කොතරම් 'ජීවිතය දිනමි'යි අදිටන් කරගත්තත් ඇතැම් විට සිරුරේ ඇතිවන අපහසුතා ඒ අදිටන එකසේ පවත්වා ගැනීමට බාධා කරයි. සාමාන්‍යයෙන් අප හැම දෙනාට ම දෛනිකව බොහෝ වැඩ කොටසක් කිරීමට සිදු වේ. එහෙත් දිගින් දිගට වැඩවල නිරත වීමේ දී තෙහෙට්ටුවක් ඇති වීම අපේ වැඩවලට බාධා කරයි.

එකිනෙකාගේ සිරුරුවල ස්වභාවය වෙනස් වන නිසා එක් අයකුට තෙහෙට්ටුව දැනීමේ වේලාව හා තවත් අයකුට එය ඇති වීම එකිනෙකට සමාන නොවේ. ඔබේ සිරුරට ඇතිවන තෙහෙට්ටුව දෛනික කාර්යයන්ට පවා ඇතැම් විට බාධා කිරීම ඔබට අත්විඳින්නට වී ඇති.

කාර්යාලයේ, ව්‍යාපාරයේ වැඩපල අවසන් වන විට, දවස අවසාන වන විට ඔබට දැනෙන්නේ තෙහෙට්ටුවකි. මෙය මහන්සිය නොවේ. මෙය මඟහරවා ගැනීමට හැකි හොඳම ක්‍රමයක් වන්නේ ශාරීරික අභ්‍යාසයන්හි යෙදීමයි. එලෙසින් ම අප දක්වන මේ ඉහිල්වීමේ ක්‍රියාවලිය ද මෙම තෙහෙට්ටුවෙන් මිදී යළි ප්‍රාණවත් වීමට හොඳ උපක්‍රමයක් ලෙස යෙදා ගත හැකිය. නාට්‍ය පාසල්හි පවා මෙම අභ්‍යාසය භාවිත කරන ආකාරය දැක ගත හැකිය.

මේ සඳහා පළමුවෙන් ම ලිහිල් ඇඳුමක් ඇඳගන්න.

බිම අතුරන ලද ඝන රෙද්දක හෝ මැට් එකක දෙපා ඉදිරියට දිගුකර වාඩි වී සෙමෙන් දිගාවන්න.

සමස්ත කශේරුකාව ම පොළොවට ස්පර්ශ වන ලෙස දිගාවන්න. අත්දෙක අත්ල විවෘතව ශරීරය දෙපස තබා ගන්න.

දකුණු කකුලට වෙර ගෙන පාදයේ බරක් ගැට ගසා ඇති කලෙක මෙන් පාදය බර කරගෙන පොළවෙන් අඟල් දෙකක් තුනක් පමණ ඉහළට ඔසවා එකේ සිට පහට ගැන, කකුල පහළට වැටෙන්නට සලස්වන්න.

මෙම ක්‍රියාවම දකුණු කකුලින් ද සිදු කරන්න.

දකුණු අතට වෙර ගෙන, මිට මොලවා අතේ බරක් ඇති විටෙක මෙන් සෙමෙන් පොළොවෙන් අඟල් 2-3 ක් පමණ ඉහළට ඔසවා එකේ සිට පහ දක්වා ගැන, අත පහළට වැටෙන්නට සලස්වන්න.

මෙය ම වම් අතට ද කරන්න.

දෑස් වසාගෙන, දෙපයේ මහපටැඟිලි දෙස බැලීමට මෙන් හිස ඔසවා එකේ සිට පහ දක්වා ගනිමින් සිට යළි සෙමෙන් පොළොවෙහි තබන්න.

දෙපයින් හා උරහිසින් වෙර ගෙන, උකුළ පෙදෙස පොළොවෙන් ඉහළට ඔසවාගෙන එකේ සිට පහ දක්වා ගනිමින් සිට යළි එම පෙදෙස පොළොවට පතිත වන්නට ඉඩ හරින්න.

දැන් ඔබගේ සිහිය දකුණු කකුලේ මහපටැඟිල්ලට ගෙනියන්න. එතැන්පටන් කකුලේ ඇඟිලි, යටිපතුළ, පිටිපතුළ, විළුඹ, වළලුකර, බත්කෙණ්ඩ ආදී ලෙසට කකුලේ සෑම මාංසපේශියක් ම නම් කරමින් එයට ඉහිල් වන ලෙස සිතින් අණ කරන්න.

'යටි පතුළ ඉහිල්වන්න... යටි පතුළ ඉහිල්වන්න..' යනුවෙන් කීප විටක් හිතෙන් කියන්න. මෙලෙසින් දකුණු කකුලේ සියලුම මාංසපේශීන්ට ඉහිල් වන්නට කියමින් ඔබගේ අවධානය කකුල දිගේ උකුළ ප්‍රදේශයට රැගෙන එන්න. කකුලේ බර පොළොවට දැනෙන ආකාරය සිහිකර ගන්න. දැන් දකුණු කකුල පිළිබඳ සිහිය ඔබගේ නාභියට මඳක් පහළට ගෙනවිත් නතර කරන්න.

උපදෙස්

කළමනාකරණ උපදේශක

දීපාල් සූරියආරච්චි

2019/12/23 තරුණි බලන්න