අද බෙහෙත් පෙත්තක් නොබොන කෙනෙක් හොයාගන්නත් නැති තරම්ය. විශේෂයෙන්ම රුධිර පීඩනය, දියවැඩියාව, හෘද රෝග, කොලෙස්ටරෝල්, විටමින් අඩුවීම්, අස්ථි රෝග, මෙන්ම වෙනත් දිගුකාලීන රෝග තත්ත්වයන් සඳහා නියමිත වේලාවට බෙහෙත් ගැනීම ඉතා වැදගත්ය. වෛද්යවරයකුගේ උපදෙස් මත බෙහෙත් නිවැරදි ලෙස හා නියමිත වේලාවට ගැනීම රෝග පාලනයට අත්යවශ්ය බව වෛද්යවරු පවසති. නමුත් කාර්යබහුල ජීවන රටාව, මතකය අඩුවීම, වයස්ගත වීම හෝ බෙහෙත් වර්ග බොහෝ ගණනක් නිසා බෙහෙත් අමතක වීම, වැරදි බෙහෙත් ගැනීම, දෙවරක් ගැනීම වැනි ගැටලු බහුලව සිදුවේ.
මෙවැනි ගැටලුවලට සරල නමුත් ඉතා ප්රයෝජනවත් විසඳුමක් වන්නේ දවස් 7 බෙහෙත් ස්මාර්ට් පිල් බොක්ස් එකය (Smart Pill Box). Weekly Pill Organizer, 7-Day Pill Box, Medicine Organizer, හෝ Tablet Box ලෙසද මෙය හඳුන්වයි. කුඩා පෙට්ටියක් වුවද, එය රෝගීන්ගේ දෛනික ජීවිතයට විශාල පහසුවක් ලබා දෙයි.
මෙය සතියේ දින හතටම වෙන් වෙන් කොටස් සහිත බෙහෙත් පෙට්ටියකි. සඳුදා සිට ඉරිදා දක්වා සතියේ දින සලකුණු කර ඇති අතර, එක් එක් දිනට අවශ්ය බෙහෙත් වෙන වෙනම දමා තබාගත හැකිය. සමහර මාදිලිවල උදේ, දවල්, රාත්රී ලෙසද කොටස් වෙන් කර ඇත. එම නිසා දවසකට වාර කිහිපයක් බෙහෙත් ගන්නා අයට ද මෙය ඉතා ප්රයෝජනවත් වේ. මෙවැනි බොක්ස් ප්ලාස්ටික්, උසස් තත්ත්වයේ ඇක්රලික්, හෝ ලොක් සිස්ටම් සහිත ලෙසද වෙළඳපොළේ ඇත. සමහර ස්මාර්ට් පිල් බොක්ස් මතක් කිරීමේ එලාම් (Alarm) සහිතව ද තිබේ. ඒවා තරමක් මිලෙන් අධිකය.
බෙහෙත් අමතක වීම වැළැක්වීමට හොඳම උපකරණයක්
බොහෝ දෙනාට දිනපතා බෙහෙත් ගැනීම අමතක වීම සාමාන්ය දෙයකි. විශේෂයෙන් රැකියා කරන අය, නිවෙසේ වැඩවල නිරත කාන්තාවන්, වයෝවෘද්ධ පුද්ගලයන්, හෝ එකවර බෙහෙත් කිහිපයක් ගන්නා අය සඳහා මෙය වැඩියෙන් සිදුවේ. දවස් 7 බෙහෙත් බොක්ස් එකක් භාවිත කළහොත් සතියේ බෙහෙත් පෙර සූදානම් කර තැබිය හැකි නිසා, අදාළ දවසේ බෙහෙත් කොටස පමණක් විවෘත කර ගැනීම ප්රමාණවත්ය. එවිට බෙහෙත් ගැනීම අමතක වීම බොහෝ දුරට අඩුවේ.
දෙවරක් බෙහෙත් ගැනීමෙන් බේරීමට උපකාරී වේ
බොහෝ අය “අද බෙහෙත් ගත්තාද?” යන්න ගැන සැකයෙන් පසුවෙති. ඒ නිසා නැවතත් බෙහෙත් ගන්නා අවස්ථා ද ඇත. සමහර බෙහෙත් වර්ග දෙවරක් ගැනීම සෞඛ්යයට අහිතකර විය හැකියි. දවස් 7 බොක්ස් එක භාවිත කළහොත් අදාළ දින කොටස හිස් නම්, එදින බෙහෙත් ගෙන ඇති බව තේරුම් ගත හැකිය. එම නිසා වැරදීමකින් දෙවරක් බෙහෙත් ගැනීම වළක්වා ගත හැකියි.
ගිලන් ඇඳේ සිටින රෝගීන්ට විශාල සහනයක්
ඇඳේම සිටින රෝගියකුට බෙහෙත් ලබාදීම පවුලේ අයට හෝ රෝගියා බලාගන්නා අයට විශාල වගකීමකි. දිනපතා වෙන වෙනම බෙහෙත් සොයා සකස් කිරීම කාලය ගතවන අතර, වැරදීමේ අවදානමද ඇත. මෙවැනි අවස්ථාවල සතියේ බෙහෙත් පෙර සකස් කර මෙම බොක්ස් එකට දමා තැබිය හැකිය. එවිට උදේ, දවල්, රාත්රී ලෙස දිය යුතු බෙහෙත් පැහැදිලිව තිබෙන නිසා රෝගියාට නියමිත වේලාවට බෙහෙත් ලබාදීම පහසු වේ. රෝගියා බලාගන්නා තැනැත්තාටද මානසික සහනයක් ලැබේ.
වැඩිහිටියන්ට සහ මතක ශක්තිය අඩු අයට ඉතා සුදුසුය
වයස්ගත වීමත් සමඟ මතක ශක්තිය අඩුවීම සාමාන්ය දෙයකි. එවැනි අවස්ථාවල බෙහෙත් ගත යුතු වේලාව අමතක වීම හෝ දින පැටලීම සිදුවිය හැක. දවස් 7 බොක්ස් එකක් භාවිත කිරීමෙන් අදාළ දවසට අදාළ කොටස පමණක් විවෘත කර බෙහෙත් ගැනීමෙන් වැඩිහිටියන්ට ස්වාධීනව තම බෙහෙත් කළමනාකරණය කරගත හැකිය.
ගමන් බිමන්වලදී පහසුව
නිවසින් පිටත ගමන් යන විට බෙහෙත් බෝතල්, බෙහෙත් පැකට් රැගෙන යාම අපහසු වේ. විශේෂයෙන් දින කිහිපයක ගමනකට යන විට මෙය තවත් අපහසුය. දවස් 7 බෙහෙත් බොක්ස් එකක් තිබේ නම් අවශ්ය බෙහෙත් සතියකටම එකම පෙට්ටියක දමා පහසුවෙන් රැගෙන යා හැකිය. එය ගමන් බෑගයක තැබීමටද ඉතා සුදුසුය.
මෙඩිසින් පිල් බොක්ස් වර්ග
දින 7 සාමාන්ය බොක්ස්
සතියේ දවස් 7ට වෙන් කළ සරලම බොක්ස් එකකි. දිනකට එකවර බෙහෙත් ගන්නා අයට සුදුසු වේ.
උදේ / දවල් / රාත්රී වෙන් කළ බොක්ස් එක් දවසකට කොටස් 3ක් හෝ 4ක් තිබේ. දවසට වාර කිහිපයක බෙහෙත් ගන්නා අයට සුදුසුයි.
දින 30 හෝ මාසික බොක්ස් මාසයකටම දවස් 30 හෝ 31ට වෙන් කර ඇති බොක්ස් එකකි. නිතර බෙහෙත් ගන්නා අයට සුදුසුයි.
Portable Mini Pill Box
කුඩා හෑන්ඩ් බෑග් එකක හෝ සාක්කුවක රැගෙන යා හැකියි. ගමන් බිමන් කරන අයට සුදුසුයි.
Alarm / Smart Pill Box බෙහෙත් ගන්නා වේලාවට එලාම් එකක් නාද වේ. වයෝවෘද්ධ අයට හෝ බෙහෙත් අමතක වන අයට වඩා ප්රයෝජනවත් වේ.
ලොක් කරන බොක්ස්
ළමයින් අතට පත්වීමට ඉඩ නොමැති සේ ලොක් සිස්ටම් එකක් ඇත.
Waterproof / Travel Organizer
ගමන් බිමන්, විදේශ ගමන්, කාර්යාලයට යන අයට සුදුසුයි. තෙතමනයෙන් බෙහෙත් ආරක්ෂා කරයි.
භාවිතයේදී සැලකිලිමත් විය යුතු කරුණු
බෙහෙත් බොක්ස් භාවිත කරන විට කරුණු කිහිපයක් පිළිබඳව සැලකිලිමත් විය යුතුය. බෙහෙත් නිවැරදි දිනට හා නිවැරදි ප්රමාණයට දමන්න. ළමයින්ට අත නොගැසෙන ස්ථානයක තබන්න. තෙතමනය හා අධික උෂ්ණත්වයෙන් ආරක්ෂා කරන්න. මාසිකව පිරිසුදු කරන්න. බෙහෙත් වට්ටෝරුව වෙනස් වුවහොත් වහාම බොක්ස් එකේ ඇති බෙහෙත්ද නැවත සකස් කරන්න. වෛද්ය උපදෙස් නොමැතිව බෙහෙත් ප්රමාණය වෙනස් නොකරන්න.
දවස් 7 බෙහෙත් බොක්ස් එක යනු සරල නමුත් ඉතා වටිනා නිෂ්පාදනයකි. බෙහෙත් නිසි වේලාවට ගැනීමට, අමතක වීම වැළැක්වීමට සහ වැඩිහිටියන්ට පහසුව සැලසීමට මෙය මහත් උපකාරයක් වේ. කුඩා පෙට්ටියක් වුවද, නිසි ලෙස භාවිත කළහොත් එය සෞඛ්යය ආරක්ෂා කරගැනීමට සහ ජීවිතය වඩාත් පිළිවෙළකට ගෙන යාමට උපකාරී වන වටිනා උපකරණයකි.
TEXT – විදුමිණි දිසාකරුණා
