දිනෙන් දින කල් දමන විභාග නිසා අපේ රටේ සිසු දරුවන් පුදුමාකාර පීඩනයකට ලක් වෙලා. මේ ආතතිය නිසා එදිනෙදා සාමාන්‍ය පරිදි කටයුතු කිරීමත් ඔවුන්ට ඉතා අපහසු කටයුත්තක්.

ගෙවුණු වකවානුවේ කොවිඩ් වසංගතය, ආර්ථික අවපාත, උද්ධමනය ආදිය නිසා අධ්‍යාපනය ආශ්‍රිත මානසික සෞඛ්‍ය ගැටලු අතිශයින් වැඩි වෙලා. මේ ගැටලු සඳහා උපකාර පතන විශ්වවිද්‍යාල සහ පාසල් සිසුන්ගේ වාර්ෂික වැඩිවීමක් ද දක්නට ලැබේ. එබැවින් වෙන කවරදාටත් වඩා අපේ දරුවන් පීඩනයකට ලක්ව සිටින බව පැහැදිලිය.

ඒ නිසා අතිශය ආතති සහගත මේ විභාග කාලසීමාව තුළ ඔබට පුංචි උපදෙස් සහ යෝජනා කිහිපයක් ලබා දෙන්නයි මේ සූදානම.

 හොඳින් හුස්ම ගන්න. හුස්ම ගැනීමේ ව්‍යායාම හෝ මිනිත්තු 10 ක් පමණ සිහි කල්පනාව පුහුණු කිරීමට දිනපතා මිනිත්තු කිහිපයක් වෙන් කරන්න. ඔබේ ශරීරයේ ආතති ප්‍රතිචාරය සන්සුන් කිරීමට මෙන්ම ඔබේ අවධානය වර්තමාන මොහොත වෙත යොමු කිරීමට මෙය උපකාරී වේ. එමෙන්ම මෙය ඔබේ කනස්සල්ල ගැන තාර්කිකව සිතීමටත්, උපකාරක නොවන සිතුවිලි රටාවන්ගෙන් මිදීමටත්, විභාග විශාල සංඛ්‍යාවක් සමඟ කටයුතු කිරීමට සහ වඩාත් ඵලදායීව පාඩම් ආරම්භ කිරීමටත් කාලය ලබා දේ.

 හොඳින් ආහාර ගන්න. නිදාගන්න සහ ව්‍යායාම කරන්න. සම්පූර්ණ රාත්‍රියම නොනිදා සිටීම, පෝෂණ ගුණයෙන් අඩු දුර්වල ආහාර වේලක් ගැනීම සහ ඔබේ දවසට අවම චලනයන් ලබා දීම නිසා කාංසාවේ රෝග ලක්ෂණ ඇති විය හැකියි. ඔබ දන්නවා ද? ශරීරයේ හොඳම කාර්යය සාධනය සඳහා පැය 8ක 9ක නින්දක් සේම, ප්‍රමාණවත් තරම් කාබෝහයිඩ්‍රේට්, ප්‍රෝටීන් සහ මේද ලබා ගත යුතුය. එමෙන්ම අඩු කැෆේන් සහ වැඩි ජලය භාවිතයත්, දිනකට අවම වශයෙන් පැය භාගයක් ව්‍යායාම කිරීමටත් වග බලා ගන්න.

 යථාර්ථවාදී ඉලක්ක තබා ගන්න. ඔබේ විභාගයට සති කිහිපයක්, දින කිහිපයක් හෝ පැය කිහිපයක් තිබියදී මේ යථාර්ථවාදී ඉලක්ක තබා ගැනීම තුළින් සෑම දෙයකම ඉදිරිය දර්ශනය කිරීමට උපකාරී වේ. ඔබ සතුව ඇති ශක්තිමත් බව මේ වැඩ කිරීම මගින් ඔබේ ඵලදායිතා උපරිමයට නංවා ගත හැකියි.

 මම තනියම දිනනවා යන සිතුවිල්ලෙන් බැහැර වෙන්න. සම වයසේ මිතුරන් සමඟ එක්ව වැඩ කරන්න. එය ඉතා ඵලදායී අධ්‍යයන ක්‍රමයක් වන අතර එමඟින් පුද්ගලයන්ට තමන්ගේම සටහන් වඩා හොඳින් අවශෝෂණය කර ගැනීමට ඉඩ සලසයි. එමඟින් වඩා හොඳ විශ්වාසයක් සහ ස්වයං පාලනයක් ඇති වේ.

 කිසිසේත්ම විභාගයට බය වෙන්න එපා. මන්ද විභාග භීතිය සිසුන් අතර සුලබ දෙයකි. ඔබ ඕනෑම අවස්ථාවක එය අත්විඳින්නේ නම් ඉක්මනින් ගැඹුරු හුස්මක් ගන්න. ඉන්පසු ගැටලුව ගැන නැවත සිතන්න. අනතුරුව එය කළමනාකරණය කළ හැකි කොටස් කිහිපයකට කඩා ගන්න. බැලූ බැල්මට නොපෙනුණත්, සෑම ගැටලුවකටම තාර්කික විසඳුමක් ඇති බව මතක තබා ගන්න.

 ඔබ ඔබ ගැනම විශ්වාස කරන්න. මන්ද නව අභියෝගවලට නිරන්තරයෙන් මුහුණ දෙන විට, අප කොපමණ දුරක් පැමිණ තිබේද සහ අප දැනටමත් අත්කර ගෙන ඇති දේ දෙස ආපසු හැරී බැලීමට අපට බොහෝ විට අමතක වේ. ඔබ හොඳින් සූදානම් වී ඇති බැවින්, ඔබට කරදර වීමට හේතුවක් නොතිබිය යුතුය. එමනිසා, සෘණාත්මක චින්තනයක් අත්විඳින විට, එය ධනාත්මක එකක් සමඟ ප්‍රතිස්ථාපනය කිරීමට උත්සාහ කරන්න. උදාහරණයක් ලෙස,

"මට අඩුම තරමින් 2:1 වත් නොලැබුණහොත්, මම අසාර්ථකයි කියා සිතනවා වෙනුවට, මට ලැබෙන ඕනෑම දෙයක්, මම මා පිළිබඳ ආඩම්බර වන අතර, මම දැනටමත් ලබා ඇති දේ අගය කරමි." යනුවෙන් සිතන්න. අනිවාර්යයෙන්ම ඔබට එය කළ හැකියි.

 ඔබට ආතතිය තනිව කළමනාකරණය කර ගත නොහැකි බව හැඟේ නම්, යමකු සමඟ මේ පිළිබඳ කතා කරන්න. එලෙස කතා කිරීම හෝ උදවු ඉල්ලීම කිසිවිටෙක ලැජ්ජාවට කරුණක් නොවේ. ඔබට හැඟෙන ආකාරය පිළිබඳ සමීපතමයකු සමඟ හෝ මිතුරකු එහෙමත් නැතිනම් පවුලේ සාමාජිකයන් සමඟ කතා කරන්න. විකල්පයක් ලෙස, වෘත්තීය උපකාර සහ සහාය ලබා ගැනීමටත් කිසි විටෙකත් බිය නොවන්න.

ඉෂානි කාරියවසම් ව්‍යවහාරික මනෝවිද්‍යාඥ,

ශ්‍රී ලංකා තාක්ෂණ විශ්වවිද්‍යාලය, පාදුක්ක