හැමදාමත් වගේ මෙවරත් සිංහල අලුත් අවුරුදු උත්සවයට සමගාමීව ජාතික රූපවාහිනිය සංවිධානය කරනු ලබන ‘රූ කිරුළ 2024‘ පළමු වටයේ තරගය පසුගියදා ජාතික රූපවාහිනි පරිශ්‍රයේදී පැවැත්වුණි. මුද්‍රිත මාධ්‍ය අනුග්‍රහය තරුණී ලබාදෙන මෙම තරගාවලියේ අයදුම්පත් දහස් ගණනක් අතරින් අවසන් වටයට කුමර කුමරියන් 24 දෙනකු තෝරාගෙන අවසන්ය.

 

ප්‍රවීණ පුහුණුකරුවන් මඟින් පවත්වනු ලබන පුහුණු වැඩමුළු කීපයක් යටතේ පුහුණුවන එම කුමර කුමරියන් 24 දෙනා අප්‍රේල් මස 14 විකාශය වන සජීවි අවසන් මහා තරගය සඳහා  ඉදිරිපත් කෙරේ. 

අවසන් මහා තරගය අප්‍රේල් මස 14 දින සවස 5.30ට සිට ජාතික රූපවාහිනී තෙවැනි මැදිරියේ සිට සජීවිව විකාශය වේ. ප්‍රථම, දෙවැනි සහ තෙවැනි ස්ථාන හිමිකර ගන්නා තරගකරුවන් සහ තරගකාරිනියන් වෙත මුදල් සහ වටිනා ත්‍යාග ද පිරිනැමේ. මොවුන්ට අමතරව සෙසු තරගකරුවන් තරගාකාරිනියන් අතරින් මිනි පැජන්ට් අවස්ථාවන් සඳහා ද සැනසිලි තෑගි පිරිනැමේ. 

මූලික තරග වටයේ විනිශ්චය මණ්ඩලය ලෙස නර්තනචාර්ය චන්න විජේවර්ධන, නිරූපණ නිර්මාණ අධ්‍යක්ෂ රොසෑන් ඩයස්, රංගන ශිල්පී ධනංජය සිරිවර්ධන, රංගන ශිල්පිනී උදාරි පෙරේරා සහ රූපලවණ්‍ය ශිල්පිනී නදීශා ද සිල්වා යන මහත්ම මහත්මින් සහභාගී විය. රූ කිරුළ 2024 නිර්මාණ අධ්‍යක්ෂණය පැතුම් සසංකය. අධීක්ෂණය සුමේධ අතුලසිරි සහ රංග ප්‍රේමරත්නය. 

 

 

 

 

 

 

 

ඡායාරූප - නිශ්ශංක විජේරත්න