එදිනෙදා භාවිතයට සුදුසු සරල මේකප් එකක් නිවැරදි පිළිවෙළට සිදු කරන ආකාරය දෙස බලන විට, පළමුවෙන්ම අධික ඝනකම සහිත ෆවුන්ඩේෂන් වෙනුවට සැහැල්ලු BB හෝ CC ක්රීම් එකක් තෝරා ගැනීම වටී.
නූතන රූපලාවණ්ය ලෝකයේ වඩාත්ම කතාබහට ලක්වන මාතෘකාව වන්නේ ‘Less is More’ හෙවත් අවම භාවිතයෙන් උපරිම සුන්දරත්වයක් මතුකර ගැනීමයි. ස්වාභාවික පෙනුම සුරැකෙන සරල මේකප් එකක් (Simple Makeup Look) මඟින් සිදු කරන්නේ මුහුණේ ඇති අඩුපාඩු සියුම්ව වසා දමමින් ඔබේ රුවට නැවුම් බවක් එක් කිරීමයි. මේ සඳහා ඔබට අධික පිරිවැයක් හෝ පැය ගණනාවක කාලයක් වැය නොවන අතර, නිවැරදි උපකරණ සහ පියවර අනුගමනය කිරීමෙන් ඉතා ආකර්ෂණීය නිමාවක් ලබාගත හැකිය.
සාර්ථක මේකප් එකක මූලික පදනම වන්නේ සම ඒ සඳහා සූදානම් කිරීමයි. පිරිසුදු කරන ලද මුහුණක මොයිස්චරයිසර් එකක් සහ සන්ස්ක්රීන් එකක් ආලේප කිරීමෙන් පසුව, සමේ වර්ණයට ගැළපෙන ප්රයිමර් (Primer) එකක් භාවිත කිරීමෙන් මේකප් එක සම මත පැල්ලම් රහිතව ඒකාකාරීව තැවරීමට මෙන්ම සිදුරු අවහිර වීම වැළැක්වීමට ද උපකාරී වේ.
එදිනෙදා භාවිතයට සුදුසු සරල මේකප් එකක් නිවැරදි පිළිවෙළට සිදු කරන ආකාරය දෙස බලන විට, පළමුවෙන්ම අධික ඝනකම සහිත ෆවුන්ඩේෂන් වෙනුවට සැහැල්ලු BB හෝ CC ක්රීම් එකක් තෝරා ගැනීම වටී. එය මුහුණේ තැන් කිහිපයක තබා මේකප් ස්පොන්ජ් එකක් ආධාරයෙන් මෘදු ලෙස මුසු (Blend) කළ යුතුය. ඉන්පසු ඇස් යට අඳුරු බව හෝ කුරුලෑ ලප ඇත්නම් පමණක් ‘Concealer’ ස්වල්පයක් තවරා ඇඟිලි තුඩුවලින් තට්ටු කරමින් එය සමට උරා ගැනීමට සැලැස්විය යුතුය. පසුව මුහුණේ ඇති තෙල් ස්වභාවය පාලනය කිරීමට ‘Translucent powder’ එකක් ඉතා සැහැල්ලුවෙන් ආලේප කළ යුතුය. ඇස් සඳහා දුඹුරු පැහැති පෙන්සිලයකින් ඇහිබැමෙහි පවතින හිස් තැන් පිරිවසා, ඇසිපිය මත ළා පීච් හෝ රෝස පැහැති අයිෂැඩෝ ස්වල්පයක් තවරා මස්කාරා ආලේප කිරීමෙන් ඇස්වලට දීප්තිමත් පෙනුමක් ලබා ගත හැකිය. අවසානයට කම්මුල් මත ළා පැහැති බ්ලෂ් (Blush) එකක් සහ තොල් සඳහා ‘Nude’ වර්ණයක ලිප්ස්ටික් එකක් හෝ ලිප් ටින්ට් එකක් භාවිත කිරීමෙන් සරල මේකප් එක සම්පූර්ණ වේ.
මෙම සරල පෙනුම සාර්ථක කර ගැනීමට ඔබ භාවිත කරන උපකරණ හෙවත් ‘Tools’ පිළිබඳව ද දැඩි අවධානයක් යොමු කළ යුතුය. සාමාන්යයෙන් මේකප් ආලේප කිරීමට ‘Makeup Sponge’ එකක් හෝ ‘Foundation Brush’ එකක් භාවිත කළ හැකි අතර, පවුඩර් සහ බ්ලෂ් වර්ග තැවරීමට විශාල මෘදු බ්රෂ් එකක් (Fluffy Brush) භාවිත කිරීම ප්රමාණවත්ය.
බොහෝ දෙනෙක් අමතක කරන නමුත් අතිශයින්ම වැදගත් කරුණ වන්නේ මෙම උපකරණවල පිරිසුදුභාවයයි. මේකප් බ්රෂ් සහ ස්පොන්ජ් තුළ දූවිලි, තෙල් සහ බැක්ටීරියා ඉක්මනින් තැන්පත් වන බැවින් අවම වශයෙන් සති දෙකකට වරක්වත් ඒවා පිරිසුදු කළ යුතුය. මෘදු ෂැම්පු එකක් හෝ විශේෂිත බ්රෂ් ක්ලීනර් එකක් භාවිත කර උණුසුම් ජලයෙන් මේවා සෝදා, හිරු රශ්මිය නොවැටෙන වාතාශ්රය ඇති තැනක තබා සම්පූර්ණයෙන්ම වියළා ගැනීමෙන් සමේ ඇතිවන කුරුලෑ සහ ආසාදන වළක්වා ගත හැකිය.
මේකප් එකක් දැමීම තරමටම වැදගත් වන්නේ දවස අවසානයේදී එය නිවැරදිව ඉවත් කිරීමයි. මේකප් සමඟ නිදාගැනීම සමේ සිදුරු අවහිර වීමටත්, සම අකලට මහලු වීමටත් ප්රධාන හේතුවක් වේ. මේකප් ඉවත් කිරීම සඳහා ‘Micellar Water’ එකක් හෝ ‘Cleansing Balm’ වෙළෙඳපොළේ ඇති එකක් භාවිත කිරීම වඩාත් සුදුසුය. ප්රථමයෙන් පුළුන් කැබැල්ලකට මයිසෙලර් වෝටර් ස්වල්පයක් ගෙන මුහුණේ ඇති ආලේපන මෘදු ලෙස පිසදා ඉවත් කළ යුතුය.
විශේෂයෙන්ම ජලයට ඔරොත්තු දෙන (Waterproof) මස්කාරා සහ අයිලයිනර් ඉවත් කිරීමේදී සම තදින් නොඇද මෘදු ලෙස පිස දැමීමට වගබලා ගත යුතුය. ඉන්පසුව ඔබ සාමාන්යයෙන් භාවිත කරන ෆේස් වොෂ් එක යොදා මුහුණ සෝදා පිරිසුදු කිරීම (Double Cleansing) මඟින් රසායනික ද්රව්යවල ඉතිරි කොටස් සම්පූර්ණයෙන්ම ඉවත් වේ. අවසාන වශයෙන්, සරල මේකප් එකක සැබෑ සුන්දරත්වය රඳා පවතින්නේ ඔබේ සමේ නීරෝගිභාවය මත බැවින්, හොඳින් ජලය පානය කර සම ඇතුළතින් පෝෂණය කරන අතරම, ප්රමිතියෙන් යුත් රූපලාවණ්ය නිෂ්පාදන පමණක් තෝරා ගැනීමටත්, නියමිත පියවර අනුගමනය කරමින් පිරිසුදු කිරීම් සිදු කිරීමටත් වගබලා ගත යුතුය.
TEXT – ගවේශා ලොකුසූරිය
