හෙට දවස ගැන දැනගන්න හැමෝගෙම හිත් තුළ ඇත්තේ මහත් කුතුහලයකි. ඒ නිසාම ඔවුන් තමන්ගේ අනාගතය ගැන කියවෙන, කියන දේවල් ගැන මහත් උනන්දුවක් දක්වනවා. මේ කියන කොයිදේටත් වඩා ඔබේ අල්ලේ රේඛා මඟින් කියවෙන අනාවැකිවල ලොකු සත්‍යතාවයක් තියෙනවා.

ගස් යට, පාරවල් අයිනේ, බස් නැවතුම් පොළවල්වල සාස්තර කියන විවිධ පුද්ගලයෝ අතර වංචනිකයෝ එමටයි. ඔවුන්ට හසු නොවී අද පටන් තරුණී වෙතින් ඔබේ අත්ල ඔබම බලා ගනිමුද?

එසේ නම් අද පටන් විද්‍යාත්මක වූ පදනමක් සහිතව අත්ලෙහි සැඟවුණු ඔබේ ජීවිතය විනිවිද දකින්නටයි මේ සූදානම.

අත්ලෙහි ප්‍රධාන රේඛා තුනකි.

01. ජීවන රේඛාව

02. ශීර්ෂ රේඛාව

03. හෘද රේඛාව

මීට අමතරව දෛව රේඛාව, ජීව රේඛාව, සුඛ රේඛාව, මන්දාකිණි රේඛාව ආදී වශයෙන් අනාවැකි කිව හැකි රේඛා ගණනාවක් වේ.

ජීවන රේඛාව :-

හස්ත රේඛා ශාස්ත්‍රයේදී අනාවැකි පළ කිරීමේ දී පිරිමියෙකුගේ දකුණු අත ද කාන්තාවකගේ වම් අතද පරීක්ෂා කරනු ලැබේ.

එසේම ජීවන රේඛාව තුළින් ජීවිතයේ නොයෙකුත් දේ වටහා ගැනීමට හැකියාව ඇත. තමාගේ ලෙඩ රෝග, වත්පොහොසත්කම් මෙමඟින් පෙන්නුම් කෙරේ.

තමන් සතු ධනය, රැකියාව, පරම්පරාගත රෝග වගේම හිතේ සතුට ගැන පවා මෙම රේඛාව සම්බන්ධ වන සලකුණුවලින් කියවෙයි. ජීවන රේඛාවේ සුබපල ගෙන දීමටනම් රේඛාව කැපීම්, කැඩීම්වලින් තොරව ගැඹුරුවට දික්ව ඉතා මනා ලෙස විහිදී ගොස් තිබිය යුතුය. සියලු කරදරවලින් තොර වාසනාව ළඟාකර දියුණුවේ දොරටුව විවෘත වන්නේ එවන් අයටය.

එහෙත් එම රේඛාව හරහා කැපීම් රේඛාව ආදියෙන් හරස්ව නැවත යථා තත්ත්වයට පත් වූ බව පෙන්නුම් කරයි නම් සියලු බාධා තුරන් වී යන බවක් කියවේ.

ජීවන රේඛාව තදට ගැඹුරු ලෙස පිහිටියේ නම් ලෙඩ රෝග මර්දනය කර ගැනීමට හැකියාවක්, ලෙඩක් හැදුණොත් පහසුවෙන් සුව වීමේ ගුණයක් පිහිටයි. එසේම එවැනි ලෙස පිහිටි රේඛාවක් ඇත්නම් නිර්භීත ගති පැවතුම් පෙන්නුම් කරයි. තම ආයුෂ කාලය සොයා ගැනීම මාපට ඇඟිල්ල සහ දබර ඇඟිල්ල අගින් පටන්ගෙන මැණික් කටුව දෙසට ගමන් ගන්නා රේඛාවන් දැක ගත හැකියි. ඉතා පැහැදිලිව මනා ලෙස වැටී ඇති ප්‍රමාණය දක්වා ආයු කාලයයි. ඉහළ සිට පහළට වැඩිවීම පෙන්නුම් කරන රේඛාවේ කැපීම්, කෙටීම් තැළීම් ඇත්නම් බාධා සහිත ජීවිතයක් උරුම වේවි. ඒ අනුව ආයු කාලයට බාධා ඇතිවීමට ඉඩ ඇත. අතීතයේ මෙම රේඛාවෙන් ආයුෂ 120 දක්වා පෙන්නුම් කළත් දැන් යම් හෙයකින් පහළ මැණික් කටුව දෙසට මෙම රේඛාව සම්බන්ධ වුවහොත් වර්තමානයේදී ආයු කාලය අවුරුදු 80 - 90 තෙක් පමණක් ගණනය කෙරේ. එය 01 රූප සටහන අධ්‍යයනය කිරීමෙන් ඔබට වටහා ගත හැකියි. අප ඔබට ලබා දී ඇති 02 රූප සටහන දැන් බලන්න. එහි A ජීවන රේඛාවෙන් මැදඟිල්ල දෙසට කෙළින්ම ඇදී යන මැද රේඛාවක් තිබේ නම් ඔහු හෝ ඇය වාසනාවන්තියක්.

ආයු කාලය අනුව බැලුවහොත් ඔබේ ආයුෂ ඔබට වාසනාව නිගමනය කරගත හැකියි. එනම් අවුරුදු 30 ගණන්වලදී ඔබේ හිතවතකුගේ මාර්ගයෙන් ඔබේම දියුණුව උදාවේ.

අවුරුදු 40 ගණන්වල වුවහොත් ජනප්‍රියත්වයට පත්වන පුද්ගලයෙක් වෙයි. 50 ගණන්වල දී තම ධාරණ ශක්තියෙන් දියුණුවක් කරා යයි. තවද මෙම රේඛාව කෙටියෙන් පැහැදිලි කළහොත් උත්සාහ රේඛාව ලෙස හැඳින්විය හැකියි.

03 රූප සටහන දැන් බලන්න.

එහි A අක්ෂරයෙන් නීරෝගිතාවය පිළිබිඹු කරයි. අංක 01 මඟින් දක්වා ඇති ජීවන රේඛාවේ තිත් ලකුණින් විවාහය ඉක්මනින් සිදුවන බව පෙන්නුම් කරයි. 02 ලකුණු කර ඇති සහ අඩ රවුමින් පෙන්නුම් කරන්නේ විවාහය දෙදරන ලක්ෂණයකි. අංක 03 මඟින් පෙම්වතා විසින් පොරොන්දු කඩ කිරීමක් පෙන්නුම් කරයි. අංක 04 වේදනා සහිත බියකරු ආදරයක් පෙන්නුම් කෙරේ.

අංක 05 ලකුණු කර ඇති පරිදි අල්ලේ සටහන්ව ඇත්තේ බොහොම හොඳ වාසනාවන්ත විවාහ දිවියක් ගත කරන බවත් සතුරු බලවේගයන් පවා බිඳී යන වාසනාවක් ඇති බවත්ය.

අංක 06 මඟින් පෙන්නුම් කෙරෙන්නේ එලෙස රේඛාව බිඳී ගියහොත් විශේෂ ප්‍රමුඛ පෙළේ සංචාර, රටේ පිළිගත් පුද්ගලයෙක් වන බවයි.

වෙළෙඳ ව්‍යාපාර, විශාල සේවා ස්ථාන, කර්මාන්ත හිමිකම් ප්‍රකාශන ආයතන ලැබීම, තමා යටතේ විශාල සේවක පිරිසක් සිටීම, දියුණුවක් ලැබීම, විශාල ලෙස මුදල් ඉපයීමේ මාර්ග, විදේශ සංචාර වැනි වාසනාව ගෙන දෙයි. සිකුරු මණ්ඩලයේ මුලම තරු සලකුණු තිබීමෙන් එය පෙනී යයි. එසේම පෙම් සම්බන්ධතාවලින් ජය අත්වේ.

මේ ලෙසින් ඔබේ ජීවන රේඛාව හොඳින් පරීක්ෂා කිරීමෙන් ඔබටම ඔබේ ජීවිතය විනිවිද දැකිය හැකියි.

 ‍ප්‍රවීණ ජ්‍යෝතිර්වේදීනී ගුප්ත විද්‍යා ආචාරිණී

නිරංගා බාලසූරිය

[email protected]

රූ රටා:- නිලක්ෂි ආරියරත්න