ආදරණීය පුංචි පුතාගේ, දියණියගේ උපන්දිනය හරිම විශේෂයි. මොකද වැඩිහිටියෝ වාගේ නෙමෙයි පුංචි පැටවුන් තමන්ගෙ උපන්දින දවස උදාවෙනකම් ඇඟිලි ගණිනවා. තෑගි ගන්න, කේක් කපන්න, යාළුවොත් එක්ක විනෝද වෙන්න මේ හැමදේම වෙනුවෙන් තමයි එයාලා මඟ බලාගෙන ඉන්නෙ.

ඉතින් මේ කොරෝනා වසංගතයත් එක්ක පුංචි පැටවුන්ගෙ ඒ උපන්දින සාද හීන බොහොමයක් බිඳිලා යනවා. ගෙවිලා ඈතට යන දවස් ආයේ ජීවිතවලට උදාවෙන්නෙත් නෑනේ.

ඒ හින්දා ඔබට පුළුවනි තමන්ගේ පවුලේ කට්ටිය පමණක් එකතු වෙලා ගෙදරදීම පුංචි උපන්දින සාදයක් සූදානම් කරන්න. පුංචි උපන්දින කේක් ගෙඩියට අමතරව දරුවා ආසම කරන කෙටි කෑම කිහිපයක්, අතුරුපසක්, රසවත් පානයක් සූදානම් කරන්න. නෑ හිත මිතුරන් කැඳවන්න බැරි වුණත් පවුලේ කිහිපදෙනා එකතු වෙලා කුඩාවට සාදයක් සමරන්න.

එයට අපූරු අත්වැලක් තමයි අපි මේ විදිහට රැගෙන එන්නේ.

උපදෙස් - Raan's kitchen හි සූපවේදිනී

රංගනා දුලංජලී

 

 

රසම රස බිත්තර සැන්ඩ්විච්

පාටියක් කිව්වහම සැන්ඩ්විච් නම් නැතිවම බැහැ. බලන්න හරිම ලේසියෙන් පහසුවෙන් හදාගත්ත මිශ්‍රණයක් තමයි මේ සැන්ඩ්විච් සඳහා භාවිත කරලා තියෙන්නෙ.

 

අවශ්‍ය ද්‍රව්‍ය

 

* බිත්තර 4-5ක්

* බටර් ග්‍රෑම් 100ක්

* කුඩාවට කපාගත්

 

 

ලොකු ලූනු ගෙඩි 1/2ක්

* චීස් ස්ප්‍රෙඩ් මේස හැන්දක්

* මයොනිස් මේස හැන්දක්

* පොඩියට කපා ගත් සැල්දරි කැබැල්ලක්

* ලුණු, ගම්මිරිස් ‍රස අනුව

 

සාදාගන්නේ මෙහෙමයි

* බඳුනක් ගෙන එයට බටර්, ලුණු, ගම්මිරිස් , කුඩාවට කපාගත් ලූනු , මයොනිස්, චීස් ආදිය දමා මිශ්‍ර කරන්න.

* බිත්තර තම්බලා , කහමදය වෙනම ගෑරප්පුවකින් පොඩි කරගන්න .

* ඔබ මේ මිශ්‍රණය පොඩ්ඩක් සැරට හදාගන්නවා නම් අමු මිරිස් කරල් 2-3ක් හීනියට කපලා එකතු කරගත හැකියි.

 

* දැන් මෙයට බටර් මිශ්‍රණයත් එකතු කරන්න. කපා ගත් සැල්දරි කැබැල්ලත් එකතු කරන්න.

* බිත්තර සුදු මදය වෙනම පොඩි කෑලි සිටින සේ පොඩි කර එයත් එකතු කරන්න.

මේ සියල්ලම හොඳට කලවම් කරගන්න.

* ඊට පස්සේ පාන් පෙතිවල මේ මිශ්‍රණය හොඳින් තවරා ඔබ කැමැති හැඩතල අනුව කපාගන්න. අවශ්‍ය නම් කටර් එකකින් වුවද කපාගත හැකියි.

------------------------------

නිර්මාංස අයට කදිම සෝයා කට්ලට්

වැඩිහිටියෝ වාගේම තමයි සමහර පොඩිත්තෝ ඉන්නවා මස්, මාළු ප්‍රතික්ෂේප කරන. ඒ වාගේ නිර්මාංස කට්ටියට තමයි මේ සෝයා කට්ලට් හදන්නෙ.

 

අවශ්‍ය ද්‍රව්‍ය

* සෝයාමීට් ග්‍රෑම් 200ක්

* අල ග්‍රෑම් 250ක්

* ලූනු ගෙඩියක් පොඩියට කපාගෙන

* සුදු ලූනු බික් 1-3 ක්

* තළාගත් පොඩි ඉඟුරු කැබැල්ලක්

* රම්පේ , කරපිංචා ස්වල්පයක්

* ලුණු , ගමිමිරිස් රස පදම අනුව

* කෑලි මිරිස් මේස හැඳි

2ක් ( සැරට අවශ්‍ය නැතිනම් නොදමන්න.)

* සෝයා සෝස් මේස හැඳි 1ක් ( අත්‍යවශ්‍ය නොවේ)

* කුරුඳුපොතු කෑල්ලක්

* එනසාල් ඇට 1-2ක්

* කරාබු නැටි 2-3ක්

* තෙල් මේස හැඳි 1-2ක්

* දෙහි යුෂ මේස හැඳි 1-2ක්

 

සාදාගන්නේ මෙහෙමයි

 

* මුලින්ම අල ටික තැම්බෙන්නට තියන්න. ඊට පස්සේ සෝයාමීට්වලට උණු වතුර ටිකක් දාලා එයද තම්බ ගන්න.

* තම්බාගත් සෝයාමීට් ටික හොඳින් මිරිකලා වැඩි වතුර ටික අයින් කරන්න.

මෙලෙක් වෙලා තිබෙන නිසාම ඔබට මේ සෝයා අතින්ම පොඩි කැබලිවලට කඩා ගන්න පුළුවනි.

* මෙයට ලුණු , ගම්මිරිස් පොඩ්ඩ පොඩ්ඩ එකතු කරලා කලවම් කරන්න.

* අල ටික තැම්බුණාට පස්සේ එය හොඳට පොඩි කර ගන්න.

* දැන් බඳුනක් ළිපේ තබා රත් වනවිට කරාබු නැටි , එනසාල්, කුරුඳුපොතු එකතු කරගන්න. ඉන්පසුව කපා ගත් ලූනු , සුදු ලූනු, ඉඟුරු , රම්පේ, කරපිංචා ආදියත් එකතු කරන්න .

* මේවා සුවඳ හමමින් බැදීගෙන එනවිට එයට කැබලි කරගත් සෝයාමීට් එකතු කරලා තෙම්පරාදු කරන්න . කෑලි මිරිස් පොඩ්ඩකුත් එකතු කරන්න . සෝයා සෝස් හැන්දක් ද එකතු කර හොඳින් කලවම් කරන්න .

* දැන් ළිප නිවලා පොඩි කරගත්ත අල ටික එකතු කරලා හොඳට කලවම් කරන්න. දෙහි යුෂ පොඩ්ඩකුත් එකතු කරන්න

* මිශ්‍රණය නිවුණාට පසුව එහි ඇති කරපිංචා , රම්පේ , කරාබු නැටි, එනසාල් , කුරුඳුපොතු ආදිය ඉවත් කර කුඩා රවුම් බෝල සාදා ගන්න.

 

කට්ලට්වලට බැටර් එක හදාගන්නේ මෙහෙමයි

 

අවශ්‍ය ද්‍රව්‍ය

* පාන් පිටි කෝප්පයක්

* බිත්තරයක්

* රස අනුව ලුණු

* වතුර කෝප්පයක්

* කහ තේ හැඳි 1/4 ක්

සාදන ආකාරය

* ඉහත සඳහන් ද්‍රව්‍ය සියල්ලම බඳුනකට දමන්න.

* හොඳින් මිශ්‍රකර උකු බැටරයක් සකසා ගන්න.

* මේ බැටරය කලින් සකසාගත් කුඩා කට්ලට් බෝලවල තවරා අනතුරුව බිස්කට් කුඩුවල ද තවරන්න.

* කට්ලට් එක තරමක් ගනකමට තියෙන්නට වාගේම, තෙලට දැමූවිට පුපුරා යෑම වළකාගන්නට දෙවරක් පමණ මේ විදිහට තවරන්න.

* කට්ලට් බදින්න තෙල් පාවිච්චි කරද්දි කට්ලට් ටික වැහෙන්න තෙල් දමන්න මතක තියාගන්න. ඒ වාගේම තෙල් හොඳට රත් වෙලා තිබිය යුතුයි. නැත්නම් පුපුරන්නට ඉඩ තියේවි.

---------------------------

ක්‍රීම් රසය පිරුණු චිකන් රෝල්ස්

පොඩිත්තෝ ඉතින් වැඩියෙන්ම ආසා කරන්නෙ කිරි රසයටනේ. ඉතින් ක්‍රීම් රසය පිරුණු මේ චිකන් රෝල්ස් ටිකකුත් නොහදාම බැහැ.

 

ඒ සඳහා අපි මුලින්ම

මිශ්‍රණය සාදා ගනිමු.

 

අවශ්‍ය ද්‍රව්‍ය

* කැරට් ගෙඩියක්

* කටු රහිත කුකුළු මස් ග්‍රෑම් 500ක්

* ෆ්‍රෙෂ් ක්‍රීම් මේස හැඳි 03ක්

* ලුණු කුඩු තේ හැඳි 1 1/2ක්

* ගම්මිරිස් කුඩු තේ හැඳි 1 1/2ක්

* කපගත් ලූනු ගෙඩියක්

* තළාගත් සුදු ලූනු බික් 2-3ක්

* හීනියට කපාගත් කරපිංචා

* පොල් තෙල් මේස හැන්දක්

 

සාදාගන්නා ආකාරය

* මුලින්ම චිකන් ටික සෝදා කුඩා කැබලිවලට කපා ගන්න .

* බඳුනක් ළිප තබා එය රත් වීගෙන එද්දී තෙල් මේස හැන්දක් එකතු කරන්න.

* අනතුරුව එයට කපා ගත් ලූනු , සුදු ලූනු , කරපිංචා එකතු කරන්න.

* ලූනු රන්වන් පැහැයක් ගනිද්දී කපාගත් කුකුළු මස් ටික ද එකතු කරන්න.

* රස අනුව ලුණු , ගම්මිරිස් එකතු කර ගන්න.

* පොඩියට කපා ගත්ත කැරට් ගෙඩියත් එකතු කරන්න.

* මේ සියල්ලම හොඳට තැම්බෙන්නට හැර ෆ්‍රෙෂ් ක්‍රීම් එකතු කරගන්න. එය මස් ටිකට උරා ගන්නාතුරු හොඳින් කලවම් කරන්න.

 

* ෆ්‍රෙෂ් ක්‍රීම් වෙනුවට බටර් මේස හැඳි දෙකක් දමා එය රත් වීගෙන එද්දී පාන්පිටි මේස හැඳි 2ක් එකතු කරන්න. මෙය හොඳට හැඳි ගාද්දී එක කැටයකට වාගේ එකතු වේවි. ඒත් දිගින් දිගටම හැඳිගාන අතරතුරේ ෆ්‍රෙෂ් මිල්ක් කෝප්ප 1/4 ක් වගේ එකතු කරලා ගෙදරදීම ෆ්‍රෙෂ් ක්‍රීම් එක සාදා ගත හැකියි.

 

රෝල්ස් සෑදීමට අවශ්‍ය පෑන් කේක් සාදා ගනිමු

 

අවශ්‍ය ද්‍රව්‍ය

* පාන්පිටි ග්‍රෑම් 300ක්

* බිත්තරයක්

* රස අනුව ලුණු

* වතුර කෝප්ප 02ක්

සාදාගන්නා ආකාරය

* ඉහත සඳහන් සියල්ලම එකට දමා බ්ලෙන්ඩරය ආධාරයෙන් හොඳින් මිශ්‍ර කරගන්න.

* නැත්නම් අතින් හොඳට කලවම් කරගන්න.

* පොඩි බඳුනකට දමා ළිප ගාවම මිශ්‍රණය තියාගන්න.

* රවුම් පිඟානක තෙල් හෝ බටර් ස්වල්පයක් ගාලා ලෑස්ති කරගන්න.

* බිත්තරයක් බීට්කර පොඩි කප් එකකට දමාගන්න.

* දැන් ෆෑන් එකක් ළිප තබා සකසාගත් බැටර් එකෙන් මඳක් වක් කරලා තුනීයට පෑන් කේක් සාදා ගන්න.

* ඉන්පසුව පෑන් කේක් එක පිඟානකට දාලා එහි මැදට සකසාගත් කුකුළු මස් මිශ්‍රණයෙන් පොඩ්ඩක් දමා දෙපැත්තෙන්ම ඇතුළට නවලා රෝල් කරන්න. පෑන් කේක් එකේ අගින් බිත්තර සාරු පොඩ්ඩක් ගාලා ඇරෙන්නේ නැතිවෙන්න අලවා ගන්නත් අමතක කරන්න එපා.

* ඒ වාගේම මේ පෑන් කේක් එක සකසා නිවෙන්නට කලින් රෝල් එක හදා ගන්න ඕනෙ. නැත්නම් අලවන්න ආමාරුයි...

දැන් තියෙන්නේ බිත්තර තැවරුම සහ බිස්කට් කුඩු තැවරුම සකසා ගන්න.

ඒ සඳහා ,

* බිත්තර දෙකක් හොඳට බීට් කරලා ලෑස්ති කරගන්න.

* බිස්කට් කුඩු ටිකත් තරමක් විශාල පිඟානකට දාලා ලෑස්ති කරගන්න.

* ඉන්පසුව සකසාගත් පෑන් කේක් බිත්තර දවටනයේ තවරලා අනතුරුව බිස්කට් කුඩු එකේ තවරන්න.

* මේ විදිහට රෝල්ස් එක දෙපාරක් තවරාගත් විට අපූරුවට නොකැඩී තියේවි.

* දැන් ගැඹුරු තෙලේ බැදගන්න.

--------------------------------------------------------------

කර කර ගා රසට හැපෙන මාළු පැටිස්

කට්ලට්, රෝල්ස්වලට වාගේම පොඩි පැටවුන් පැටිස්වලටත් හරිම කැමැතියි. ඉතින් ඒ හින්දා මහන්සි නොබලා අපි පැටිස් ටිකකුත් හදා ගනිමු.

අවශ්‍ය ද්‍රව්‍ය

* සැමන් ටින් ( ග්‍රෑම් 200) 01ක්

* අල ග්‍රෑම් 300ක්

* ලූනු ගෙඩියක් පොඩියට කපාගෙන

* සුදු ලූනු බික් 1-3 ක්

* තළාගත් පොඩි ඉඟුරු කැබැල්ලක්

* රම්පේ , කරපිංචා ස්වල්පයක්

* ලුණු , ගම්මිරිස් රස පදම අනුව

* කෑලි මිරිස් මේස හැඳි

දෙකක් ( සැරට අවශ්‍ය නම්)

* සෝයා සෝස් මේස හැන්දක්

* තක්කාලි සෝස් මේස හැන්දක් ( මේ සෝස් වර්ග අත්‍යවශ්‍ය නොවේ)

* කුරුඳු පොතු කැබැල්ලක්

* එනසාල් 1-2 ක්

* කරාබු නැටි 2-3 ක්

* පොල් තෙල් මේස හැඳි 1-2

ක් සහ පැටිස් බැදිමට තෙල්

* දෙහි යුෂ මේස හැඳි 1-2 ක්

සාදාගන්නේ මෙහෙමයි

* මුලින්ම අල ටික තැම්බෙන්නට තබා සැමන් ටික පොඩි කැබැලිවලට කඩා ගන්න.

* ලුණු , ගම්මිරිස් ටික ටික එකතු කරලා කලවම් කරන්න.

* අල ටික තැම්බුණාට පසුව පොතු හැර හොඳට පොඩි කරගන්න.

 

 

 

* දැන් බඳුනක් ළිප තබා පොල් තෙල් ස්වල්පයක් දමා රත් වනවිට කරාබු නැටි , එනසාල් , කුරුඳු පොතු එකතු කරගන්න.

* ඉන්පසුව කපාගත් ලූනු , සුදුලූනු , ඉඟුරු , රම්පේ, කරපිංචා ආදියත් එකතු කරන්න.

* සුවඳ හමමින් බැදීගෙන එනවිට එයට පොඩි කරගත් සැමන් එකතු කරලා තෙම්පරාදු කරන්න.

* රස අනුව ලුණු , ගම්මිරිස් එකතු කරගන්න. කෑලි මිරිස් පොඩ්ඩකුත් එකතු කරන්න.

* කැමැති නම් සෝයා සෝස් හැන්දක් සහ තක්කාලි සෝස් ද එකතු කර හොඳට කලවම් කරන්න.

* දැන් ළිප නිවා පොඩි කරගත් අල ටික එකතු කරලා හොඳට කලවම් කරන්න. දෙහි යුෂ පොඩ්ඩකුත් එකතු කරන්න.

* මිශ්‍රණය නිවුණාට පසුව එහි ඇති කරපිංචා , රම්පේ , කරාබු නැටි , එනසාල් , කුරුඳු පොතු ආදිය ඉවත් කරගන්න.

පැටිස් කවරය හදමු

අවශ්‍ය ද්‍රව්‍ය

* පාන්පිටි ග්‍රෑම් 300ක්

* බිත්තර කහමදයක්

 

 

* අයිස් වතුර කෝප්ප 1-2 ක්

* රස අනුව ලුණු

* කහ ස්වල්පයක්

* බටර් ග්‍රෑම් 100ක්

* බේකින් පවුඩර් තේ හැඳි 1 1/2 ක්

සාදාගන්නේ මෙහෙමයි

* පළමුව භාජනයකට පිටි, බටර් , බිත්තර කහමදය , බේකින් පවුඩර් , කහ එකතු කරන්න.

* දැන් එයට අයිස් වතුර ස්වල්පය බැගින් එක්කරමින් පිටි ගුලිය අතේ නොඇලෙන පදමට අනාගන්න.

* ඉන්පසුව මෙය බෝලයක් ආකාරයට සාදා තෙත රෙදි කැබැල්ලකින් වසා තබන්න .

* පැයක් පමණ මෙසේ වසා තබා පසුව පොඩි කොටසක් ගෙන රෝලින් පින් එකක් භාවිතයෙන් තුනීකර කුඩා රවුම් කපා ගන්න.

* ඉන්පසුව ඔබ කලින් සාදාගත් මිශ්‍රණයෙන් ස්වල්පයක් මැදට තබා දෙකට නවා ගෙන ගෑරප්පුවකින් රවුමට එහි වටේ තද කර සීල් කරන්න. නැතිනම් මෙය පැටිස් කටරයකින් වුවද කපාගත හැකියි.

* ඔබ සකසා ගත් පැටිස් සියල්ලම පැය දෙකක් පමණ ශීතකරණයේ තබන්න.

* අනතුරුව පිටතට ගෙන ස්වල්ප වේලාවක් තබා ගැඹුරු තෙලේ බැද ගන්න.

 

---------------------------

සීතලම සීතල අයිස් කෝපි

කොයිතරම් නම් රසකැවිලි වාගේම කෙටි කෑම තිබුණත් පිපාසය සංසිඳවන්න පානයක් ඕනෙමයි. ඒ හින්දා පුංචි පැටවු වැඩියෙන්ම ආසා කරන අයිස් කෝපි හදන්නයි මේ සූදානම.

අවශ්‍ය ද්‍රව්‍ය

* නෙස්කැෆේ මේස හැඳි 04 ක්

* උණු වතුර කෝප්පයක්

* හොට් චොකලට් පවුඩර් මේස හැඳි 02ක්

* ෆ්‍රෙෂ් මිල්ක් ලීටරයක්

* කුඩු කරගත් කරාබු නැටි 5 -6ක්

* එනසාල් 5 -6ක්

* රස අනුව සීනි ( අවශ්‍ය නම් ඒ වෙනුවෙන් මිල්ක්මේඩ් ටින් 1/2ක් පමණ පාවිච්චි කරන්නත් පුළුවනි. )

* වැනිලා මේස හැන්දක්

සාදන්නේ මෙහෙමයි

* මුලින්ම නෙස්කැෆේ ටිකට උණු වතුර එකතු කරලා හොඳට කෝපි එකක් සාදා ගන්න.

* ඉන්පසුව එයටම කුඩු කරගත් කරාබු නැටි , එනසාල් එකතු කර ළිප තබා මඳ ගින්නේ තබමින් හැඳිගාන්න.

* හොට් චොකලට් පවුඩර් මේස හැඳි දෙකකුත් එකතු කරන්න.

* සුවඳ හමන විට බඳුන ළිපෙන් පිටතට ගෙන පෙරා ගන්න.

*ෆ්‍රෙෂ් මිල්ක් ටික වෙනම සාස්පානක දමා රත් කරන්න. බුබුළු දමාගෙන එනකොට ළිප නිවා පෙරා ගත් කෝපි මිශ්‍රණය ඒකට එකතු කරන්න.

* රස අනුව සීනි එකතු කරන්න. නැතිනම් මිල්ක් මේඩ් එක් කරන්න.

* වැනිලා ටිකකුත් එකතු කරන්න.

* නිවෙන්නට තබා පෙරාගෙන ශීතකරණයට දමන්න.

*මේ අයිස් කෝපි ඒවෙලේම පාවිච්චි කරනවා නම් අයිස් කැට එකතු කරලා බ්ලෙන්ඩර් කරන්නත් පුළුවනි.

* නමුත් දවසකට දෙකකට කලින් වගේ හදලා තියා ගත්තොත් රස වැඩියි.

 

 

---------------------------

චොකලට් බිස්කට් පුඩිම

පොඩිත්තන් ආසම කරන තවත් අපූරු අතුරුපසක් තමා චොකලට් බිස්කට් පුඩිං කියන්නේ. ගොඩාක් අය විවිධ ක්‍රමයට වාගේම විවිධ රසයටත් පුඩිං සකසා ගන්නවා. ඉතින් අපි මේ විදිහටත් හදල රස බලමු.

අවශ්‍ය ද්‍රව්‍ය

* මාරි බිස්කට් පැකට් 1ක්

* අයිසින් සීනි කෝප්ප 1ක්

* විපින් ක්‍රීම් ග්‍රෑම් 400ක්

* වැනිලා තේ හැඳි 1-2ක්

* ෆ්‍රෙෂ් මිල්ක් කෝප්ප 2ක්

* කෝපි හෝ චොකලට් කුඩු

ස්වල්පයක්

* ගා ගත් කුකිං චොකලට්

ස්වල්පයක්

* චොකලට් රසකාරක තේ හැඳි

2ක්

* කොකෝවා පවුඩර් තේ හැඳි 2ක්

සාදාගන්නේ මෙහෙමයි

* විපින් ක්‍රීම් ටික බඳුනකට දමා අයිසින් සීනි එකතු කරමින් පදම එනතෙක් බීට් කරන්න.

* එයට වැනිලා එකතු කරන්න.

* චොකලට් රසකාරකය තේ හැඳි දෙකක් සමඟ කොකෝවා පවුඩර් තේ හැඳි 1-2 ක් ද එකතු කරන්න .

* දැන් වෙනත් බඳුනක් ගෙන කෝපි හෝ චොකලට් කුඩු, ෆ්‍රෙෂ් මිල්ක් එකට එකතු කරලා මිශ්‍ර කරන්න.

* මාරි බිස්කට් එහි පොඟවාගන්න.

* තරමක් දිගු හැඩයේ බඳුනක් හෝ කුඩා කප් කිහිපයක් ගෙන පොඟවා ගත් බිස්කට් තට්ටුවක් පැතලි තට්ටුවක් ආකාරයට අසුරන්න.

* ඊට උඩින් විපින් ක්‍රීම් තට්ටුවක් දමන්න.

* දැන් ආයිමත් බිස්කට් තට්ටුවක් දමන්න.

* මේ ආකාරයට මාරුවෙන් මාරුවට විපින් ක්‍රීම් තට්ටුවක්, බිස්කට් තට්ටුවක් වශයෙන් තට්ටු කිහිපයක්ම දමාගන්න.

* අවසාන විපින් තට්ටුවට උඩින් ග්‍රේට් කරගත් චොකලට් ස්වල්පයක් ඉස සරසා ගන්න.

* පුඩිම සකසා අවසානයේ ශීතකරණයේ පැය 2 ක් පමණ තබා පසුව ආහාරයට ගන්න.