'අම්මා' කියන්නේ ඕනෑම කෙනකුට ජීවිතයේ සුවිශේෂීතම පුද්ගලයා

නොවැම්බර් 21, 2022

 

"මේරි බෙත් සාරාට විවිධාකාර ඇඳුම් පැළඳුම් ගෙන ආවාද?"

ස්ටර්න් යුවළ අමනාපයට පත් වෙද්දී සීගල් ඇය වෙත තවත් පැනයක් ඉදිරිපත් කළේය.

 

සැබවින්ම මම සෑම මසකට වරක්ම සාරාට ඇඳුමක් මිල දී ගත්තෙමි. ඒ මගේ දියණිය ඉතා සුන්දර ලෙස දකින්නට මට අවැසි වූ නිසාවෙන්. ඈ මගේම දියණියයි. මම හැකි පමණින් ඇයගේ අවශ්‍යතා පිළිබඳව සොයා බැලුවෙමි. ඇය ඇවිදින්නට පටන් ගත් අවදියේ සිඟිති දෙපාවලට සපත්තු වුවමනා වී තිබිණි. මම ඒ කුඩා දෙපතුල් කඩදාසියක සටහන් කොටගෙන ඈ වෙනුවෙන්ම අලුත් සපත්තු සඟළක් තනා ගත්තෙමි. ඒ කුඩා සපත්තු ජෝඩුව මා ස්ටර්න් නිවෙසට යැවූ නමුත් ඉන්පසු කිසිදාක මට එය දකින්නට ලැබුණේ නැත.

 

"මේරි බෙත් සාරාට අලුත් ඇඳුම් ගෙනාවාද?" සීගල් නැවත එම පැනයම විමසුවේය.

"ඔව්" ජූලියා විගින්ස් එවර වහා පිළිතුරු දුන්නාය.

" කොච්චර කාලෙකින් වගේද ඒ?"

"බොහෝ වාරයක්"

ඇය පිළිතුරු දුන්නේ හිස වනමින් මදෙස බලමිනි.

අනතුරුව ප්‍රශ්න කෙරුණේ "ලී සෝක්" නමැති විශේෂඥවරයාගෙනි. සාරාට වයස අවුරුදු දොළහක් වනතුරු මා මුණ නොගැසිය යුතු යැයි පවසනු ලැබුවේ ඔහු විසිනි. ඔහු කිසිදාක මා හා දැරිය සමඟ කිසිවක් කතා කොට තිබුණේමත් නැත.

 

ඊළඟ සාක්ෂිවරු වූයේ හැරල්ඩ් කොප්ලොවිපස් නමැති මනෝ වෛද්‍යවරයා ය. මා සමඟ බොහෝ දුරට සම්මුඛ සාකච්ඡාවෙහි යෙදී ඇති ඔහු සාරා සහ මා එකට ගත කරන කාලය තුළ නිරීක්ෂණයෙහි යෙදී ඇත.

 

ඔහු මා වෙනුවෙන් යෝජනා කළේ, ආරක්ෂක නිලධාරීන්ගෙන් තොරව මගේත් සාරාගේත් මුණ ගැසීම සිදුවිය යුතු බවය. මට සාරා හා ගත කරන්නට ලැබෙන කාලය ප්‍රමාණවත් නොවන බවද ඔහු යෝජනා කළේය.

 

"මේරි බෙත් දැරිය සමඟ ගත කරන්නේ ඇගේ ආයා ඈ සමඟ ගත කරන කාලයටත් වඩා බොහොම අඩු කාලයක්."

 

"කිසියම් විදිහකින් මේරි බෙත් හට දරුවා දැකීම අත්හිටුවුවහොත් ඒ අඩුව දරුවාට නොදැනී යාවිද? ක්‍රමයෙන් දැරියට ඇය සම්පූර්ණයෙන්ම අමතකව යාවිද?

 

ෆ්‍රෑන්ක් ඩොනේ, කොප්ලොවිට්ස්ගෙන් ප්‍රශ්න කළේය.

"නැහැ. දැරිය ඇයට අමතන්නේ 'මමා' කියලා. 'මමා' කියන්නේ ඉතා සුවිශේෂී ආමන්ත්‍රණයක්. ඕනෑම කෙනෙක් බොහෝ ආදරය කරන ප්‍රිය කරන කෙනෙක්.

"ඔබ සිතන්නේ මේරි බෙත් තමාගේ 'මමා' යන බව සාරා දන්නවා' කියලද?"

ෆ්‍රෑන්ක්ගේ ඊළඟ ප්‍රශ්නය එය විය.

" 'අම්මා' කියන්නේ ඕනෑම කෙනෙකුට ජීවිතයේ සුවිශේෂීතම පුද්ගලයා."

මා සහ සාරා නිරීක්ෂණය කළ දෙහෝරාව පිළිබඳව කොප්ලොවිට්ස් නැවත සිහිපත් කළේය.

"ඒ අවස්ථාව බොහොම හැඟුම්බරයි. හරියට අතීතයක් බෙදා හදාගැනීමක් හා සමානයි.

 

"ඔබ සිතන්නේ මේරි බෙත් තමාගේ "මමා" බව සාරා දන්නවා කියලද?"

"මේරි බෙත් දැරියගේ අම්මා. මුල් අවදියේදී ඇය සමඟ ගත කළ, ඇය රැකබලාගත් ගැහැනිය."

 

ඔහු බෙට්සි ස්ටර්න් වෙත දෑස යොමු කරමින් මෙසේ ද කීවේය.

 

"කුඩා කාමරයක් තුළ අවුරුදු දෙකක දැරියක් සමඟ හෝරා දෙකක් ගත කිරීම ඕනෑම කෙනකුට පහසුවෙන් කළ හැකි යමක් නෙවෙයි. නමුත් මේරි බෙත් ඒ කාර්ය ඉතා හොඳින් සිදු කළා. ඒ කාලය තුළ ඇය දරුවාගේ අවශ්‍යතා පිළිබඳව ඉතා උනන්දුවෙන් කටයුතු කළා.

 

ඇත්තටම ඒ ඉතා සුන්දර කාලසීමාවක්. කාමරය පුරා පාට පින්තූර පොත්, පබළු, සෙල්ලම් බඩු පිරී තිබුණා. මේරි බෙත් දැරියට පින්තූර ඇල්බමයක් පෙන්නුවා. දැරිය ටියුස්ඩේ, රයන් වාගේම සීයා, අත්තම්මා පවා හඳුනා ගත්තා. ඔවුන් ඒ සඳහා පැය භාගයක් විතර ගත කළා.

 

සාරා, මේරි බෙත්ගේ උකුලට පැන 'මමා' කියමින් ඇය සිප වැලඳගත්තේ ඉතාමත්ම ආදරෙන්. ඇත්තෙන්ම ඒ සැබෑ සුන්දර කාලසීමාවක්. කාමරය තුළ අමුතුම ලෝකයක් නිර්මාණය වී තිබුණා. ඒ ලෝකය ඉතාමත්ම ආදරණීයයි.

 

ඩොනේ මහත්මයා, මේ සියලු දෑ මා නිරීක්ෂණය කරන බව මේරි බෙත් දැන සිටියා වුණත් සාරා මේ කිසිවක් පිළිබඳව දැන සිටියේ නැහැ. එය ඉතා සුවිශේෂී කාරණාවක්."

 

ස්වීන් විනිසුරු තැන නැවතත් තම සිනහව මුව තුළම සඟවා ගත්තේය. බිල් ස්ටර්න් වාඩි වී සිටියද මහත් අපහසුතාවකින් පෙළෙමින් සිටියේය. බෙට්සි ස්ටර්න්ගේ දෑසෙහි ගිනි පුපුරු මතු වී තිබූ අතර ඇය මිදී, ඝන වී නොසෙල්වී සිටිනු පෙනිණි.

 

අවසාන වරට කරුණු ගොනු කොට දැක්වූ ඩොනේ තවදුරටත් සිටියේ මා බොරු වංචාකාරියකැයි යන මතයේ මය. දැරියට සැබෑ ලෙසම ආදරය කරනවා නම් මා ඇය අත් හළ යුතු බව ඔහු ස්ථීරවම කියා සිටියේය.

 

විනිසුරු ස්වීන් දැඩි ලෙස සංවේදී වූ අතර ඔහුගේ කතාව නවතා දමන්නට තරම් කාරුණික වූයේය.

 

 

 

මීළඟ දිගහැර ැම ලබන සතියේ

A Mother's Story Mary Beth Whitehead.

පරිවර්තනය

සුනිලා විජේසිංහ

 

CAPTCHA
This question is for testing whether or not you are a human visitor and to prevent automated spam submissions.
Image CAPTCHA
Enter the characters shown in the image.