අද තියෙන කාර්යබහුලත්වයත් එක්ක තමන්ගේ නීරෝගිබව ගැන හිතන්නවත් වෙලාවක් නැති තරම්. ලෙඩ වෙලා බෙහෙත් ගන්නවට වඩා ලෙඩක් ඇති වෙන්න කලින්ම එයින් බේරන්න ක්‍රමයක් තියෙනවනම් කෙතරම් දෙයක්ද. ව්‍යායාම කියන්නෙත් ඒ විදිහේ ක්‍රමයක්. හැබැයි ව්‍යායාම මඟින් නීරෝගි වෙනවා විතරක් නෙවෙයි හැඩැති රූ සපුවකටත් හිමිකම් කියන්න අවස්ථාව ලැබෙනවා.

plank කියන්නේ ඕනෑම කාන්තාවකට පහසුවෙන්ම කළ හැකි ව්‍යායාමයක්. ඕනෑම තැනක කළ හැකි උපකරණ රහිත ව්‍යායාමයක් කියලත් කියන්න පුළුවන්. මෙම ව්‍යායාමය හරහා ශරීරයට හැඩයක් එක් කරනවා පමණක්ම නොවෙයි, ශක්තිය සහ දරාගැනීමේ හැකියාව ද වැඩි දියුණු කරයි. එමෙන්ම හෘද වාහිනී යෝග්‍යතාව ඉහළ නංවයි.

එමෙන්ම ශරීරයේ අනවශ්‍ය කැලරි විනාශවන ව්‍යායාමයක් නිසා ශරීරයේ බර පාලනය කරගන්නත් හැකියාව ලැබෙනවා. ඉතින් අනවශ්‍ය මේදය දහනය කරගන්න කාන්තාවකට වඩාත් සුදුසු ව්‍යායාමයක් විදිහට මෙය හඳුන්වන්න පුළුවන්. ඒ වගේම මෙමඟින් අත් කකුල් සහ පිටුපස ප්‍රදේශයට ද ව්‍යායාමක් ලැබෙන නිසා මාංශපේශීන්වල ශක්තිමත් භාවයට ද හේතුවක් වනවා.

මෙමඟින් කොඳු ඇටපෙළට ද ව්‍යායාමයක් ලැබෙන නිසා ශරීරයේ කාර්යක්ෂමතාව වැඩි දියුණු කිරීමට ද එය උපකාරී වේ. උකුලේ නම්‍යශීලිභාවයට ද මෙම ව්‍යායාමය සුදුසු ය.

දැන් මෙය අරඹමු. පළමුව පළමු රූපයේ පරිදි මුහුණ පොළොව දෙසට සිටින සේ බිම වැතිරි අත් දෙකට බර දී පිටුපස ප්‍රදේශයෙන් ඉස්සී ඉදිරිය බලන්න. එවිට පාදවල අඟිලි තුඩු පොළවට සම්බන්ධව තිබිය යුතුය. දැන් දෙවැනි රූපයේ ආකාරයර වම් පාදය එලෙසම තබාගෙන දකුණු කකුල මදක් නවා ඉදිරියට ගෙන එන්න. මෙලෙස පාද දෙක මාරු කරමින් මේ ව්‍යායාමය කරන්න. මෙම ව්‍යායාමය අත් සහ පාද භාවිත කරමින් කන්දක් තරණය කරන ආකාරයකට සමාන ව්‍යායාමයකි.

මෙම ව්‍යායාමය පළමු දින කිහිපයේදී වාර 20 - 30 කින් ආරම්භ කරන්න. එලෙස දිනකට සෙට් 3ක් පමණ කිරීම ප්‍රමාණවත්. ඉන්පසු එය ක්‍රමයෙන් 50 දක්වා වර්ධනය කරගන්න. අවම වශයෙන් එක දිගට විනාඩි 10ක් පමණවත් මෙම ව්‍යායාමය කිරීමෙන් වඩාත් හොඳ ප්‍රතිඵල ලබා ගත හැකිය.

ඒ වගේම මේ ව්‍යායාමය දවසේ ඕනෑම වෙලාවක කළ හැකිය. නමුත් ආහාර ගත් විගස මෙය කිරීමෙන් වළකින්න.
හෘද රෝග, අධික ලෙස අස්ථි දුර්වලතා සහිත අය මේ ව්‍යායාම ප්‍රගුණ කරනවා නම් වෛද්‍ය උපදෙස් පැතීම වඩාත් සුදුසුයි. ඒ වගේම ගර්භිණී කාන්තාවන් සඳහා මෙය සුදුසු නොවේ.


උපදෙස් -
ශරීර යෝග්‍යතා උපදේශිකා
මෙත්මා බිසේකා නානායක්කාර
 

ඡායාරූප - ශාන් රඹුක්වැල්ල
නිරූපණය - කාංචනා
 

[email protected]