ගන්නා ආහාර වේලේ පෝෂණය ගැන වඩාත් විමසිලිමත් විය යුත්තේ කිරි, කිරි ආහාර, බිත්තර කිසිවක් ආහාරයට නො ගන්නා අය ය. මේ අයට මඟ හැරෙන ප්‍රෝටීන අවශ්‍යතාව සපුරා ගැනීමට වැඩිපුර ඇට වර්ග කෑමට ගත යුතුයි.

ගිනි පෙට්ටියක තරම් මාළු කැබැල්ලකින් ලැබෙන ඇමයිනෝ අම්ල ප්‍රමාණය ලබා ගැනීමට කවිපි, මුං, කඩල, සෝයා වැනි ආහාර ගිනි පෙට්ටියක් මෙන් තුන් හතර ගුණයක ප්‍රමාණයෙන් ගත යුතුයි.

සම්පූර්ණයෙන් ම නිර්මාංස අයට වාටමින් බී 12 ලැබෙන්නේ නැත. එවිට කලක් ගත වෙන විට ස්නායු පද්ධතියට බලපෑම් ඇති වෙයි. නීරක්තිය වැනි ගැටලු මතුවෙයි. මේ විටමිනය පෙති මඟින් ලබාගත නො හැකියි. ලබාගත හැක්කේ එන්නත් මඟින් ම පමණි.

මස්මාංස වැඩිපුර කෑමට ගන්නා අයට වඩා නිර්මාංස අයට විටමින් සී, ඊ, තන්තු , ෆෝලික් අම්ලය, පොටෑසියම්, මැග්නීසියම්, ශාක රසායන (ෆයිටොකෙමිකල්ස්) සිරුරට ලබාගත හැකිය. මේවායින් අහිතකර කොලෙස්ටරෝල් අඩුවෙයි. අධි රුධිර පීඩනය අඩු වෙයි. ස්ථුල වන්නේ නැත. පහසුවෙන් ම බෝ නොවන රෝග රැසකින් ම බේරී සිටීමට හැකිවෙයි.

සම්බුදු සිසිලසෙන් නැහැවෙන මේ කාලයේ වැඩි දෙනෙක් නිර්මාංස ආහාර වේලක රස බලන්නේ අප සම්මා සම්බුදු හිමියන් කුරාකුහුඹුවාටත් ජීවිත දානය දුන් අහිංසාවාදයේ ප්‍රතිමූර්තිය වූ බැවිනි.

කාලයක් පුරා කළ අධ්‍යයනවලින් හෙළිවී ඇත්තේ නිර්මාංස වීම කෙනකු ගේ සෞඛ්‍ය තත්ත්වය ඉහළ නංවන කරුණක් බවය. පෝෂණ විශේෂඥයන් පෙන්වා දෙන අන්දමට දීර්ඝායු ලැබීමට නම් අප ප්‍රමුඛතාව දිය යුත්තේ ශාකමය ආහාරපානවලටය. ඇට වර්ග, පොත්ත සහිත ධාන්‍ය, එළවළු, ඔලිව් තෙල්, පලතුරු කෙනකුට දීර්ඝායු ගෙන දෙන ආහාර අතර ප්‍රධානය. රතු මස් හා මාංසමය ආහාර, ආහාර පිඟානෙන් සියයට සියයක් ම කප්පාදු කරන තරමට ලෙඩ දුක් අඩු වෙයි. සමහර මාළු වර්ග හා කුකුළු මස් පෝෂණවේදීන් ගේ මනාපය ලැබූ ආහාර වට්ටෝරුවේ අඩංගු වී තිබෙයි. ශාකමය ආහාර පාදක කර ගත් මෙඩිටරේනියන් ආහාර රටාව දැන් ලොව වඩාත් ම පිළිගත් ආහාර රටාව වෙයි. නිර්මාංස වීම මොන තරම් වැදගත්ද ?

"අපි නිර්මාංසිකයි" කියා පැවසුවත් මේ නිර්මාංස වීම පුද්ගලයාගෙන් පුද්ගලයාට වෙනස් වෙයි. මස්මාංස පමණක් නොව බිත්තර, කිරි ආහාර පවා ආහාරයට නො ගන්නා පිරිස් සිටිති. තවත් අය බිත්තර කෑමට ගනියි.

අපට ශක්තිය ලබා දෙන්නේ බත්, කුරක්කන්, බඩඉරිඟු, තිරිඟු වැනි ධාන්‍ය වර්ගය. ඒ වාගේ ම අල, බතල, කොස්, දෙල් මඟින් ද ශක්තිය ලැබෙයි. තෙල් නැත්නම් මේදය ද සිරුරට අත්‍යවශ්‍යය. සිරුර ආරක්ෂා කරන විටමින්, ඛනිජ ලවණ, ප්‍රතිඔක්සිකාරක,තන්තු එළවළු, පලතුරු, පලා වර්ගවල යහමින් අඩංගුය. සිරුරේ වර්ධනයට, ගෙවී ගිය කොටස් අලුත් වැඩියාවට අවශ්‍ය වර්ධක ආහාරය වන ප්‍රෝටීන වැඩිපුර ම අඩංගු වන්නේ මස්, මාළුවල ය. මේවායේ සිරුරට නැතිව ම බැරි ඇමයිනෝ අම්ල අඩංගුය. ඇමයිනෝ අම්ල සිරුරේ නිපදවන්නක් නො වෙයි. ඒවා ආහාර මඟින් ම ලබා ගත යුතුය. කුඩා මාළු කැබැල්ලක අඩංගු ඇමයිනෝ අම්ල ප්‍රමාණය ලබා ගැනීමට මාළු කැබැල්ල මෙන් තුන් හතර ගුණයක ශාක ප්‍රෝටීන අඩංගු මුං ඇට, කව්පි, පරිප්පු, සෝයා ආදිය කෑමට ගත යුතුයි

ඒ වගේ ම විටමින් B 12 වැනි සමහර විටමින් වර්ග ඔමෙගා 3 වැනි මේද අම්ල වර්ග ලබාගත හැක්කේ ද සත්ත්ව ආහාර මඟිනි.

නිර්මාංස එනම් ශාකමය ආහාර ගන්නා අයට කිරි හා කිරි අඩංගු ආහාර ගැනීමෙන් ඒ අඩුව සපුරා ගත හැකිය. එවිට විටමින් B 12 ඌනතාවක් ද ඇති නො වෙයි. කිරි, කිරි අඩංගු ආහාර සමඟ වැඩිපුර කව්පි, කඩල, මුං, පරිප්පු, සෝයා වැනි මාංස භෝග ගත යුතුයි. මස්, මාළු ආහාරයට නො ගත්තත් බිත්තර ආහාරයට ගන්නා අයට ද පෝෂණ ඌනතාවක් ඇති නො වෙයි.

ඇට වර්ග, එළවළු, පලාවල යකඩ තිබුණ ද ඒවා සිරුට උරා ගන්නේ (අවශෝෂණය වන්නේ) මඳ වශයෙනි. ඇඹුල්, උම්බලකඩ එක් කිරීමෙන් එවැනි ආහාරවල අඩංගු යකඩ වැඩිපුර උරා ගැනීමට අන්ත්‍රවලට හැකියාවක් ලැබෙයි.

උපදෙස් -

සෞඛ්‍ය අමාත්‍යංශයේ

බෝ නො වන රෝග ඒකකයේ ප්‍රජා වෛද්‍ය විශේෂඥ ශාන්ති ගුණවර්ධන