බිල් තවදුරටත් කතා කරන්නට විය.

"මම දන්නවා ඇය යුදෙව් ආගමිකයකු විය යුතු නෑ. නමුත් මෙලිස්සා යුදෙව් උරුමය ගැන දැන සිටිය යුතුයි"

"ඔබ ඉදිරියට දැරිය සමඟ ආගමික කටයුතු පවත්වාගෙන යන ආකාරය බිරිය හා සාකච්ඡා කොට තිබෙනවාද?"

විනිසුරු විමසුවේ කාරුණික ස්වරයෙනි.

"අප ඉදිරියට යුනිටරියන් පල්ලිය සමඟ සම්බන්ධ වී කටයුතු කරන්නට තීරණය කළා."

බිල් පැවසුවේ ආයාසයෙනි. ඉතිරිය පවසන්නට පෙර ඔහු වතුර උගුරක් පානය කරනු පෙනිණි.

"නත්තල් රාත්‍රියට අපි නිවෙස සැරසිලිවලින් අලංකාර කරනවා. පාස්කු ඉරිදාට අපි හැමදෙනාම පල්ලියට යනවා"

බිල් ස්ටර්න්ගේ පවුලේ ඥාතීන් යුදෙව් සමූල ඝාතනයේ දී මියගිය අය අතරට එක්වූ බව නඩු විභාගය තුළ දී වරෙක කියැවිණි. උසාවිය මඟින් පත් කළ විශේෂඥයින් විවාද කළේ තම පවුල තුළ අසරණ වීම නිසා කැපකරු මවක යොදා දරුවකු, තනා ගන්නට බිල් කල්පනා කරන්නට ඇති බවය. තම මවගේ මරණය නිසා අහිමිව ගිය ලේ ඥාති සබඳතා ඒ ආශ්‍රයෙන් නැවත ගොඩනංවා ගැනීමට ඔහුට වුවමනා වූවා විය හැකිය.

මාධ්‍යයද නිතර ප්‍රකාශ කරන්නට උත්සාහ ගත්තේ එම යුදෙව් සමූල ඝාතනයේදී මවුපියන් ඝාතනය වෙද්දී බිල් එයින් ආරක්ෂිතව දිවි ගලවා ගත් බවකි. නමුත් සැබැවින්ම බිල් ඉපිද තිබුණේ දෙවැනි ලෝක යුද්ධයට පසුවය. ඔහු හැදී වැඩී තිබුණේ ද අමෙරිකා එක්සත් ජනපදයේ ය.

වෛද්‍ය ග්‍රීන්ගේ වාර්තාවට අනුව බිල්ට වයස අවුරුදු දොළහේ දී ඔහුට බොහෝ සේ ආදරය දැක්වූ පියා මිය ගොස් තිබේ. කෙසේ වෙතත් බිල් සහ ඔහුගේ මව අතර පැවතී ඇත්තේ කිසියම් අර්බුදකාරී සබඳතාවකි. උසස් අධ්‍යාපනය සඳහා මිචිගන් බලා ගිය හේ සිය මව දකින්නට පැමිණ ඇත්තේ වසරකට දෙවතාවක් පමණකි. කෘත්‍රිම සංසේචන ක්‍රමයකින් දරුවකු තනාගැනීමේ කටයුතු ඔහු ආරම්භ කොට ඇත්තේ මවගේ මරණයෙන් මාස 13කට පසුවය.

යුදෙව් නීතියට අනුව දරුවා යුදෙව්වකු වන්නේ ඔහුගේ හෝ ඇයගේ මව යුදෙව්වකු වී නම් පමණකි. බිල් ඒ බව හොඳින් දැන සිටි අයෙකි.

ක්‍රියාකාරී වශයෙන් නොවුවද බිල් යනු ජර්මානු සම්භවය සහිත යුදෙව් ජාතිකයෙකි. ආගම් පිළිබඳ ඔහුගේ වත්මන් උනන්දුව මා තුළ ඇති කළේ විමතියකි. ප්‍රෙස්බිටීරියන් පල්ලියක ආගමික සේවාවන්ට සම්බන්ධ වන්නට පමණක් නොව දියණිය යුනිටරියන් පල්ලියකට සම්බන්ධ කරන්නට ද ඔහු යොමු වී තිබීම සැබවින්ම පුදුමයක් නොවේද? ඒ හැරුණු විට බිල් සහ බෙට්සි යන දෙදෙනාම ප්‍රෙස්බිටීරියන් පූජකවරයකු යටතේ නව මසක් පුරා උපදේශන සායනයකට සහභාගි වී තිබීමද විශේෂත්වයකි.

ඒ සියල්ලට වඩා මා විස්මයට පත් කළ කරුණ වූයේ බිල් විසින් රෙපරමාදු ආගමික කාන්තාවක් තම බිරිය ලෙස තෝරා ගැනීම සහ තම දරුවාගේ මව ලෙස ජර්මානු සම්භවයක් සහිත මා වැනි අයිරිෂ්, කතෝලික මවක තෝරාගැනීමයි.

"එසේ නම් ඔබ බලාපොරොත්තු වෙන්නේ ඔබගේ බිරිය යුදෙව් නිවාඩු දිනවලදී මෙන්ම, කතෝලික නිවාඩු දිනවලදීත් ඔබ සමඟ විවේක සුවයෙන් ගත කරනවා දැකීමයි. එහෙම නේද බිල් ස්ටර්න් මහත්මයා?"

විනිසුරු විමසුවේ බිල්ගේ වේදනාකාරී මුහුණ හදාරමිනි.

"ඔව්" ඒ බිල්ගේ කෙටි පිළිතුර විය.

"මේරි බෙත් කතෝලිකයකු බව ඔබ දන්නවාද? දැරිය පල්ලියට ගෙන යනවාට කාගේ හෝ විරුද්ධත්වයක් තිබේද?"

"අපි හැම කෙනෙක්ම දෙවියන් වහන්සේ කෙරෙහි විශ්වාසය තබා සිටිනවා. අප එය ක්‍රියාවට නංවන්නේ විවිධ ආකාරයට. මෙලිස්සා පල්ලියට ගියාට මගේ මොනයම් හෝ විරුද්ධත්වයක් නෑ."

බිල් පිළිතුරු දෙන අතර උගුරේ රැල් බුරුල් හරිනු ඇසිණි.

දැනටමත් අප දියණියගේ භාරකාරත්වය ඇත්තේ බිල් හටය. නමුත් ක්‍රමයෙන් එය වෙනස් වෙමින් පවතින හැටියක් මට දැනිණි. ඔහු වහා වෙනස්වන පුද්ගලයෙක් නොවේද?

ඕනෑම මොහොතක කෙනකුට කස පහර දෙන්නට මෙන්ම කඳුළු සලා හඬන්නට ද ඔහු සූදානම් ය.

එහෙත් මම දැන් පෙර මෙන් නොව සන්සුන්ව මා පාලනය කර ගනිමින් සිටිමි. ඈන් නමින් පෙනී සිටින සාරාගේ ආයා හැටියට මා පත් කරගන්නට ඔවුන් වරෙක සැලසුම් කළහ. මා අප දෙපාර්ශ්වය අතර ඥාතීත්වය බිඳ නොදමා ඉවසීමෙන් බලා සිටියේ සාරාගේ යහපත වෙනුවෙන්මය.

කෙසේ නමුත් අවසානයේදී බිල් උසාවියෙන් ඉල්ලා සිටියේ දැරිය සහ මා අතර කිසිදු මුණගැසීමක් අනවශ්‍ය බවයි.

මීළඟ දිගහැරැම ලබන සතියේ