අද තරුණී කවරය හැඩවන්නේ ජනප්‍රිය රංගන ශිල්පියකු වූ සාරංග දිසාසේකර සහ රංගන ශිල්පිනී පියුමාලි එදිරිසිංහගේ සොඳුරු රුවෙනි. මේ දිනවල ඉමහත් ප්‍රේක්ෂකාදරය හිමිකරගත් “ආලවන්ති” ටෙලිනාට්‍යයේ පෙම්වතුන් ලෙසින් අපූර්ව රංගනයක නියැළෙන ඔවුන් සමඟ පුංචි කතාබහක යෙදෙන්නටයි මේ සූදානම.

ඉතින් සාරංග මොනවද අලුත් තොරතුරු?

“සුපුරුදු පරිදි කලා කටයුතු එක්ක තමයි කාලය ගත වෙන්නෙ. සතියේ දින පහේම විකාශය වන “ආලවන්ති” ටෙලි නාට්‍යයේ වගේම RAT ටෙලිනාට්‍යයේ කටයුතු කෙරෙනවා. ඊට අමතරව විවිධ කලා කටයුතු සමඟ තමයි ඉතින් අපේ දවස ගත වෙන්නෙ.”

කොහොමද ආලවන්ති?

“ඇත්තටම ඉහළ ප්‍රතිචාර හිමිවෙනවා. මාව බොහොමයක් ටෙලි නිර්මාණ සඳහා දායක කරගත් ශිවගුරුනාදන් මහතාගේ ආරාධනයෙන් තමයි මම ආලවන්ති සමඟ සම්බන්ධ වුණේ. පියුමාලි දිසානායකත් සමඟ රංගනයේ යෙදෙන පළමු අවස්ථාව මෙය. නමුත් නවක රංගන ශිල්පිනියක් බව නොදැනෙන ආකාරයට ඇය හොඳ සහයෝගයක් ලබා දෙනවා.”

ඔබ රංගන ශිල්පියෙක්, ගායකයෙක් වගේම නිවේදකයෙක් විදිහටත් කටයුතු කරනවා.?

“ඔව්. මම පසුගිය කාලයේ එක දිගටම රියැලිටි වැඩසටහනක නිවේදකයකු ලෙසින් කටයුතු කළා. එහි එක් අදියරක් නිමා වූ නිසා ටික කාලයක විවේකයක් ලැබුණා. ඒ නිසා මේ දිනවල නිවේදන කටයුත්තක නම් යෙදෙන්නේ නැහැ.”

අපි ඔයාගේ පුංචි පවුල ගැනත් කතා කරමු.

“මම , දිනක්ෂි, චුටි දූ අපි ඉතින් සතුටින් කාලය ගත කරනවා. දැන් දිනක්ෂි නැවතත් එයාගේ කලා කටයුතු අාරම්භ කළා. ඒ නිසා කාලය කළමනාකරණය කරගෙන හැමදේම කරනවා. චුටි දූ සාරණ්‍යාත් දැන් පෙර පාසල් යනවා. ඉතින් එයාගේ හුරතල් බලබල ඉද්දි දවස ගෙවෙනවා දැනෙන්නෙවත් නෑ.”

ඔබේ ඉදිරි වැඩ කටයුතු පිළිබඳ මතක් කළොත්...

“මේ දවස්වල කරන ටෙලි නාට්‍ය දෙකට අමතරව ඇත්තටම අලුත් වැඩ බාර අරන් නැහැ. නිෂ්පාදන කටයුත්තක් පිළිබඳත් සැලසුම් ටිකක් තියෙනවා. ඒ නිසා ටිකක් කාලය අරගෙන හොඳ නිර්මාණයක් කරන්න බලාපොරොත්තු වෙනවා.”

අනතුරුව අපේ කතාබහට එකතු වුණු ඇය පියුමාලි ප්‍රසාදිනී එදිරිසිංහයි. ඇය රංගනයට පිවිස එතරම් කාලයක් ගත නොවුණත් පියුමාලිට හිමිවන ප්‍රේක්ෂක ප්‍රතිචාරවල නම් අඩුවක් නැහැ.

“ආලවන්ති” කියන්නෙ පියුමාලිගේ පළමු රංගන අත්දැකීම නේද?

“ඇත්තටම “ආලවන්ති” කියන්නෙ මම රංගනයෙන් දායක වුණු පළමු ටෙලි නිර්මාණයයි. හැබැයි “ආලවන්ති” කරලා අවුරුදු 1 1 /2කට විතර පස්සෙදි තමයි විකාශය වීම ඇරඹුවේ. ඊට ටික කාලයකට කළින් මම දෙවනුව රඟපෑ “පාට කුරුල්ලෝ” විකාශය වෙන්න පටන් ගත්තා. ඒ නිසා වැඩිදෙනෙක් හිතන්නේ මගේ රංගනය ඇරඹුණේ පාට කුරුල්ලෝවලින් කියලයි.”

කොහොමද ලැබෙන ප්‍රතිචාර?

“ප්‍රතිචාර නම් ඉතා ඉහළයි. හැමෝම සුබ පතනවා. කතා කරනවා. ක්ෂේත්‍රයේ ප්‍රවීණයෝ හැමෝම මට උදවු කරනවා. විශේෂයෙන්ම මේ ටෙලිනාට්‍ය දෙකේම මගේ පෙම්වතුන් විදිහට රඟපාන ප්‍රවීණ රංගන ශිල්පීන් දෙදෙනකු වන සාරංග සහ සජිත අයියලාගෙන් ලැබෙන සහයෝගය නිසා මගේ රංගන කටයුත්ත වඩාත් පහසු වුණා.”

ඔබ රංගන ක්ෂේත්‍රයට පා තබන්නෙ වෙළෙඳ දැන්වීම් හරහා. ඉතින් අපි ඒ ගැනත් මතක් කරමු.

“2016 වසරේ රූපවාහිනී අවුරුදු කුමාරිය වුණේ මම. නමුත් අධ්‍යාපන කටයුතු නිසා වසර 05ක් පමණ කිසිම නිර්මාණ කටයුත්තකට යොමු නොවුණත් වෙළෙඳ දැන්වීම් සඳහා සහභාගි වුණා. වෙළෙඳ දැන්වීම් 35කට වැඩි ප්‍රමාණයකට මේ වනවිට මම දායකත්වය ලබා දී තිබෙනවා.”

ඔය අතරතුරේ තමයි “ආලවන්ති” ටෙලි නාට්‍යයට චාමර අයියා කතා කළේ. ස්ක්‍රීන් ටෙස්ට් එකෙන් පස්සෙ ප්‍රධාන චරිතයක් කිව්වහම නම් මට බය හිතුණා. මොකද රඟපෑමේ අත්දැකීම් මට නැති නිසා. හැබැයි සතියක්, දෙකක් යනකොට බය ටික ටික අඩුවෙලා හරිම අාසාවක් ආවා. මේ ටෙලිනාට්‍යය ටික දුරක් කරගෙන යද්දි තමයි “පාට කුරුල්ලෝ” චරිතය ලැබුණේ. මොකද මේ ටෙලිනාට්‍ය දෙකම කරන්නෙ එකම නිෂ්පාදන කණ්ඩායමක්.”

අලුත් නිර්මාණවලටත් ඉල්ලීම් ගලාගෙන එනවා නේද?

“ඔව්... ඔව්... ආරාධනා කිහිපයක්ම ලැබුණා. මේ අවුරුද්දෙ රූගත කරන අලුත් චිත්‍රපටයකටත් ආරාධනා ලැබුණා. ඉතින් තෝරා බේරාගෙන මේ ක්ෂේත්‍රයේ හොඳ ගමනක් යන්න හිතනවා.”

මේ හැමදේම පිටුපස්සෙන් ඉන්න පවුලේ අය ගැනත් කතා නොකරම බැහැ නේද?

“අනේ ඔව්. මගේ මුල්ම ප්‍රේක්ෂකයෝ තමයි පවුලේ උදවිය. මගේ තාත්තා විශ්‍රාමික යුද හමුදා නිලධාරියෙක්. අම්මා ගෘහණියක්. මගේ ලොකු නංගි සිත්මි එදිරිසිංහත් රංගනයට සම්බන්ධයි. චූටි නංගි තාමත් පාසල් යනවා. අපේ පවුලේ හැමෝම කලාවට හරිම ළැදි අය. විශේෂයෙන්ම අම්මා තමයි හැමදේකටම මගේ පිටුපස්සෙන් ඉඳන් උදවු කරන්නෙ. ඒ වගේම මගේ පෙම්වතාගෙන් ලැබෙන සහයෝගය ගැනත් අමතක කරන්නම බෑ. ඔහු මගේ ඉදිරි ගමනට ලොකු ශක්තියක්.”

[email protected]

ඡායාරූප - ප්‍රමුදිත දිසානායක