රසට කෑමක් හදාගන්න එක මහා අමාරු වැඩක් කියල තමයි බොහෝ දෙනෙක් හිතන් ඉන්නෙ. හැබැයි හරි පදමට හදාගත්තු පහේ ටික තියෙනව නම්, ඒ පහේ දාන්න ඕ‍ෙන කොහොමද? කොච්චර ප්‍රමාණයක්ද කියල දන්නව නම්, මොන මොන පහේ මොන මොන කරියටද කියල දන්නව නම් උයන එක මහ ලොකු දෙයක් නෙවෙයි. මේ කියන්න හදන්නෙ ගෙදරදීම සුවඳට, රසට, පිරිසුදුවට පහේ ටික හදාගන්න හැටි. අමු පහේ, බැදපු පහේ විතරක් නෙවෙයි වෙන පහේ වර්ගත් මෙතැන තියෙනවා. හැම හොද්දටම එකම පහේ බෝතලේ හලන්නෙ නැතුව ඒ ඒ හොද්දට ඒ ඒ පහේ වර්ග පාවිච්චි කරන්න.

 

බැදපු පහේ

සැරට පහේ රසට උයන පොළොස් මාළුවක්, ඌරු මස් කරියක්, සෝයා මීට් කරියක් රස ගන්වන්න මීට වඩා දෙයක් කොහෙද? බැදපු පහේ හදනකොට කුළුබඩු ටික වෙන වෙනම බැදගන්න එක අනිවාර්යයයි. එකට බදිනකොට එක එක කුළුබඩුව බැදෙන්නෙ එක එක ගාණට නිසා රස සහ පාට සමබරව තියාගන්න එක වැදගත්.

කොත්තමල්ලි ඇට ග්‍රෑම් 500ක්

සූදුරු ග්‍රෑම් 160ක්

මාදුරු ග්‍රෑම් 15ක්

කරදමුංගු ඇට 8ක්

කරාබු නැටි 15ක්

කුරුඳු අඟල් 10ක්

සේර අඟල් 10ක්

රම්පෙ අඟල් 8ක්

කරපිංචා ඉති 6ක්

 

01. සියලුම ද්‍රව්‍ය රත් කරගත් නන්ස්ටික් තැටියක වෙන වෙනම රන්වන් දුඹුරු පැහැයක් වනතුරු බැදගන්න.

02. මඳක් නිවෙන්නට හැර ග්‍රයින්ඩරයක කුඩු කරගන්න.

----------------------------

මස් කරි තුනපහ

ඕනම මස් වර්ගයක් උයාගන්න පාවිච්චි කරන්න පුළුවන්. මේ පහේ එක පාවිච්චි කරනව නම් මස්වලට අමතරව මිරිස් එකතු කරන්න අවශ්‍ය නැහැ. හදල ගොඩක් කල් තියාගන්නවට වඩා අවශ්‍ය වෙලාවට හදාගන්න එකෙන් රස සහ සුවඳ උපරිමයෙන් ලබාගන්න පුළුවන්.

 

කොත්තමල්ලි ඇට ග්‍රෑම් 100ක්

මාදුරු ග්‍රෑම් 100ක්

සූදුරු ග්‍රෑම් 100ක්

උළුහාල් ග්‍රෑම් 20ක්

කරදමුංගු ඇට 20ක්

කරාබු නැටි 20ක්

කුරුඳු අඟල් 4ක්

අබ ග්‍රෑම් 20ක්

වියළි කහ අඟලක කෑල්ලක්

වියළි මිරිස් කරල් ග්‍රෑම් 150ක්

සේර අඟල් 5ක්

කරපිංචා ඉති 6ක්

හාල් මේස හැඳි 2ක්

 

01. සියලුම ද්‍රව්‍ය රත් කරගත් නන්ස්ටික් තැටියක වෙන වෙනම රන්වන් දුඹුරු පැහැයක් වනතුරු බැදගන්න.

02. මඳක් නිවෙන්නට හැර ග්‍රයින්ඩරයක කුඩු කර ගන්න.

03. හොඳින් නිවුණු පසු සුළං නොවදින සේ වීදුරු බෝතලයක අසුරාගන්න.

----------------------------------------

ගරම් මසාලා

අසල්වැසි රට ඉන්දියාවේ විදිහට කෑමක් හදන්න නම් අනිවාර්යෙන්ම ගරම් මසාලා ඕනෙ. කඩෙන් ගන්නවට වඩා රසට මේ පහේ එක ගෙදර හදාගන්න පුළුවන්. මේකට ඕන ස්ටාර් අනීස්, බේ ලීෆ් එහෙම සුපිරි වෙ‍ෙළඳසල්වල තියෙනව.

කොත්තමල්ලි ග්‍රෑම් 200ක්

සූදුරු ග්‍රෑම් 100ක්

ගම්මිරිස් ග්‍රෑම් 30ක්

මහදුරු ග්‍රෑම් 30ක්

කරදමුංගු ග්‍රෑම් 50ක්

කරාබු නැටි ග්‍රෑම් 50ක්

කුරුඳු අඟල් 7ක්

බේ ලීව්ස් 7ක්

සාදික්කා පොඩි ගෙඩි 2ක්

ස්ටාර් අනීස් 2ක්

වසාවාසි 6ක්

 

01. සියලුම දේවල් වෙන වෙනම පාට වෙනස් නොවී සුවඳ එන තෙක් තැටියක බැදගන්න.

02. නිවුණු පසු හොඳින් කුඩු කරගෙන සුළං නොවදින්න අසුරාගන්න.

 

-------------------------------------

 සාම්බාර් මසාලා

 

කඩේ රසට සාම්බාර් එකක් ගෙදරදිම කන්න ඕ‍ෙන නම් අමු තුනපහ බෝතලේ හලල ඒ රස ගන්න බෑ. ඒකට විශේෂිත වෙනම මසාලා පවුඩර් එකක් තියෙනවා. මේ තියෙන්නෙ ඒක හදන හැටි. ඉන්දියන් රසට හදාගන්න පරිප්පුවකටත් මේ මසාලා එක නියමයි.

 

 

කොත්තමල්ලි ඇට ග්‍රෑම් 100ක්

උළුහාල් තේ හැඳි 2 1/2ක්

සූදුරු තේ හැඳි 4ක්

ගම්මිරිස් ඇට තේ හැඳි 2ක්

කඩල ග්‍රෑම් 40ක්

උඳු ඇට ග්‍රෑම් 40ක්

කඩල පරිප්පු ග්‍රෑම් 30ක්

වියළි මිරිස් කරල් 20ක්

කරපිංචා ඉති 5ක්

පෙරුම්කායම් තේ හැඳි 1/4ක්

කහ කුඩු තේ හැඳි 1ක්

 

 

 

01. පරිප්පු, කඩල, උඳු, සහ මිරිස් රන්වන් පැහැ වන තෙක් ගින්දර අඩුවෙන් තැටියක බැදගන්න.

02. එයටම උළුහාල්, කරපිංචා සහ මිරිස් එක් කර කරපිංචා ක්‍රිස්පි ගතියට එනතුරු බැදගන්න.

03. අවසානයට සූදුරු එක්කර කළවම් කර, ළිපෙන් ඉවත් කරගෙන පෙරුම්කායම් සහ කහ එක් කරගන්න.

04. නිවෙන්නට හැර හොඳින් කුඩු කරගෙන සුළං නොවදින ලෙස බෝතලයක අසුරාගන්න.

 

 

[email protected]

 

උපදෙස්

ප්‍රවීණ සූපවේදීනී

සර්වදර්ශනී අප්සරා