පුංචි කිරිකැටියෙක් පිළිබඳ සිහිනය ඈතින් ඈතට යද්දී දෙව්දුනීට ඇති වුණේ පුදුමාකාර දුකක්. ඒ දුක බෙදාගන්න සංදීප් ඈ අසලින් ම සිටියත්, මේ ආත්මෙ දි දරු ගැබක් කුස දරා ඉන්න, කිරි දරුවකුගේ කිරි සිනහව බලන්න තරම් පිනක් නැතුව ඇතියි කියලයි ඔවුන් සිතූයේ.

දෙව්දුනි රැකියාවට නොගිහින් නිවෙසේ රැඳුණු දවසක අහම්බයෙන් වගේ පවුල් සෞඛ්‍ය නිලධාරිතුමිය ඇගේ නිවෙසටත් ගොඩවැදියා. විවාහ වෙලා වසර තුනකට ආසන්න වෙලත් ඈට කිරි සිහිනය සැබෑ කරගන්න බැරි වුණා. පවුල් සෞඛ්‍ය නිලධාරිතුමියගේ යෝජනාවට අනුව ඇය ප්‍රදේශයේ මඳසරු බව පිළිබඳ සායනයට සහභාගිවීමට තීරණය කළා. එහිදී IUI ප්‍රතිකාරය කිරීමටයි වෛද්‍යතුමා නිර්දේශ කළේ.

ලෝක සෞඛ්‍ය සංවිධානයට අනුව මඳසරුභාවය යනු රෝගයක් නොවේ. එය ස්වභාවිකව ගැබ් ගැනීමට ඇති නොහැකියාව පමණි.

කාන්තාවගේ ඩිම්බ කෝෂවලින් ඩිම්බයක් පිටවන්නේ ද, කාන්තාවට ගර්භාෂය, පැලෝපීය නාළය ආශ්‍රිතව වෙනත් සංකූලතා තිබේද? යන්න පිළිබඳ සොයා බැලීම එක් පියවරකි.

බොහෝ පිරිසකට සරුකාලය පිළිබඳව පවා නිසි අවබෝධයක් නොමැති තරම්ය. දින 28 ඔසප් වීමේ චක්‍රය තුළ ඔසප් වීම ඇරඹෙන පළමු දිනයේ සිට දින 12 -16 ත් අතර කාලය සරු කාලයයි. මේ කාලය තුළදී ඩිම්බ කෝෂයෙන් ඩිම්බයක් පිටවී පැලෝපීය නාළය වෙත පැමිණෙයි. මෙහිදී සැමියා සමඟ එක්වීමෙන් ගැබ් ගැනීමක් විය හැකියි. මේ සාමාන්‍ය ක්‍රමයයි.

IUI ප්‍රතිකාරය වෙත යද්දී එම කාන්තාවගේ ඩිම්බ කෝෂයේ ඩිම්බයක් පරිණතව ඇත්දැයි දැනගත යුතුයි. එයට ඔසප් වී 12 වන දිනයේ දී උදෑසන ස්කෑන් පරීක්ෂණයක් සිදු කෙරේ. එම ස්කෑන් පරීක්ෂණයෙන් පෙනෙන්නේ (Follical) සියුනිකාවකි. සාමාන්‍ය ව්‍යවහාරයේ දී සියුනිකාවක් යන්න නොතේරේ. පොදු ව්‍යවහාරයේ දී මෙය දකිනුයේ ඩිම්බයක් ලෙසයි. ස්කෑන් පරීක්ෂණයෙන් දකින සියුනිකාව මිලිමීටර් 18 -20 අතරට ආ විට අනුමාන කරනුයේ ඒ තුළ පරිණත ඩිම්බයක් ඇතැයි කියාය.

ඉන්පසු එදිනම රාත්‍රියේ HCG එන්නත ලබා දේ. එම එන්නතින් කරනුයේ ඩිම්බය අවසාන පරිණත කිරීම සහ ඩිම්බ මෝචනයයි. එනම් ඩිම්බ කෝෂයෙන් ඩිම්බය පිටතට ඒමයි. එන්නත ලබාදී පැය 24 -36 කාලය තුළදී එය සිදුවේ. ඔසප් වීම සිදුවී 14 වන දින නැවත ස්කෑන් පරීක්ෂාවක් සිදු කර බලන්නේ එම සියුනිකාව හැකිළී තිබේ ද යන්නයි. හැකිලී තිබීම යනු ඩිම්බය මෝචනය වී තිබීමයි. බොහෝ දෙනෙක් මේ ස්කෑන් පරීක්ෂණය සිදු නොකරයි. මේ ස්කෑන් පරීක්ෂණයේ දී සමහර කාන්තාවන්ගේ සියුනිකාව හැකිලී ඇති ලෙසත් තවත් සමහර කාන්තාවගේ නොහැකිළී ඇති ලෙසත් දිස් වේ. එදිනම පැය 2න් 2ට තවත් ස්කෑන් පරීක්ෂණ කිහිපයක්ම සිදු කරයි. මෙසේ කරනුයේ සියුනිකාව හැකිළී ඇත්දැයි බැලීමටයි. සියුනිකාව හැකිළී ඇත්නම් පමණක් සැමියාගේ ශුක්‍රාණු IUI ප්‍රතිකර්මය සඳහා ලබා දීම සිදුවේ.

මෙම ශුක්‍රාණු ඇත්තේ තරලයකයි. එයින් තරලය ඉවත් කොට ශුක්‍ර ධාතු පමණක් වෙන් කර ගනියි. ඝණත්ව අනුක්‍රමණ ක්‍රමයක් ඔස්සේ මෙය සිදු කෙරේ. විවිධ විකෘතිතා ඇති, මැරුණු, ප්‍රමාණයෙන් විශාල ශුක්‍රාණු ඉවත් වී සචල, සඵල ශුක්‍රාණු පමණක් පරීක්ෂණ නාළය පතුලේ තැන්පත් වේ. මේවා IUI කැතීටරයක් ඔස්සේ කාන්තාවගේ ගර්භාෂයේ තැන්පත් කෙරේ.

ශුක්‍රාණු ලබා දුන් විගස එය උකු ගතියෙන් වැඩියි. එය පැය 1/2ක් විනාඩි 45ක් පමණ ද්‍රාවණ තත්ත්වයට පත්වන තුරු කාමර උෂ්ණත්වයේ තැබිය යුතුයි. ඉන්පසුවයි ඝණත්ව අනුක්‍රමණ ක්‍රමය ඔස්සේ වෙන් කිරීම සිදුවන්නේ.

පරිණත වූ ඩිම්බය මෝචනය වීමට දුන් එන්නතත් සමඟින් සියුනිකාව ඩිම්බ කෝෂයෙන් පිටතට පැමිණේ. පැලෝපීය නාළයේ කොනේ ඇති අංගුලිකා (ඇඟිලි මෙන්) වල මේ ඩිම්බය තිබේ. කැතීටරය ඔස්සේ වෙන් කරගත් ශූක්‍රාණු ටික මුදා හරින්නේ ගර්භාෂයට යි. මේවා පිහිනා ගෙන පැලෝපීය නාළය වෙතට ගමන් කරයි. ඒවා ඩිම්බය වටා ශුක්‍රාණු 80000ක් 90000ක් එකතු වී එක් ශුක්‍රාණුවක් ඩිම්බය වෙතට යයි.

නිවැරැදි කාලයේ දී, නිවැරැදි වෙලාවේදී තැන්පත් වීමෙන් මෙය ඉතාම සාර්ථකව ප්‍රතිඵල නෙළාගත හැකි අවස්ථාවකි.

සැමියා සමඟ එක් වීමෙන් ස්වභාවිකව ගැබ් නොගන්නා අයට ඇති පළමු ප්‍රතිකර්මය වන්නේ මේ IUI ප්‍රතිකර්මයයි.

ගර්භාෂයේ යුක්තාණුවක් අධිරෝපණය වීම පිළිසිඳ ගැනීමයි. IUI ප්‍රතිකර්මය පළමුවර සාර්ථක නොවූයේ නම් තවත් කිහිපවාරයක් කළ හැකි වේ.

IUI ඔස්සේ කිරි සිහිනය ජයගත් මාපියවරුන් ඕනෑතරම් සිටියි. නවීන තාක්ෂණය ඔවුන්ගේ සිතැඟි ඉටු කිරීමට උතුම්ම පදවිය වූ මව්පිය පදවිය ලබන්නට වරම් ලබා දේ.

IUI පිළිබඳ තවත් විස්තර ඉදිරි සතියකදී

උපදෙස්

කලල විද්‍යා වෛද්‍ය

මධාර රැලපනාව