බිල් සාක්ෂි අසුනෙන් බැස ගිය පසු එහි කැඳවූයේ බෙට්සිය. ඇය ඉල්ලා සිටියේ ද මා හට දැරිය දකින්නට අවසර ලබා නොදෙන ලෙසටය.

"හෙට පටන් මේරි බෙත් හට දැරිය දැකීමට ඉඩ ලබා නොදෙනවා නම් කිහිප දවසකින් ඇයට සියල්ල අමතකව යාවි. මෙලිස්සා දැනුම් තේරුම් ඇති තරුණ දියණියක වූ පසු ඔවුන් මුණගැස්වීම වඩා හොඳ යැයි මා ප්‍රකාශ කර සිටිනවා."

"මා මේරි ගැන හොඳින් දන්නවා. ඇය තමාට අවශ්‍ය දේ ලබා ගන්නට ඕනෑම දෙයක් කරාවි. ඕනෑම බොරුවක් කියාවි. ඇය වංචාකාරියක්?"

බෙට්සි තවදුරටත් කතා කළේ දෑත් වෙවුලද්දීය. ඇගේ දෙතොල දැඩි වී තිබිණි.

"මගේ සිතේ ඇය ගැන ගෞරවයක් ඇත්තේම නෑ. කිසිදාක ඇය මගේ යෙහෙළියක වන්නේත් නෑ. අප දෙදෙනා අතර කිසියම් ආකාරයක හෝ සමානකමක් ඇත්තේත් නෑ. අප දෙපසකට යන දෙදෙනකු පමණයි. දැරියගේ භාරකාරත්වය හේතුවක් කොටගෙන ඇය අපට රහසේ හානි කරාවි."

"හානි කරාවි යන වචනය පැහැදිලි කරන්න."

මගේ උරහිසට තට්ටු කොට සෙමෙන් පැවසු ජොයෙල් සීගල් නම් නීතිඥවරයා බෙට්සි කරා ඇවිද ගියේය. ජොයෙල් යනු හැරල්ඩ් කැසිඩි ආයතනයෙන් මා වෙනුවෙන් පත්කළ උපදේශකයා ද වූයේය. අනතුරුව ඔහු බෙට්සිගෙන් ප්‍රශ්න ඇසීම ආරම්භ කළේය.

"ආචාර්ය ස්ටර්න් ඔබ දන්නවා ද මේරි බෙත් මහත්මියටත් අයිතිවාසිකම් කියා යමක් තිබෙන බව?"

"ඔව්. ඒ පිළිබඳව ඉහළ උසාවියෙන් මා දැනගත්තා."

"ඇගේ ඒ අයිතිවාසිකම් ඔබට කිසිදා හෝ අදාළ වෙනවා ද? ඒවා වඩාත් වැදගත් වන්නේ මේ අවදියේදී නොවේ ද? දැරිය වෙනුවෙන් ඇයට කළ හැකි සියල්ල ඔබටත් කළ හැකි ද?"

"මා ඒ සියලු දේ පිළිබඳව සලකා බලමින් සිටිනවා. නමුත් මෙතැන විශාල රික්තයක් තිබෙනවා සීගල් මහත්මයා. අපට මේරි බෙත් විශ්වාස කටයුතු ගැහැනියක් නෙමෙයි."

"ස්ටර්න් ආචාර්යතුමිය"

සීගල් කතා කළේ මහත් ඉවසීමෙන් යුක්තවය.

"මෙතන අපට ගත හැකි හොඳම ප්‍රතිඵලය හැටියට මා දකින්නේ ඔබ තිදෙනාගේම අන්‍යෝන්‍ය සම්බන්ධතාවයයි. බිල්, මේරි සහ ඔබ යන තිදෙනා වෙන් වෙන්ව සිටින කල මෙම ප්‍රශ්නයට නිසි විසඳුමක් ලැබේවි ද? නැහැ නේද?"

බෙට්සි හිස සැලුවේ ඊට සම්පූර්ණ විරුද්ධත්වය ප්‍රකාශ කරමිනි.

"මා හිතන්නේ එවැන්නක් කිසිදාක සිදු නොවේවි. මා ඇය විශ්වාස කරන්නේ නැහැ කොහෙත්ම, ඇය බොරුකාරියක්."

"ස්ටර්න් මහත්මිය, ඔබ කියනවා, මේරි බොරුකාරියක් බව. ඔබේ සැමියාත් එසේ කියනවා. නමුත් ඔහු පවසනවා මේරි බෙත් දරුවා දකින්නට පැමිණීමේ අවාසි සහගත තත්ත්වයක් නැති බව. එතකොට ඔබේ සැමියාත් බොරුකාරයෙක් නොවේ ද? ඔබ කියනවා දැරිය අනෙක් හැම දරුවකුම හා සමාන විය යුතු බව. ඒ අතර ඔබ බියපත්ව සිටිනවා. ඈ විකාරරූපී මනසක් සහිතව උස් මහත් වේද කියලා. මේරි දැරිය බලන්නට ආවා යැයි ඇය සාමාන්‍ය දැරියක් බවට පත් නොවෙනවා ද? තමාගේ ස්වාභාවික මවුපියන් නොදැන සිටීමෙන් නොවේ ද? ඇය මේ පරිසරයේ අනෙක් දරුවන්ගෙන් වෙනස් වන්නේ?"

"උසාවිය මා දකින්නේ කොහොම දැයි මා දන්නේ නෑ."

පිළිතුරු දෙන අතරේ බෙට්සි තදින් දෑස පියාගත්තේ සත්‍යය දකින්නට ඇය අකැමැතිවා සේය. "නීතියේ ඇස්වලට මා කුඩම්මා කෙනෙක්, භාරකාර මවක් විය හැකියි. නමුත් මගේ මුළු හදවතින්ම මම මෙලිස්සාගේ මව."

පිළිතුරු දෙන අතරේ ඇගේ මුහුණ ලිහා වැටුණා සේ විය. මුව මඳක් විවරව තිබුණේ අඬන්නට වාගේය.

"මට තේරුම්ගන්නට බැරි යමක් තිබෙනවා. ඒ මේරි බෙත් කුඩා මෙලිස්සා දකින්නට පැමිණීමෙන් දැරියට ලැබෙන වාසිය කුමක් ද යන වග."

ජොයෙල් සීගල් තවදුරටත් බෙට්සිගෙන් ප්‍රශ්න විචාරන්නට උත්සාහ කළ ද විනිසුරු ඊට නොකැමැත්ත පළ කළේය. ඔහු බොහෝ සේ වෙහෙසව සිටි බවක් පෙනෙන්නට තිබිණි. අප සැවොම සිටියේ ඔහු සේ ම වෙහෙසකර සිතුවිලි තුළය.

බිල් සහ බෙට්සිගෙන් සාක්ෂි විමසීම, එදිනට, එතැනින් නිමාවට පත් විණි.

සාරාගේ නඩුව ඔස්සේ මා වෙතට එල්ල වූ නින්දා, අපහාස, වාග් ප්‍රහාර අප්‍රමාණය. එවන් පසුබිමක් තිබියදී මා සන්සුන්ව සිටින්නේ කෙසේ, දැයි බොහෝ අය මගෙන් විමසූහ. මගේ අලුත් විවාහ ජීවිතය තුළින් මා ලද මානසික තෘප්තිය සහ සංතෘප්තිය ද ඊට හේතු වූ බව නිසැකය. ඒ හැරුණු විට මාතෘත්වයේ සතුට සහ වේදනාව නැවත වතාවක් අත්දකින්නට දෙවැනි විවාහය තුළින් මා හට ඉඩ ප්‍රස්තා සැලසී තිබිණි. ඒ කෙසේ වෙතත් මගේ ජීවිතයේ සිටියේ ද සිටින්නේ ද එකම එක සාරා කෙනෙක් පමණකි.

ඉහළ උසාවිය මා දෙස සාධාරණ ඇසකින් බලමින් කටයුතු කිරීම මගේ සිත තවදුරටත් සන්සුන් හා සමහන් කළේය. මා වෙතින් ගිලිහී යමින් තිබූ ආත්ම ගෞරවය නැවත ගොඩනංවාලමින් පක්ෂපාතීත්වයෙන් තොරව නඩු කටයුතු සිදු කෙරෙමින් පැවතිණි. ස්ටර්න් යුවළ මා වෙත ගසා දැමූ ගල් මුල් නොසලකා හරිමින් මම මා හඳුනා ගනිමින් සිටියෙමි. මගේ ආත්මය නැවත විනාශ කරන්නට ඔවුනට නොහැකි වනු ඇත.