සම මත ඇති වන විවිධ ගැටලු අතර ඉන්නන් (Warts) යනු බොහෝ දෙනෙකු පීඩාවට පත් කරන තත්ත්වයකි. මෙය හුදෙක් රූපලාවණ්ය ගැටලුවක් පමණක් නොව, ඇතැම් විට වේදනාකාරී මෙන්ම වයිරසයක් මඟින් ශරීරය පුරා පැතිර යා හැකි තත්ත්වයකි. මෙම ලිපියෙන් ඉන්නන් ඇති වීමට හේතු, ඒවායේ විවිධත්වය, වෛද්ය ප්රතිකාර සහ නිවෙසේදී අනුගමනය කළ හැකි ආරක්ෂිත පියවර පිළිබඳව දීර්ඝව සාකච්ඡා කෙරේ.
මොනවාද මේ ඉන්නන්?
ඉන්නන් යනු මානව පැපිලෝමා වයිරසය (Human Papillomavirus – HPV) මඟින් සමේ මතුපිට ස්ථරයේ ඇති කරන කුඩා, ගැට ගැසුණු වර්ධනයන් වේ. මෙම වයිරසය සමේ සෛල වේගයෙන් වර්ධනය වීමට පොළඹවන අතර, එහි ප්රතිඵලයක් ලෙස රළු ස්වභාවයෙන් යුත් ගැටිති ඇති වේ. ඉන්නන් පරම්පරාවෙන් පරම්පරාවට සම්ප්රේෂණය වීමේ ප්රවණතාවක් ද පවතින අතර, ප්රතිශක්තිකරණ පද්ධතියේ ස්වාභාවය අනුව පුද්ගලයාගෙන් පුද්ගලයාට මෙහි බලපෑම වෙනස් විය හැකිය.
වෛද්ය ප්රතිකාර (Medical Treatments)
ඉන්නන් ඉවත් කිරීමේදී වඩාත් නිවැරදි සහ ආරක්ෂිත ක්රමය වන්නේ සුදුසුකම් ලත් චර්ම රෝග වෛද්යවරයකුගේ (Dermatologist) උපදෙස් ලබා ගැනීමයි. විශේෂයෙන්ම මුහුණේ හෝ සංවේදී ප්රදේශවල ඉන්නන් ඇති විට ස්වයං ප්රතිකාර කිරීම බරපතළ අනතුරුවලට මඟ පෑදිය හැකිය.
සැලිසිලික් ඇසිඩ් (Salicylic Acid)
මෙය දියරයක්, ක්රීම් එකක් හෝ ප්ලාස්ටර් එකක් ලෙස ෆාමසිවලින් ලබාගත හැකිය. මෙමඟින් ඉන්නාගේ ඝන වූ සමේ ස්ථර ක්රමයෙන් දිය කර හරියි. මෙය දිනපතා ආලේප කිරීමෙන් සාර්ථක ප්රතිඵල ලබාගත හැකි වුවත්, නීරෝගි සම මත ආලේප නොකිරීමට වගබලා ගත යුතුය.
ශීත කිරීමේ ප්රතිකාරය (Cryotherapy)
මෙහිදී ද්රව නයිට්රජන් (Liquid Nitrogen) භාවිත කර ඉන්නා අධික ලෙස ශීත කර විනාශ කරනු ලැබේ. මෙය ඉතා ඉක්මන් ප්රතිකාර ක්රමයකි.
ලේසර් ප්රතිකාර (Laser Treatment)
අනෙක් ක්රමවලින් සුව නොවන ඉන්නන් සඳහා ලේසර් කිරණ මඟින් ඉන්නාට රුධිරය සපයන කුඩා නාළිකා විනාශ කරනු ලැබේ. එමඟින් පෝෂණය අහිමි වන ඉන්නා ක්රමයෙන් මැරී ගැලවී යයි.
විද්යුත් දහනය (Electrosurgery)
කුඩා විද්යුත් සැරයක් මඟින් ඉන්නා පුලුස්සා ඉවත් කිරීම මෙහිදී සිදු වේ.
ස්වාභාවික සහ දේශීය ප්රතිකාර ක්රම
නිවෙසේ සිටින, රෝහල් කරා යාමට අපහසු කාර්යබහුල කාන්තාවන්ට සහ අනෙකුත් අයට පහත සඳහන් ස්වාභාවික ක්රම අත්හදා බැලිය හැකිය. නමුත් මේවායේදී ඉවසීම ඉතා වැදගත් වේ.
සුදු ලූනු (Garlic)
සුදු ලූනුවල ප්රබල ප්රතිවයිරස (Antiviral) ගුණ අඩංගු වේ. සුදු ලූනු බික් කිහිපයක් ගෙන හොඳින් තළා ඉන්නා මත තබා බැන්ඩේජ් එකක් මඟින් ආවරණය කරන්න. මෙය රැයක් පුරා තබා උදෑසන සෝදා හරින්න. සති කිහිපයක් මෙය කිරීමෙන් වෙනසක් දැකිය හැකිය.
ඇපල් සයිඩර් විනාකිරි (Apple Cider Vinegar)
මෙහි ඇති ආම්ලික ස්වභාවය ඉන්නාගේ පටක විනාශ කිරීමට සමත් වේ. කපු පුලුන් කැබැල්ලක් විනාකිරිවලින් තෙමා ඉන්නා මත පමණක් තබා ටේප් එකකින් අලවා තබන්න. අවට ඇති නීරෝගි සම පිලිස්සීමට ඉඩ ඇති බැවින් ප්රවේසම් වන්න.
කෙසෙල් ලෙලි (Banana Peel)
කෙසෙල් ලෙල්ලේ අභ්යන්තර පැත්තේ ඇති එන්සයිම ඉන්නන් ඉවත් කිරීමට උපකාරී වේ. කෙසෙල් ලෙලි කැබැල්ලක් ඉන්නා මත තබා බැන්ඩේජ් කිරීම දිනපතා සිදු කරන්න.
ඇලෝවේරා (Aloe Vera) සම සුවපත් කිරීමේ ගුණ ඇති ඇලෝවේරා ජෙල් දිනකට වාර කිහිපයක් ආලේප කිරීමෙන් පලුදු වූ සම යථා තත්ත්වයට පත් කරගත හැකිය.
නිවෙසේදී අනුගමනය කළ යුතු ආරක්ෂිත පියවර
ඉන්නන් යනු බෝවන තත්ත්වයක් බැවින්, ඔබේ නිවෙසේ අනෙක් සාමාජිකයන්ට සහ ඔබේම සිරුරේ වෙනත් තැන්වලට පැතිරීම වැළැක්වීමට මෙම උපදෙස් පිළිපදින්න.
කැඩීමෙන් හෝ සීරීමෙන් වළකින්න
ඉන්නන් නියපොත්තෙන් කැඩීමට හෝ කතුරකින් කැපීමට කිසිවිටකත් උත්සාහ නොකරන්න. එවිට වයිරසය අවට සමට පැතිරී තවත් ඉන්නන් රාශියක් මතු විය හැකිය.
පුද්ගලික පිරිසිදුකම
ඉන්නන් ඇති ස්ථානය ස්පර්ශ කළ සෑම විටම දෑත් සබන් යොදා හොඳින් සේදීමට පුරුදු වන්න.
භාණ්ඩ හුවමාරුව
ඔබේ තුවා, පනාව, රේසර් හෝ පාවහන් වැනි දෑ අන් අය සමඟ හුවමාරු කර නොගැනීමට වගබලා ගන්න.
සපත්තු පැලඳීම
පොදු නාන කාමර හෝ පිහිනුම් තටාක අසල ඇවිදීමේදී පාවහන් පැwලඳීමෙන් පතුල්වල ඉන්නන් ඇති වීම වළක්වා ගත හැකිය.
වර්තමානයේ රූපලාවණ්යාගාර තුළදී ද ඉන්නන් පුලුස්සා ඉවත් කිරීමේ (Cauterization) පහසුකම් පවතී. කෙසේ වෙතත්, එවැනි ප්රතිකාරයක් ලබා ගැනීමට පෙර අදාළ ශිල්පියා ඒ පිළිබඳ මනා පුහුණුවක් සහ පළපුරුද්දක් ලබා ඇත්දැයි සොයා බැලීම වැදගත්ය. මෙය ඉතා ඉක්මන් ප්රතිකාරයක් වන අතර සාමාන්යයෙන් දින 4-5ක් ඇතුළත ඉන්නා ගැලවී යයි. නමුත් මුහුණ වැනි සංවේදී ස්ථානවලදී ඉතා ප්රවේසම් විය යුතුය.
ඉන්නන් පවතින්නේ ඔබේ මුහුණේ හෝ ලිංගික ප්රදේශ ආශ්රිතව නම්, කිසිම විටක නිවෙසේදී ස්වයං ප්රතිකාර කිරීමට උත්සාහ නොකරන්න. එවැනි තැන්වල ඇති ඉන්නන් වැරදි ලෙස හැසිරවීමෙන් කැළැල් ඇති වීමට හෝ තත්ත්වය බරපතළ වීමට ඉඩ ඇත. නීරෝගි සමක් පවත්වා ගැනීම සඳහා පිරිසිදුකම මෙන්ම නිවැරදි වෛද්ය උපදෙස් ද අත්යවශ්ය වේ.
ඔබේ සමේ සුන්දරත්වය සහ සෞඛ්යය රැක ගැනීමට අදම නිවැරදි තීරණ ගන්න.
TEXT – සඳකැලුම් පෙරේරා
