමාණය සීමා කිරීම හෝ යම් කාල සීමාවක් නිරාහාරව සිටීම බව තහවුරු විය.
මෙම ක්රියාවලිය විද්යාත්මකව හඳුන්වනු ලබන්නේ ඔටෝෆජි (Autophagy) යනුවෙනි. එහි සරල අර්ථය වන්නේ ‘තමන් විසින්ම තමන්ව අනුභව කිරීම’ යන්නයි. බැලූ බැල්මට මෙය බියකරු වුවද, සත්ය වශයෙන්ම මෙය සෛලීය මට්ටමේ සිදුවන ඉතා හිතකර ස්වාභාවික ප්රතිචක්රීයකරණයකි. ඔබ දිනපතා ආහාර ගන්නා විට ශරීරය නිරන්තරයෙන් කාර්යබහුල වන්නේ ආහාර දිරවීමටයි. නමුත් ඔබ පැය 12කට හෝ 16කට වඩා වැඩි කාලයක් නිරාහාරව සිටින විට ශරීරයට පිටතින් ශක්තිය ලැබීම නතර වේ. එවිට ශක්තිය සොයා ගැනීමට ශරීරය තම අභ්යන්තරය දෙසට හැරේ. එහි දී සෛල තුළ එකතු වී ඇති අක්රිය වූ ප්රෝටීන කැබලි, හානි වූ සෛල කොටස්, වයිරස හෝ බැක්ටීරියා වැනි විෂ ද්රව්ය එක්රැස් කර ඒවා බිඳ දමා ශක්තිය බවට පත් කරගැනීම ඔටෝෆජි මඟින් සිදු වේ.
මෙය හරියටම නිවෙසක ඇති අනවශ්ය දේ ඉවත් කර නැවත ප්රයෝජනයට ගැනීමක් වැනිය. සෛලීය මට්ටමින් සිදුවන මෙම පිරිසුදු කිරීමේ මෙහෙයුම ඔස්සේ ශරීරයට දැවැන්ත සුවයක් සහ අලුත්වැඩියාවක් ලබා දේ.
මෙම ක්රමවේදය “විරාම උපවාසය” ලෙස අද ජනප්රිය වී තිබේ. මෙය විශේෂයෙන්ම තරබාරු කාන්තාවන්ගේ සිරුරේ හැඩය සහ බර අඩු කර ගැනීම සඳහා ඉතා සාර්ථක උපායමාර්ගයකි. දිගු වේලාවක් නිරාහාරව සිටීමෙන් ඉන්සියුලින් හෝමෝනයේ මට්ටම පහළ බසී. නිරන්තරයෙන් ආහාර ගැනීම නිසා ඉන්සියුලින් මට්ටම ඉහළ ගොස් මේදය ගබඩා වීම සිදු වේ. නමුත් උපවාසයේදී ඉන්සියුලින් පහළ යන විට, ශරීරය ගබඩා වී ඇති මේදය බිඳදමා ශක්තිය නිපදවීම ආරම්භ කරයි. මේදය දහනය කිරීමේ මෙම ක්රියාවලිය උදරය වටා ඇති අනවශ්ය මේද තට්ටු ඉක්මනින් ඉවත් කිරීමට උපකාරී වේ. මේ හේතුව නිසා තරබාරුකමෙන් පෙළෙන කාන්තාවන්ට යෝග්ය සිරුරේ හැඩයක් ලබා ගැනීමට මෙම ඔටෝෆජි ක්රියාවලිය සක්රිය කිරීම මහඟු පිටිවහලක් සපයයි.
ඔටෝෆජි සක්රිය කිරීම රූපලාවණ්ය ක්ෂේත්රය තුළ පුදුමාකාර ප්රතිලාභ රැසක් ලබා දේ. කාලයත් සමඟ අපගේ සෛල තුළ කුණු කසළ එකතු වීම නිසා සම රැලි වැටීම සහ අවයව දුර්වල වීම සිදුවේ. නමුත් උපවාසය මගින් මෙම අපද්රව්ය ඉවත් කරන නිසා සෛල අලුත් වී තරුණ බව රැක ගැනීමට විශාල පිටිවහලක් ලැබේ. මෙය වයසට යෑම පමා කිරීමේ ස්වාභාවිකම ක්රමයයි. සෛලීය අපද්රව්ය ඉවත් වීමෙන් සම පැහැපත් වී, සමේ තද බව වැඩි වී, රැලි වැටීම් අඩු වීම සිදු වේ. මේ නිසා මිල අධික රූපලාවණ්ය ක්රම වෙනුවට, සිරුර තුළින්ම නව ජීවයක් ලබා දෙන මෙම ක්රමවේදය සාර්ථක සත්කාරයකි. එමෙන්ම ප්රතිශක්තිකරණ පද්ධතිය ශක්තිමත් වී, ශරීරයේ ඇති ප්රදාහය හෙවත් අනවශ්ය ඉදිමීම් සහ වේදනා තත්ත්වයන් පාලනය කිරීමට ද මෙම විවේක කාලය වැදගත් වේ. සෞඛ්යසම්පන්න සිරුරක් තුළින් පමණක් සැබෑ සුන්දරත්වය ප්රකාශ වන බැවින්, මෙම අභ්යන්තර සුව කිරීමේ මෙහෙයුම, ඕනෑම කාන්තාවකට දිගුකාලීන සුන්දරත්වයක් ලබා දීමේ පදනම වේ.
නිරාහාරව සිටීම මොළයේ සෞඛ්යයට ද වැදගත් වේ. කාන්තාවන් දරන අධික මානසික පීඩනය කළමනාකරණය කර ගැනීමට මෙය උපකාරී වේ. පර්යේෂණ මඟින් තහවුරු වී ඇති පරිදි, ඔටෝෆජි මඟින් ඇල්සයිමර් සහ පාකින්සන් වැනි රෝගවලට හේතු වන විෂ සහිත ප්රෝටීන තැන්පතු ඉවත් කිරීමට උපකාරී වේ. මෙම ක්රියාවලිය නිසා මොළයේ සෛල අලුත්වැඩියා වී, මතක ශක්තිය වර්ධනය වීම සහ මානසික පැහැදිලිකම වැඩි දියුණු වීම සිදු වේ. සැහැල්ලු සහ විවේකී සිතක් නීරෝගි සහ සුන්දර කාන්තාවකගේ ප්රධානතම ලක්ෂණය වන බැවින්, මෙය කායික සුන්දරත්වයට අමතරව මානසික සුන්දරත්වය වැඩි දියුණු කිරීමට දායක වේ.
බුදු දහම තුළින් පැමිණි ඉතා පෞරාණික සංකල්පයක් ලෙස මෙම ක්රමවේදය සැලකිය හැකිය. භාග්යවතුන් වහන්සේ විසින් භික්ෂූන් වහන්සේලාට දේශනා කරන ලද “විකල භෝජනා වේරමණී සික්ඛාපදං” හෙවත් විකාල භෝජනයෙන් වැළකීමේ ශික්ෂා පදය, ඔටෝෆජි ක්රියාවලිය සක්රිය කිරීමට ඇති හොඳම ක්රමවේදයකි. මධ්යහ්නයෙන් (දහවල් 12න්) පසු ආහාර නොගෙන සිටීම, පැය 16-18ක් පමණ නිරාහාරව සිටීමට අවස්ථාව සලසා දෙයි. විද්යාත්මකව ඔප්පු වී ඇති පරිදි, පැය 12කට හෝ ඊට වැඩි කාලයක් නිරාහාරව සිටීමෙන් ඔටෝෆජි ක්රියාවලිය ආරම්භ වේ. බෞද්ධ භික්ෂූන් වහන්සේලාගේ මෙම ජීවන රටාව සෛලීය මට්ටමේ ප්රතිචක්රීයකරණය සඳහා නිරන්තරයෙන් අවකාශය ලබා දේ. කාන්තාවන් ලෙස අපට රාත්රී ආහාරය වේලාසනින් ගෙන පසුදා උදෑසන ආහාරය තරමක් ප්රමාද කිරීමෙන් ඉතා පහසුවෙන් මෙම සුව කිරීමේ පරාසය ලබා ගත හැකිය. සීමාව ඉක්මවා දින ගණන් නිරාහාරව සිටීම ශරීරයට අහිතකර විය හැකි බව මතක තබා ගන්න.
ඔටෝෆජි සක්රිය කිරීම සඳහා මිල අධික රූපලාවණ්ය මධ්යස්ථාන හෝ සංකීර්ණ වැඩසටහන් අවශ්ය නොවේ.
ඔබට සරලවම විරාම උපවාසය මඟින් මෙම ස්වාභාවික සුන්දරත්වයේ මාවත විවෘත කර ගත හැකිය. වඩාත් ජනප්රිය 16:8 ක්රමයේදී ඔබ දවස පුරා පැය 16ක් නිරාහාරව සිටීම සහ පැය 8ක කාලයක් තුළ ආහාර ගැනීම සිදු කරයි; උදාහරණයක් ලෙස රාත්රී 7.00 ට අවසන් ආහාරය ගෙන පසුදා උදෑසන 11.00 ට පමණ උදෑසන ආහාරය ගැනීම ආරම්භ කළ හැකිය. මෙය කාර්යබහුල කාන්තාවකට පවා පහසුවෙන් කළමනාකරණය කර ගත හැකි අතර නිරාහාරව සිටින පැය ගණන් තුළදී සීනි රහිත තේ, කෝපි හෝ පැහැදිලි ජලය පානය කිරීම අත්යවශ්ය වේ. මෙය සිරුරේ විෂ ඉවත් කිරීමට සහ කුසගින්න පාලනය කිරීමට උපකාරී වේ. ඔබ ආහාර ගන්නා පැය 8ක කාලය තුළදී ද ගුණාත්මක, ප්රෝටීන සහ කෙඳි බහුල ආහාර ගැනීම ඉතා වැදගත් වේ.
ශරීරය පුරුදු වන තුරු මෘදුව ආරම්භ කරන්න – මුලින්ම පැය 12ක් නිරාහාරව සිට පසුව පැය 14 හෝ 16 දක්වා කාලය දීර්ඝ කරන්න. අවසාන වශයෙන්, නවීන විද්යාව විසින් සොයාගත් මෙම ඔටෝෆජි සංකල්පය අපගේ පෞරාණික පිළිවෙත්වල සත්යතාව තහවුරු කරනවා පමණක් නොව මිල අධික රූපලාවණ්ය සත්කාරවලින් ලබා ගත නොහැකි සෞඛ්යසම්පන්න බවක් සහ දීර්ඝායුෂක් ලබා ගැනීමට ඇති සරලම මාවත පෙන්වා දෙයි. වරින් වර ශරීරයට විවේකයක් ලබා දී ස්වයංව – සුවකිරීමේ ක්රියාවලියට ඉඩ දීමෙන්, ඔබට තිරසර සුන්දරත්වයක් සහ නීරෝගි බවක් පහසුවෙන්ම ලබා ගත හැකිය.
අවසාන වශයෙන්, මෙම නව විප්ලවය ඔබේ ජීවිතයට එක් කර ගන්නා කාන්තාවන් සඳහා වන විශේෂ උපදෙස් කිහිපයක් මෙසේ සඳහන් කළ හැකිය.
ඔබ ගැබිනි හෝ කිරි දෙන මවක් නම්, දියවැඩියාව වැනි නිදන්ගත රෝගවලින් පෙළෙන්නේ නම් හෝ යම් ඖෂධයක් ලබා ගන්නේ නම්, විරාම උපවාසය ආරම්භ කිරීමට පෙර අනිවාර්යයෙන්ම වෛද්ය උපදෙස් ලබා ගන්න. ඔබ ආහාර ගන්නා පැය 8 ඇතුළතදී, අධික සීනි, අධික පිටි සහිත සැකසූ ආහාරවලින් සහ තෙල් සහිත ආහාරවලින් වළකින්න. පලතුරු, එළවළු, ප්රෝටීන සහ හිතකර මේද ඔබේ සිරුරේ සෛලීය අලුත්වැඩියාව සඳහා අවශ්ය අමුද්රව්ය සපයන බව මතක තබා ගන්න. භාවනාව, යෝගා හෝ මෘදු ව්යායාම මඟින් ආතතිය පාලනය කර ගැනීම, ඔටෝෆජි ප්රතිලාභ උපරිමයෙන් ලබා ගැනීමට උපකාරී වේ. උපවාස කාලය තුළ මෘදු ව්යායාම කිරීම, මේදය දහනය කිරීමේ ක්රියාවලිය තවත් වේගවත් කරයි, නමුත් දැඩි ව්යායාම සඳහා ආහාර ගැනීමෙන් පසු පැය 2ක කාලයක් වෙන් කිරීම වඩාත් සුදුසුය. නිරාහාරව සිටින විට ඇති වන හිසරදය සහ තෙහෙට්ටුව බොහෝ විට විජලනය නිසා ඇති වන බැවින් පිරිසුදු ජලය ඕනෑ තරම් පානය කිරීම සෛලීය ක්රියාවලින් නිසි ලෙස සිදු වීමට අත්යවශ්ය වේ.
