මගේ ජීවිතය පිළිබඳව කිසිවක් සඟවා තබන්නට මට වුවමනා වූයේ ද නැත. ඉහළ උසාවියේ සාක්ෂි අසුනේ සිටි මවෙතින් ජොයෙල් සීගල් විමසූ ප්‍රශ්නවලට මම විවෘතව පිළිතුරු දුන්නෙමි. මගේ දික්කසාදය සහ අලුත් විවාහය ගැන ඔහු ප්‍රශ්න මාලාවක්ම ඇසුවේය.

අවුරුදු දහ හතරක් පුරා ගලා ගිය මා සහ රික් අතර විවාහ දිවියෙන් පසු දැන් ඔහු ගෙවන ජීවිතය පිළිබඳව ද මම විස්තර කළෙමි. රික් මගේ පවුල තුළ දැනටමත් සමීප මිත්‍රයකු බවද ඔහු මගේ වැඩිමහල් දරුවන්ගේ පියා බවද දැන් ඔහු ෆ්ලෝරිඩා හි ජීවත් වන්නේ මගේ සහෝදරයකු සමඟ බවද මම පැහැදිලි කළෙමි. එපමණක් නොව ඔහු ඉඳහිට දිනෙක අප නිවෙසේ රාත්‍රිය ගත කරන්නට පැමිණෙන බව ද මම එහිදී පැවසුවෙමි. එවැනි දිනවල ඩීන් සහ රික් එක්ව ක්‍රිකට් ක්‍රීඩාවෙහි නියැළෙන අයුරු සහ කිසිදු අමනාපයෙන් තොරව හොඳ මිතුරන් ලෙස ඔවුන් දෙදෙනා කල් ගෙවන ආකාරය ද මම ඔවුනට හෙළි කළෙමි.

"ඔවුන් දෙදෙනා එකිනෙකා අතර ඊර්ෂ්‍යාවක් වැනි හැඟීමක් හෝ තිබුණේ නැති වගද ඔබ කියන්නේ?"

"නැහැ. එහෙම හැඟීමක් දෙදෙනාගේම සිත් තුළ තිබුණේ නැහැ."

මා කීවේ කැසිඩ් සමාගමෙන් පත් කෙරුණු නීතිඥ බොබ් රගරි දෙස බලාගෙනමය. ඔහු මදෙස බලා හිනැහුණේ මා අනුමත කරන්නා සේය.

"මෙලිස්සා සමඟ ඔබට ගත කරන්නට ඉඩ ලැබෙන කාලය කොහොමද?" සීගල් විමසුවේය.

"ඒ කාලය හොඳටම මදි. මම ඇයට ගොඩක් ආදරෙයි. ඇයත් මට ඒ වගේම ආදරෙයි. අපි දෙන්නා අතරේ පවතින්නේ ඉතා සුවිශේෂී බැඳීමක්."

සරා හට මා ආයා කෙනකු පමණක් බව ඉන් පෙර දිනයේදී ස්ටර්න් යුවළ සඳහන් කළහ. එහෙත් එය සම්පූර්ණ අසත්‍යයකි.

මම උසාවිය ඉදිරියේදී ඒ පිළිබඳව විස්තර කළෙමි.

"සාරා මා සමඟ ගත කරන කාලය තුළ ඇය හැසිරෙන ආකාරය ඔබ දකිනවා නම් කොපමණ අගේ ද? ඇය මා දුටු විගස ආදරයෙන් වැලඳ ගන්නවා. ඉන්පසුව විනාඩි පහක් පමණ කාලයක් එක දිගට මා සිප වැලඳ ගනිමින් ආදරය දක්වනවා. ඒ වගේම මා සමුගෙන එද්දී ඇය හඬා වැලපෙනවා."

අනතුරුව ජොයෙල් සීගල් මා වෙත ප්‍රශ්න කිහිපයක්ම යොමු කළේය. ඒ දැරියගේ නම සම්බන්ධයෙනි.

"ඔබ දැරියට 'සාරා' යැයි ආමන්ත්‍රණය කිරීම ස්ටර්න්ලා ප්‍රතික්ෂේප කරනවා නෙවේ ද?"

"ඔව්. මම පුරුදු වෙලා ඉන්නෙ ඇයට සාරා ලෙස අමතන්නට. ඒ ඇගේ උප්පැන්න සහතිකයේ තිබෙන නම. ඒ වගේම ඇගේ බැප්ටිස් නාමයත් සාරා. කොහොම නමුත් අප තනිව ඉන්නා විට මම ඇයට සාරා කියන්නේ ඉතා අඩුවෙන්. නම කෙසේ වෙතත් ඇය මගේ දියණිය නොවේ ද?"

බිල් ස්ටර්න් කියන්නේ මගේ දියණිය සාරාගේ පියා නොහොත් ශුක්‍රාණු දායකයා. ඒ වෙනුවෙන් මම ඔහුට ස්තූතිවන්ත වෙනවා. මා දරුවා කුස දරාගෙන හිඳි දස මාසයේදී සහ දරු උපතින් පසුවත් එලෙසමයි මට දැනී ගියේ. ඉහළ උසාවිය ඔහු හැඳින් වූයේත් ශුක්‍රාණු දායකයා හැටියටයි. නමුත් මා සාරාට කතා කරන හැම අවස්ථාවකදීම බිල් ගැන භාවිත කළේ "ඩැඩී" කියන වචනය."

"දරුවාගේ අයිතිය ඔබට නොලැබී ගොස් දරුවා දැකීමේ අයිතිය පමණක් හිමි වුණොත්?"

මට යොමු වූ ඊළඟ ප්‍රශ්නය එවැන්නකි.

"දරුවා අයිති කර ගැනීමේ හීනය දැන් මගේ හිතෙන් ගිලිහී ගිහින්. මට වුවමනා දරුවාට ආදරය දක්වන්නටයි. ඇය සතුටින් තැබීමටයි. ඇගේ අම්මා වෙන්නටයි. ස්ටර්න් යුවළ පරාජය කිරීමේ අවශ්‍යතාවයක් මට නැහැ. එයින් පීඩාවට පත්වන්නේ සාරාමයි."

"මේරි බෙත්, දරුවා ළඟ නොමැති මේ හිස් තැන ගැන ඔබට මොනවද හිතෙන්නේ?"

"ජීවිතේ බොහොම කෙටියි. මමත් මගේ දරුවන් වන ටියුස්ඩේත්, රයනුත් සාරාගෙන් සම්පූර්ණයෙන්ම දුරස්වයාමේ ඉඩකඩ පවතිනවා. ඒ තත්ත්වය ස්ටර්න් පවුලට සුබදායක වේ යැයි මා හිතන්නේ නැහැ."

"ස්ටර්න් පවුල විදේශයකට සංක්‍රමණය වෙනවා නම් ඔබ ඔවුන් හා එක් වීමට කැමැති ද?"

"මගේ දියණිය දකින්නට මට ඕනෑම කැප කිරීමක් කළ හැකියි."

"මේ නඩු හබවල නිමාවක් දකින්නට ඔබ තුළ කැමැත්තක් පවතිනවා ද?"

"ඔව්. මම හැමදාමත් යාඥා කරන්නේ ඒ වෙනුවෙන්."

සැබවින්ම මා සෑම මොහොතකම ප්‍රාර්ථනා කළේ මේ නඩුවේ නිමාවක් දැකීමයි.

"සාරා බලන්නට ආ වෙලාවට මේරි බෙත් මට කතා කළේ 'ඌඩී-බොප්' කියන සුරතල් නාමයෙන්. ඒ අවස්ථාවලදී එතැන ආරක්ෂක නිලධාරිනිය ලෙස කටයුතු කළේ මමයි."

ජූලියා විගින්ස් සාක්ෂි දෙමින් එසේ පැවසුවාය. මැදිවියෙහි සිටි ඇය කළු පැහැයට හුරු තරබාරු සිරුරක් සහිත ගැහැනියකි. ඒ ඇසූ විනිසුරු ස්වීන් මඳ, උණුසුම් සිනහවක් පා අනතුරුව ප්‍රමුදිත සිනාවක් පෑයේය.

"එතකොට දැරිය මේරි බෙත් ආමන්ත්‍රණය කළේ කොහොමද?"

ගැරී ස්කොලොෆ්ගේ සහාය නීතිවේදියා ෆ්‍රෑන්ක් ඩොනේ ඇය වෙත ප්‍රශ්නයක් නැඟුවේය.

"මමා" කියලා.

විගින්ස් මහත්මිය පිළිතුරු දුන්නේ හැඟීම් විරහිත ගැහැනියක සේය.

උසාවිය තුළ සියුම් කැළඹීමක් ඇති වූයේ එය සියලුම දෙනාට අලුත් ආරංචියක් වූ හෙයිනි.

"දැරිය මේරි බෙත්ට හාදු දුන්නා ද?"

ඩොනේ නැවතත් ප්‍රශ්නයක් විමසුවේය.

"ඔව්"

විගින්ස් මහත්මිය හිස වනා එය අනුමත කරමින් පැවසුවාය.

"මේරි බෙත් සාරාට හාදු දුන්නා ද?"

ඔහු විමසුවේ බරපතළ අපරාධයක සුල මුල සොයාගන්නට ප්‍රශ්න කරන ආකාරයෙනි.

"ඔව්" ඇගේ පිළිතුර තුළ අමනාපය කැටිව තිබිණ.

"එය සාමාන්‍ය මවක් සහ දරුවෙක් අතර සිදුවන යමක් විතරයි."

ජොයෙල් සීගල් සටහන් පොතක් ගෙන හැර දක්වමින් එහි පිටු පෙරළමින් මෙසේ කීවේය.

"මෙහි ඔබ තබා තිබෙන සටහන් අනුව මේ රාජකාරිය බාරගෙන තිබෙන්නේ 1986 ඔක්තෝබර් මාසයේදී. විසි අට වතාවක් ඔබ එම ස්ථානයේ ආරක්ෂාව වෙනුවෙන් පෙනී සිටියා. නමුත් විගින්ස් මහත්මිය, ඔබ සෑම දිනකම තබා ඇත්තේ එකම සටහනක්.

කටයුතු හොඳින් සිදු විය හෝ 'කටයුතු ඉතා හොඳින් සිදු විය' යනුවෙන් එපමණයි.

'විගින්ස් මහත්මිය එහි අර්ථය වඩාත් හොඳින් පැහැදිලි කරන්න.'

'එහි තේරුම ගැටලුවක් හට නොගත් බවයි. වයිට්හෙඩ් මහත්මිය සහ දැරිය ඉතා හොඳ සබඳතාවක් සහිතව කටයුතු කළා. මව දැරියට ආදරය දැක්වූවා වගේම දැරිය මවටත් ආදරය කළා. මම කලින් පැවසූ විදියටම ඔවුන් දෙදෙනා අතර තිබුණේ සාමාන්‍ය මවක් හා දරුවෙක් අතර පවතින ආදරයක්, ඥාති සම්බන්ධතාවයක්.

මීළඟ දිගහැරැම ලබන සතියේ

පරිවර්තනය -  සුනිලා විජේසිංහ