මැං‍ෙගා් ඩබල් ලේයර් ගැටෝ

අඹ වාරෙට ගස් යට වැටිලා ඉදිලා යන අඹ ඕනෙතරම්. ගොඩක් හැදුනම කන්නත් බැහැ. අහල පහළ අයට දුන්නත් තවත් ඉතිරි වෙනවා. ඒ වගේ වෙලාවට අඹ යොදාගෙන රසවත් කෑමක් හදන්න පුළුවන් නම් ඔයාගෙ දරුපැටව් වගේම ආදරණීය සැමියත් ගොඩක් කැමැති වේවි.

 

අවශ්‍ය ද්‍රව්‍ය

 

සීනි ග්‍රෑම් 400ක්

බිත්තර 8ක්

පිටි ග්‍රෑම් 400ක්

බේකිං පවුඩර් තේ හැඳි 4ක්

කෝන්පිටි මේස හැඳි 2ක්

ලුණු ස්වල්පයක්

බටර් ග්‍රෑම් 400ක්

යෝගට් කප් 2ක් (අඹ රස වැඩිකර ගැනීමට යෝගට් අඩුකර අඹ එකතු කරන්න)

අඹ පියුරි මේස හැඳි 4ක් (අඹ පොඩිකර පෙනේරයකින් උකුවට හදාගත් මිශ්‍රණය)

වැනිලා තේ හැඳි 2 ක් (අවශ්‍ය නම් පමණක්)

 

සාදන ආකාරය

පළමුව සීනි කොටසක් වෙන්කර ගන්න. ඉන්පසු බිත්තර සුදුමද වෙන්කර ගෙන එය හොඳින් ගසා එයට ඉහත

වෙන්කරගත් සිනි කොටස ද එකතුකර ගසන්න. දැන් බටර් සහ බිත්තර කහමද එක බැගින් දමමින් ඉතිරි සීනි සමඟ ගසා ගන්න. එයට වැනිලා තේ හැඳි 2ක් එකතු කරන්න. පසුව පිටි, බේකිං පවුඩර්, කෝන් පිටි සහ ලුණු ස්වල්පය එකට දමා හලා ගන්න. එය බිත්තර සුදුමද සහිත බඳුනට දමා පෙරලා ගන්න. යෝගට් සහ අඹ පියුරි ද එකතු කරන්න. ඉන්පසු විෂ්කම්භය

අඟල් 8කින් යුත් තැටි තුනකට මේ මිශ්‍රණය දමා පුලුස්සා ගන්න. පසුව කේක් තුන නිවෙන්නට දමන්න.

 

මොක් ක්‍රීම් සාදා

ගැනීම

බටර් ග්‍රෑම් 225ක්

අයිසිං සීනි ග්‍රෑම් 100ක්

අඹ යුෂ කෝප්ප 1/4ක්

යෝගට් කප් එකක්

දැන් මේ සියල්ල එක බඳුනකට දමා බීට් කරන්න. පසුව කෝන් පිටි මේස හැඳි හයක් කිරි මිලිලීටර් 500කට දමා මිශ්‍රකර මඳ ගින්නේ උකුවනතුරු ළිපේ තබා හැඳිගාන්න.

පසුව එය නිවෙන්නට තබා බඳුන තෙත රෙද්දකින් වසා ශීතකරණයේ පැය භාගයක් තබන්න.

ඉන්පසු ඉවතට ගෙන අයිසිං මිශ්‍රණය සමඟ එකතු කරන්න. බිත්තර සුදුමද දෙකක් ද හොඳින් ගසා එයට එකතු කරන්න.

අඹ ගෙඩියක් කුඩාවට කපා එම කැබලිවලට සීනි මේස හැඳි පහක් ද වතුර මේස හැඳි හතරක් ද දමා උණුකර ස්වල්ප වේලාවක් ස්ටූ කරගන්න.

දැන් කලින් සාදාගත් කේක් තුන ගෙන එහි එක් කේක් එකක් මත ගෑරුප්පුවකින් ඇන එයට අඹ ස්ටු දියරය වත්කර ගන්න. උඩින් පොඩිකරගත් අඹ කැබලි කීපයක් තබන්න. එයට උඩින් ක්‍රීම් මිශ්‍රණය දමන්න. දැන් දෙවැනි කේක් එක ඒ

මත තබා එයට උඩින් ද අඹ දියරය, අඹ කැබලි සහ ක්‍රීම් එක දමන්න. උඩින් අනෙක් කේක් එක තබන්න. එයට උඩින් ද ඉහත මිශ්‍රණය දමන්න. කේක් එක උඩට සහ වටේට ක්‍රීම් එක දමා ගන්න. මෙය දිනක් පමණ ශීතකරණයේ තබා ආහාරයට

ගන්න.

 

උපදෙස්

ප්‍රවීණ කේක් නිර්මාණ ශිල්පිනී

ප්‍රදීකා විජේසූරිය

 

----------------------

කන්න කන්න ආශා හිතෙන මාබල් කේක්

කේක් හදන්න බීටරයක් ඕනෙම නෑ. මේ ලස්සන මාබල් කේක් එක සාදා තියෙන්නේ ලී පත්ත උපකාර කරගෙනයි. අපිත් මෙහෙම හදමු.

 

අවශ්‍ය දේවල්

 

බටර් ග්‍රෑම් 300ක්

සීනි ග්‍රෑම් 300ක්

බිත්තර ග්‍රෑම් 300ක් (බිත්තර කිරලා ගන්න)

පිටි ග්‍රෑම් 300ක්

බේකිං පවුඩර් තේ හැඳි දෙකක්

වැනිලා තේ හැඳි දෙකක්

කලරිං තේහැඳි තුනක්

චොකලට් පවුඩර් ස්වල්පයක්

කිරිපිටි හෝ ෆෙරෙෂ් මිල්ක් කෝප්ප බාගයක් (පිටිකිරි නම් මේස හැඳි එකක් උණු වතුරට දමා හදා ගන්න)

 

සාදන ක්‍රමය

 

මුලින්ම බටර් ටික ගෙන දියත් නැති ඝණකමත් නැති ගානට දිය වෙන්න තියන්න.

ඉන්පසුව බෝල් එකකට දමා විනාඩි පහක් පමණ පත්තෙන් මිශ්‍ර කරන්න. දැන් සීනි ටික දමා ආයෙත් මිශ්‍ර කරන්න. එයටම බිත්තර එක එක දමා මිශ්‍ර කරන්න. ඉන්පසු පිටි ටිකට බේකිං පවුඩර් දමා බටර් මිශ්‍රණයට හලා ගන්න. එය ටිකෙන් ටික එකතු කර ගත යුතුයි. පසුව කේක් මිශ්‍රණයේ බුබුළු එනතුරු ලී පත්තෙන් මිශ්‍ර කරන්න. විනාඩි දහයක් පමණ හැඳි ගානවිට මෙසේ බුබුළු නැගීම සිදුවෙයි. කේක් මිශ්‍රණයට වැනිලා දැමීමට පෙර කිරිටික දමා ගන්න. පසුව වැනිලා දමා නැවතත් ලී හැන්දෙන් ටිකක් මිශ්‍ර කරන්න. කලරිං දැමීම සඳහා බෝල් හතරකට කේක් බැටර් එක වෙන් කර ගන්න. දැන් කැමැති වර්ණ හතරක් ගෙන කේක් මිශ්‍රණ සහිත තැටි හතරට බින්දු දෙක දෙක දමා කලවම් කරන්න. ඉන්පසු තෙල් කොළයක් දැමූ කේක් තැටියක් ගෙන කේක් මිශ්‍රණය වර්ණ හතරෙන්ම රවුමට රවුමට ටික ටික තබා උඩට එනතුරු පුරවා ගන්න. අවසානයේ තැටිය දෙපසට සොලවා කේක් මිශ්‍රණය හොඳින් මුලු අතරට බුබුළු යන්න හදන්න. ඉන්පසු සෙල්සියස් අංශ 180න් විනාඩි දහයක් පෙර රත් කරගත් අවන් එකේ විනාඩි තිස්පහක් පමණ බේක් කරගන්න. මේ කාලය අවන් එකෙන් අවන් එකට වෙනස් විය හැකියි. (උඩ යට එලිමන්ට් දෙකම දාන්න)

 

කේක් එකක් සෑදීමේදී ඔබ දැනගත යුතුම කරුණු ටිකක්

කේක් එක මිශ්‍ර කරන විට ලී පත්තෙන් එකම අතට මිශ්‍ර කරන්න. එසේම කේක් එක නිතර ඇරීම නුසුදුසුයි. බටර් දිය වූ පසු කේක් හැදීමත් නොකළ යුතුයි. වැඩි වෙලාවක් කේක් බැටර් එක සාදා එළිමහනේ නොතබන්න. ඉක්මනට බේක් කරන්න. මේ දේවල් නිසා කේක් එක හොඳින් ලස්සන වන්නේ නෑ.

 

 

උපදෙස්

කේක් නිර්මාණ ශිල්පිනී

චාමිනී මහේෂිකා කරුණානායක