තවත් සිව් දිනක් ගෙවී ගිය තැන නොවැම්බර් මස 18 වැනි දින එකී ප්‍රකාශය වෙනස් කරමින් ඔහු නැවතත් අතිරේක කරුණු එයට එක් කොට තිබුණි.

ඒ අනුව කියැවුණේ නඩුව කොටස් දෙකකට බෙදා විභාග කළ යුතු බවකි.

ඉන් පළමුවැන්න ‘ආදේශක මව හා සම්බන්ධ කොන්ත්‍රාත්තුවේ නීත්‍යානුකූල භාවය‘ ලෙස ද දෙවැන්න ‘ළදරුවා රැක බලාගැනීමේ සහ හදා වඩාගැනීමේ අයිතිය‘ ලෙසද නම් කෙරිණි.

ඉන් පළමුවැන්න පමණක් ජනවාරි 05 වැනි දින සැලකිල්ලට ගැනෙන බව ද පැහැදිලිව පෙනෙන්නට තිබුණි. එකී කොටස් දෙකම සඳහා නීතිඥවරුනට සූදනම් වීමට කාලය මඳ බැවින් එවැනි තීරණයක් ගත් බවක් ද කියැවිණි.

“සාධාරණයක් ඉෂ්ටවීම පමා වෙනවා කියන්නේ එතැන සාධාරණයක් ඉෂ්ට නොවන බව.“

හැරල්ඩ් කැසිඩ්, සෝර්කොව්ගේ තීරණවලට තරයේම විරුද්ධ විය.

“නඩුව කොටස් දෙකකට බෙදීමේ වුමනාවක් නෑ. මම මේ නඩුව වෙනුවෙන් අදාළ දිනය වනවිට සූදානම්ව සිටිනවා.“

ඔහු මාධ්‍යයට ප්‍රකාශ නිකුත් කළේය. ඔහු විසින් නැවතත් අභියාචනාධිකරණ අංශය වෙත අභියාචනයක් ඉදිරිපත් කෙරිණි. නඩුව කොටස් දෙකකට නොබෙදිය යුතු බව ඔවුන්ගේ නිගමනය විය.

එහෙත් ගැරී ස්කොලොෆ් ඊට ප්‍රතිචාර වශයෙන් නැවත ඇපෑලක් ඉදිරිපත් කරමින් කියා සිටියේ මේ සංකීර්ණ නඩුව සඳහා ජනවාරි 05 වනවිට සූදානම් වීම සඳහා කාල වේලාව නොමැති බවය.

මේ සියලු කටයුතුවලදී ගැරීට සහය දක්වමින් ඔහු පසුපසින් සිටයේ ලොරේන් ඒබ්‍රහම් ය. ජනවාරි 05 වනවිට ස්ටර්න් යුවළගේ මනෝ විද්‍යාත්මක හා මානසික තත්ත්වයන් ද සමාජයීය කටයුතු සම්බන්ධයෙන්ද වාර්තා නිසි ලෙස සම්පුර්ණ කළ නොහැකි බව පවසමින් ඇය අප හට දෝෂාරෝපණය කළාය. අපගේ ඉල්ලීම අස් කරගත යුතුව ඇතැයි අභියාචනාධිකරණයට තර්ජනය කළාය.

එහෙත් ඒබ්‍රහම්ගේ තර්ජනය පරාජය කරමින් නිව් ජර්සි මහාධිකරණය දැනුම් දුන්නේ කොටස් දෙකකට බෙදීකින් තොරව ජනවාරි 05 වැනි දින නඩු විභාගය පැවැත්වෙන වගය.

ඒ නත්තල් දිනයට පෙර දිනයයි. සෝර්කොව් විසින් නැවතත් නියෝගයක් නිකුත් කෙරුණේ අප විස්මයට පත් කරවමිනි. ඒ අනුව කියැවුණේ පෙර සේම කොටස් දෙකකට ඇසෙන නඩුව සති දෙකක අන්තරයක් ඇතිව පැවැත්වෙන වගකි. එය අධිකරණ නියෝගයකට පටහැනිව කටයුතු කිරීමකි. තවත් අතකින් එය මා අගතියට පත් කිරීමට ගන්නා දරුණු උත්සාහයකි.

එබඳු තත්ත්වයක් යටතේ ඒ වසරේ නත්තල් සැමරුම අත්හැර දමන්නට මම තීරණය කළෙමි. එහෙත් මගේ දරුවන් වෙනුවෙන් හැරල්ඩ් කැසිඩ් ඒ මොහොතේ කාරුණිකව ඉදිරිපත් වූයේය. ඔහු මගේ දරුවන්ට කියා නත්තලට අවශ්‍ය සියලු දෑ ලියැවුණු ලේඛනයක් ලබා ගත්තේය. ඒ සියල්ල නිවෙසටම ගෙනැවිත් දෙන්නට ද ඔහු කටයුතු කළේය. ඔහු මගේ දරුවන් උදෙසා තෑගි බෝගද රැගෙන ආවේය.

අපගේ පවුල වෙනුවෙන් නීතිමය සහය ලබාදීම හැරුණු විට පෞද්ගලික මට්ටමින් ඔහු එලෙස සම්බන්ධ වූ පළමුවැනි වතාව එයයි.

පස් මසක් තිස්සේ අපගේ ජීවිත අනවරතයේ තළා පෙළා දැමූ අභියාචනා, මෝසම්, කල් දැමීම්, පමා කිරීම් අතර ඇදී ගිය සාරාගේ නඩුවට දැන් දිනයක් නියමව ඇත. ඒ 1987 ජනවාරි මස 05 වැනි දාය. එදින සීතල සිසිරයේ මැද හරියේ දවසක් වූ නමුත් අපේ සිත් පැවතියේ ඉතා උණුසුම්වය.

කුඩා උසාවි කාමරය පිළිවෙළකට සකස් කොට තිබිණි. එහි බිත්ති සහ දොර ජනේල නිල් සහ සුදු පැහැයෙන් වර්ණ ගන්වලාය. එම බිත්ති මත අතීතයෙහි සිදුවූ යම් යම් විප්ලවකාරී සිද්ධි විදහාලන සිතුවම් කිහිපයක් ඇඳ තිබිණි. කාමරයේ තිබූ මුළු අසුන් සංඛ්‍යාව පනස් හතරකි. ඉන් තිස් අටක්ම වෙන් කොට තිබුණේ මාධ්‍යවේදීන් වෙනුවෙනි. ඔවුන් සිය අසුන්වල වාඩි වී සිටියේ උදැසන 6.00 කණිසමේ සිටය. නිව්යෝක් පුරවරයේ සිට කැලිෆෝනියා දක්වා සෑම ප්‍රධාන පුවත්පතකින්ම සහ එංගලන්තයේ Manechester Guardian පුවත්පතෙන්ද, ප්‍රංශයේ Paris - Maten පුවත්පතෙන්ද නියෝජිතවරු ඒ අතර සිටියහ. දේශීය රූපවාහිනී නාලිකා, ගුවන්විදුලි නාලිකා, ජාතික වෙබ් අඩවි කිහිපයක්ම අපගේ අරගලය ලොවට දෙන්නට දැරුවේ මහත් වෙහෙසකි. මේ අතර මිලියන ගණන් ඇමෙරිකානුවෝ අවසන් විසඳුම කෙලෙස කුමක් වේදැයි විමසිල්ලෙන් බලා සිටියහ.

ගැරී ස්කොලොෆ් කතා කළේ ස්ටර්න් යුවළ කෙරෙහි බොහෝ අනුකම්පාවෙන් සහ දයාවෙනි. නඩුවට අදාළ කරගත යුතු වෛද්‍යමය සහ නීතිමය හේතු කාරණා ඔහුට එතරම් වැදගත් බවක් පෙනුණේ නැත.

ඔහු විශේෂයෙන්ම ආමන්ත්‍රණය කළේ මාධ්‍යවේදීන්හටය.

“මෙම උසාවියෙන් තීරණය කළ යුතුව තිබෙන්නේ පොරොන්දුවක් ලෙස ලබා දුන් යමක් ආපසු බලහත්කාරයෙන් ලබා ගැනීම සුදුසුද කියන එකයි.“

මේරි බෙත් පොරොන්දු වුණා බිල් ස්ටර්න්ට දරුවා ලබා දෙන්නට. එපමණක් නොවෙයි ඒ දරුවා ඔහුගේ ලෙයින් මසින් බිහි වූ කෙනෙක්. බිල් සහ බෙට්සි දෙදෙනා මහත් බලාපොරොත්තුවකින් ඒ ආකාරයට දරුවෙක් හදාගත්තේ බෙට්සි ස්ටර්න් මහත්මියගේ අසනීප තත්ත්වයක් හේතුවෙනුයි. දෛවය විසින් ඇයට දරුවකු බිහි කිරීමට අවහිරතා ඇති කොට තිබෙනවා. ඒ මල්ටිපල් ස්ක්ලෙරොසිස් (Multiple Sclerosis) නමැති ස්නායු ආබාධය නිසා.“

ස්කොලොෆ් එහිදී මඳකට ගොළු වූවා සේ පෙනිණි. බෙට්සිගේ අසනීප තත්ත්වය ප්‍රසිද්ධියේ හෙළි කරන්නට වූ නිසා විය යුතුය.

“මේ අසනීප තත්ත්වය නිසා ඇය නිසරු බවට පත්ව තිබෙනවා.“

ඔහු තවදුරටත් ඒ ගැන පැහැදිලි කළේ මෙසේය.

“සහ, වෛද්‍යවරුන් ඔවුනට තේරුම් කොට දී තිබෙනවා වෛද්‍ය රපෝර්තු අනුව දරුවෙකු දරා සිටීම ඇගේ සෞඛ්‍ය තත්ත්වයට අහිතකර බව.“

නීතිඥ ස්කොලොෆ් ඔහුගේ විස්තරය හමාර කරත්ම, විනිශ්චයකාර හාර්වේ සෝර්කොව් සෙමෙන් හිස වැනුවේ ඔහු අනුමත කිරීමක් වශයෙනි.

ඔහුගේ පුළුල් හකුපාඩා ද තර, වකුටු නාසය ද සහිත මුහුණින් පෙන්නුම් කළේ ස්කොලොෆ්ගේ ප්‍රකාශය සම්බන්ධයෙන් ඔහු තෘප්තිමත් වූ සැටියකි.

නමුත් මා වෙනුවෙන් පෙනී සිටි නීතිඥ හැරල්ඩ් කැසිඩි පෙන්වූයේ අසංතෘප්ත බවකි. සෝර්කොව් ගේ මුහුණෙහි වූ තෘප්තිමත් භාවය ඔහු හොඳින් හැඳිනගත්තේය.

“බෙට්සි ස්ටර්න් මහත්මියට දරුවකු පිළිසිඳ ගැනීමේ හැකියාවක් නොමැති බවට පැහැදිලි කාරණයක් ස්කොලොෆ් මහතාගේ විස්තර කිරීම තුළ සඳහන් වුණේ නෑ.“ කැසිඩි මහතා තම වාරයේ දී සඳහන් කළේය.

මීළඟ දිගහ ැර ැම ලබන සතියේ

පරිවර්තනය සුනිලා විජේසිංහ