ඔස්ට්‍රේලියාවේ ගිනිකොනදිග ක්වීන්ස්ලන්තයෙන් අපූරු පුවතක් වාර්තා වෙනවා. නිකී ඇන්ට්‍රම් මේ අපූරු කතාවේ කතා නායිකාවයි. ක්වීන්ස්ලන්තයේ ජීවත් වෙන

නිකී ඇන්ට්‍රම් ඇගේ ආබාධිත පුතු ජිමී ඇන්ට්‍රම්ට දක්වන මවු සෙනෙහස සැමටම සෙනෙහෙබර පණිවිඩයක් ගෙන එනවා. තනි වූ මවක් ලෙස තම දරුවා කෙරෙහි දක්වන නොමැකෙන සහ නොසැලෙන කැපවීම නිරූපණය කරන මෙම මව-පුතු දෙදෙනාගේ කතාව හද උණුසුම් කරන්නක්.

මිනිසුන් වශයෙන්, ත්‍රාසජනක හැඟීම් වර්ධනය වීම සහ උද්යෝගිමත් අත්දැකීම් සඳහා ආශා කිරීම සාමාන්‍ය දෙයක්. නමුත් මේ මව සහ පුතු සම්බන්ධයෙන් ගත් කළ, එය ඔවුන්ගේ සම්බන්ධතාවය ශක්තිමත්කර ඔවුන්ගේ ජීවිතයට නව අරුතක් ලබා දුන් එක දෙයක් බවට පත් වුණා.

ජිමීව ඇගේ හදවතට සහ නි‍ෙවසට පිළිගන්නා විට නිකී යන්තම් 17 වැනි වියේ පසු වුණා. තම පුතුට මානසික හා කායික දුබලතා ඇති බවත්, දැඩි සත්කාර සහ සහයෝගය අවශ්‍ය බවත් ඇයට වැටහුණේ කාලයාගේ ඇවෑමෙන්.

ජිමීට මාස දෙකක් වයසැති විට, ඔහු අන්ධ බව නිකී සොයා ගත්තා. පළමු වරට මවක් වූ සහ මාතෘත්වය ගැන කිසිවක් නොදන්නා නව යොවුන් වියේ පසුවන ඇය, පවතින තත්ත්වයේ විශාලත්වය සහ එය දිගු කාලීනව ඇයට සහ ජිමීගේ ජීවිතයට බලපාන ආකාරය පිළිබඳව සම්පූර්ණයෙන් දැන සිටියේ නැහැ.

මාස හයකට ආසන්න කාලයකට පසු, නිකී තම ආදරණීය දරුවාට අපස්මාරය වැළඳී ඇති බව සොයා ගත්තා. නමුත් සියල්ල තිබියදීත්, දුෂ්කරතා හමුවේ කිසිවක් අත් නොහරින බවට පොරොන්දු වූ ඇය තමාට සහ තම පුතාට පොරොන්දුවක් දුන්නා.

එය ඇය ඉටු කිරීමට අදහස් කළ පොරොන්දුවක්. තම පුතුට කිසිවක් මග හැරීමට අකැමැති වූ ඇය, විනෝදයෙන්, වික්‍රමාන්විතයෙන් සහ නව අත්දැකීම්වලින් පිරුණු ජීවිතයක් ගත කළ හැකි හොඳම ජීවිතය ඔහුට ලබා දීමට පොරොන්දු වූවා.

නිකී සහ ජිමී එක්ව බාලි සහ හවායි වැනි සිත් ඇදගන්නා ස්ථාන වෙත ගොස් ඇති අතර, කොරෝනා වෛරස් වසංගතය ලෝකයට බලපෑ නිසා සංචාරක සීමා කිරීම් දැන් යම්තරමකට මඟ හැරී තිබෙනවා.ජාත්‍යන්තර දේශසීමා නැවත විවෘත වනතුරු, ජිමී තම සංචාරක සහකරු ලෙස ඕස්ට්‍රේලියාව ගවේෂණය කිරීමට සැලසුම්කර ඇති බව නිකී පැවසුවා.

තම පුතාව පිටේ තබාගෙන, නිකී වසර ගණනාවක් පුරා ලෝකය පුරා ඇවිදිමින්, සමහර විට තැනිතලාවල ඇවිදිමින් සහ තවත් විටෙක කඳුකරයේ ඇවිදිමින් සිටිනවා. සන්ෂයින් කෝස්ට් පවුල සතුව ඔවුන්ගේ අද්විතීය සංචාරක දිනපොත් ඡායාරූප සහ වීඩියෝ එකතුවක් තිබෙනවා.

ජිමීට තම මව සමඟ ඔවුන්ගේ බොහෝ වික්‍රමාන්විතයන් සඳහා යන අතරතුර භාවිත කළ හැකි රෝද පුටුවක් තිබුණද, නිකී පවසන්නේ ඇය එය භාවිත කිරීමට අකැමැති බවයි. තම පුතුට ඔහුගේ බර දරා ගැනීමට තරම් ශක්තිමත් වනතෙක් ඇය දිගටම ඔහු ඔසවා රැගෙන යන බව ඇය වැඩිදුරටත් පවසනවා. ජිමීට තම මවගේ සහයෝගය සහ උපකාරය නිසා පයින් කෙටි දුරක් පවා ගමන් කළ හැකියි.

ඔවුන්ගේ කාලයෙන් උපරිම ප්‍රයෝජන ගැනීමට අවශ්‍ය නිසා, නිකී ඔවුන්ගේ ගමන සඳහා ගමන් විස්තරයක් සහ කාලසටහනක් ඇතුළුව සියල්ල හොඳින් සැලසුම් කරනවා. බෑග්වල ඔවුන් සඳහා ඇඳුම්, ඩයපර්, කොට්ට ආවරණ සහ ඇඳ ඇතිරිලි ඇති බව සහතික කරගන්නවා. දරුවාට වඩා සුවපහසු නවාතැන් තෝරා ගැනීමටත් ඇය ප්‍රවේසම්. පුතු ජලය ආශ්‍රිත ක්‍රියාකාරකම් වඩා ප්‍රිය කරන බවයි ඇය පවසන්නේ.

ජිමී රැකබලා ගැනීම්, ගෙදර දොරේ වැඩ කළමනාකරණය කිරීම සහ ඇගේ ව්‍යායාම කිරීම්, රැකියාව ආදී සියල්ලටම නිකී කෙසේ හෝ වෙලාව සොයා ගන්නවා.

ජීවිතය අත් හැර දැමිය යුත්තක් නෙවෙයි. මේ අම්මාත් පුතාත් ලෝකයට කියන්නේ ඒ කතාව මිස අන් කිසිවක්ම නෙවෙයි.