ව්‍යායාම්වල නිරත විය යුත්තේ තරබාරු පුද්ගලයන් පමණක් යැයි මිථ්‍යා මතයක් තිබෙනවා. ඇත්තෙන්ම ව්‍යායාම් කිරීමෙන් ඕනෑම පුද්ගලයකුට බොහෝ ප්‍රයෝජන අත්කර ගත හැකියි. වර්තමානයේ බොහෝ දෙනෙක් නියැළෙන්නේ කය වෙහෙසීමට සිදු වන රැකියාවල නෙවෙයි.

ව්‍යායාම් කිරීමේදී බර ව්‍යායාම් කිරීමම අත්‍යවශ්‍යයි කියලා දෙයක් නැහැ. සමහර පුද්ගලයන්ට ඇති රෝගී තත්ත්වයන් සමඟ බර ව්‍යායාම්වල සහ දැඩි වෙහෙසක් දැරීමට සිදු වන ව්‍යායාමවල නිරත වීමට හැකියාවක් නැහැ. අවශ්‍ය ප්‍රමාණයට වඩා ව්‍යායාම්වල නිරත වීමෙන් මාංශ පේශිවලට හානිවීම හා වෙනත් අතුරු අාබාධවලට ලක්විය හැකියි. රිද්මයානුකූල සංගීතයකට අනුව සෙමින් නර්තනයේ යෙදීම, තරප්පු පෙළවල් නැඟීම හා බැසීම, සෙමින් ඇවිදීම වැනි දේත් පහසු ව්‍යායාම් ගණයට අයත් වෙනවා. අලුතින් ව්‍යායාම් කිරීමට පටන් ගන්නා පුද්ගලයකු කළ යුත්තේ මුලින් පහසු ව්‍යායාම්වල නිරත වී, පසුව සෙමින් වෙහෙස වීමට සිදු වන ව්‍යායාම්වලට මාරු වීමයි.

ආරම්භකයකු මුලදී ව්‍යායාම් කිරීම විනාඩි කිහිපයකට සීමා කළාට කමක් නැහැ. ඉන්පසු විනාඩි 30ක් දක්වා ක්‍රමක්‍රමයෙන් වැඩි කරන්න.

කාර්යබහුල පුද්ගලයකුට එක දිගට ව්‍යායාම්වල නිරත වෙන්න වෙලාවක් නැති වෙන්න පුළුවන්. ඒ ගැන දුක් වෙන්න අවශ්‍ය නැහැ. ඔබට පුළුවන් දවස පුරාම කෙටි කාල සීමාවන්වල ව්‍යායාම්වල යෙදෙන්න. වැදගත් වන්නේ ව්‍යායාම් නිතිපතා සිදු කිරීමයි. ඔබේ ව්‍යායාම් රටාව දිනපතා අනුගමනය කිරීම වැදගත් වන අතර, එම රටාව බිඳීමෙන් වළකින්න.  

ව්‍යායාම්වල නිරත වීමෙන් මානසික පීඩාව දුරු කර ගන්න පුළුවන් වගේම මොළයේ හෝමෝනවල ක්‍රියාකාරීත්වය යහපත් අතට හරවා ගන්නත් පුළුවන්. මේ නිසා ව්‍යායාම් කිරීමෙන් පසු මානසික සුවයක් දැනෙන බව ඔබට වැටහේවි. 

 මතක ශක්තිය වර්ධනය වන නිසා අධ්‍යාපනය ලබන දරුවන්ටත් ව්‍යායාම් කිරීම ඉතා වැදගත්.  ව්‍යායාම් කිරීමේදී සිරුරේ ඇති විස ද්‍රව්‍ය දහදිය සමඟ පිට වේ. එමෙන්ම අල්සයිමර් රෝග අවදානම පහ වේ. අස්ථිවල ශක්තිමත් බව ඉහළ යන අතර, සන්ධි ක්‍රියාකාරීත්වය පහසු වේ. එමඟින් ඔස්ටියෝපොරෝසිස් අවදානම පහ වේ. නව ස්නායු වර්ධනය සහ පවතින ස්නායු සෛලවල වර්ධනය හා ආයු කාලය වැඩි වේ.

ඔබේ සිරුරේ ඇති අමතර මේදය ඉවත් කර ගැනීමට ව්‍යායාම් උපකාරී වන නිසා එමඟින් තරබාරුව නැති කරගෙන උසට සරිලන බරක් ඇති කර ගැනීමට හැකියාව ලැබෙනවා. ව්‍යායාම් කිරීමෙන් හෘද රෝග අවදානම පහ කරයි.

එමෙන්ම සිරුරට උරා ගන්නා ඔක්සිජන් ප්‍රමාණය වර්ධනය වෙයි. තවද මාංශ පේශී ශක්තිමත් කර ගැනීමට අවස්ථාව සලසා දෙයි. දියවැඩියා අවදානම අඩු කරයි. පිළිකා අවදානම ද පහවෙයි.

ව්‍යායාම් සාර්ථකත්වයේ තවත් ප්‍රධාන අංගයක් වන්නේ එය ඔබේ දිනචර්යාවට ඇතුළත් කර ගැනීමයි. ව්‍යායාමයක් පුරුද්දක් කර ගෙන එය නිතිපතා කරන්නේ නම් දිගුකාලීන ප්‍රතිලාභ පහසුවෙන් ළඟා කරගත හැකි වේ.

 ව්‍යායාම් කිරීමේදී සිරුර විජලනයකට ලක් වීම වළක්වා ගත යුතුයි. ඒ සඳහා දහඩිය මඟින් පිට වන ජල ප්‍රමාණයට සරිලන ජලය ප්‍රමාණයක් පානය කළ යුතු වෙනවා. නැතිනම් ව්‍යායාම් කිරීමේදී ක්ලාන්තය ඇති වීම, මස් පිඬු පෙරලීම වැනි ගැටලු ඇති විය හැකියි.

උපදෙස් -

ශරීර යෝග්‍යතා උපදේශිකා

මෙත්මා බිසේකා නානායක්කාර