කැඩපත ඉදිරියේ සිටගෙන “තව ටිකක් බර අඩු වුණා නම්…” යැයි සිතූ අත්දැකීම බොහෝ කාන්තාවන්ට තිබේ. නමුත් බර අඩු කර ගැනීම සෑම කෙනකුටම එක හා සමානව කළ හැකි දෙයක් නොවේ. ආහාර පාලනය, ව්යායාම සහ විවිධ උත්සාහයන් අතරතුර අපේක්ෂිත ප්රතිඵල නොලැබෙන විට, නවීන වෛද්ය විද්යාවෙන් ඉදිරිපත් කරන බර අඩු කර ගැනීමේ එන්නත් බොහෝ දෙනකුගේ අවධානය දිනාගෙන තිබේ.
එන්නතකින් බර අඩු කළ හැකිද?
අද බොහෝ කාන්තාවන්ගේ කුතුහලය දිනාගෙන ඇති ප්රශ්නය එයයි. ලෝකයේ වඩාත් ජනප්රිය සෞඛ්ය මාතෘකා අතරට එක්ව ඇති බර අඩු කර ගැනීමේ එන්නත්, තරබාරුකමට එරෙහි සටනේ නවතම ආයුධය ලෙස සැලකේ. එහෙත් මේවා සැබවින්ම ක්රියා කරන්නේ කෙසේද? ඒවා ආරක්ෂිතද? සෑම කෙනකුටම සුදුසුද? යන්න පිළිබඳව දැනුවත් වීම අත්යවශ්යය.
බර අඩු කර ගැනීමේ එන්නත් යනු මොනවාද?
බර අඩු කර ගැනීමේ එන්නත් යනු වෛද්ය අධීක්ෂණය යටතේ භාවිත කරන ඖෂධමය ප්රතිකාර ක්රමයකි. සාමාන්යයෙන් සතියකට වරක් සමට යටින් ලබා දෙන මෙම එන්නත් ශරීරයේ කුසගින්න සහ ආහාර රුචිය පාලනය කරන හෝමෝනවලට බලපෑම් කරයි.
මෙය රූපලාවණ්ය අරමුණ සඳහාම භාවිත කරන කෙටිමඟක් නොව, තරබාරුකම හෝ බර වැඩිවීම නිසා සෞඛ්ය ගැටලු ඇති පුද්ගලයන් සඳහා නිර්දේශ කරන වෛද්ය ප්රතිකාරයකි. වයස අවුරුදු 18 වැඩි අය සඳහා මෙය නිර්දේශ කරයි.
තරබාරුකමට හේතුව කෑම වැඩියෙන් ගැනීම පමණක්ද?
අතීතයේ බර වැඩිවීම හුදෙක් අධික ආහාර ගැනීමේ ප්රතිඵලයක් ලෙස සැලකුණද, නවීන වෛද්ය විද්යාව එය වඩාත් සංකීර්ණ තත්ත්වයක් ලෙස හඳුනාගෙන ඇත.
තරබාරුකමට බලපාන සාධක අතර, කුසගින්න පාලනය කරන හෝමෝනවල අසමතුලිතතාව, පරිවෘත්තීය ක්රියාවලිය මන්දගාමී වීම, ජානමය බලපෑම්, ඉන්සියුලින් ප්රතිරෝධය, හෝමෝන ගැටලු සහ PCOS වැනි තත්ත්ව ඇතුළත් වේ.
මෙම එන්නත් ක්රියා කරන්නේ කෙසේද?
මෙම එන්නත ශරීරයේ ඕනෑම තැනකට එන්නත් කළ හැකියි. එන්නත් කිරීමෙන් පසු මෙම ඖෂධ මොළය හා ආහාර ජීර්ණ පද්ධතිය අතර සිදුවන හෝමෝනමය සන්නිවේදනයට බලපෑම් කරයි.
එමඟින්, ආහාර රුචිය අඩු කරයි, නිතර කෑමට ඇති ආශාව පාලනය කරයි. ඉක්මනින් බඩ පිරුණු බවක් දැනීමට සලස්වයි. ආමාශය හිස් වීම මන්දගාමී කරයි. රුධිරයේ සීනි මට්ටම පාලනය කිරීමට උපකාරී වේ. මේ හේතුවෙන් පුද්ගලයා ස්වාභාවිකව අඩුවෙන් ආහාර ගන්නා අතර බර අඩු වීම සිදුවේ.
ජනප්රියම බර අඩු කිරීමේ එන්නත්
වර්තමානයේ බහුලව භාවිත වන බර අඩු කිරීමේ එන්නත් අතර Semaglutide සහ Tirzepatide ප්රධාන වේ.
Semaglutide අඩංගු Ozempic සහ Wegovy යන වෙෙළඳ නාම ලොව පුරා ජනප්රිය වී ඇති අතර, බොහෝ පර්යේෂණවලට අනුව වර්තමාන බරෙන් සියයට 10 සිට 15 දක්වා බර අඩුවීමක් ලබා ගැනීමට හැකි වී ඇත.
නව පරම්පරාවේ ප්රතිකාරයක් ලෙස සැලකෙන Tirzepatide අඩංගු Mounjaro සහ Zepbound ඖෂධ භාවිත කළ පුද්ගලයන් අතර සියයට 15 සිට 22 දක්වා බර අඩුවීමක් වාර්තා වී ඇත.
එසේම තවමත් අධ්යයන මට්ටමේ පවතින Retatrutide නම් ඖෂධය මඟින් මීටත් වඩා ඉහළ ප්රතිඵල ලබා ගත හැකි බවට පර්යේෂණවලින් අනාවරණය වී තිබේ.
මෙම ප්රතිකාරයෙන් ප්රතිලාභ ලැබිය හැක්කේ කාටද?
සියලු දෙනාටම මෙම එන්නත් අවශ්ය නොවේ. සාමාන්යයෙන් BMI අගය 30ට වඩා වැඩි පුද්ගලයන්ට හෝ BMI අගය 27ට වැඩිවීම සමඟ දියවැඩියාව, අධි රුධිර පීඩනය, PCOS හෝ අධික කොලෙස්ටරෝල් වැනි තත්ත්ව ඇති අයට වෛද්යවරුන් මෙම ප්රතිකාරය නිර්දේශ කළ හැකිය.
අතුරු ආබාධ
ඕනෑම ඖෂධයක් මෙන්ම මෙම ප්රතිකාරවලට ද අතුරු ආබාධ තිබිය හැකිය. බහුලවම වාර්තා වන්නේ ඔක්කාරය, වමනය, මලබද්ධය, බඩ පිරුණු බවක් දැනීම සහ ආහාර රුචිය අඩුවීම වැනි තත්ත්වයන්ය. බොහෝ අවස්ථාවලදී මෙම රෝග ලක්ෂණ තාවකාලික වන අතර කාලයත් සමඟ අඩුවේ.
මෙම එන්නත් භාවිත නොකළ යුත්තන්
ගර්භිණී කාන්තාවන්, ගැබ් ගැනීමට සැලසුම් කරන කාන්තාවන්, කිරි දෙන මවුවරුන්, අග්න්යාශය ආශ්රිත රෝග ඉතිහාසයක් ඇති පුද්ගලයන් සහ ඇතැම් තයිරොයිඩ් පිළිකා ඉතිහාසයක් ඇති පුද්ගලයන් මෙම ප්රතිකාර ලබා ගැනීමට පෙර වෛද්ය උපදෙස් ලබා ගැනීම අත්යවශ්ය වේ.
ප්රතිකාරයේ අදියර බොහෝ රෝගීන් ප්රධාන අදියර තුනක් හරහා ගමන් කරයි.
1. ආරම්භක අදියර (පළමු මාස 3–6) – ප්රතිකාරය ක්රමයෙන් වැඩි වන අඩු මාත්රාවකින් ආරම්භ වේ. මෙම කාලය තුළ, ශරීරය අනුවර්තනය වන අතර මුල් බර අඩු වීම ආරම්භ වේ.
2. ක්රියාකාරී බර අඩු කර ගැනීමේ අදියර (මාස 6–12) – වඩාත්ම කැපී පෙනෙන බර අඩු වීම සිදුවන්නේ මෙහිදීය. මෙම කාලය තුළ රෝගීන් බොහෝ විට ස්ථාවර හා සැලකිය යුතු බර අඩුවීමක් අත්විඳිති.
3. නඩත්තු අදියර (දිගු කාලීන) අපේක්ෂිත බර ලබා ගත් පසු, ප්රතිඵල පවත්වා ගැනීමට සහ බර නැවත ලබා ගැනීම වැළැක්වීම සඳහා ඖෂධ දිගටම ලබා දිය හැකිය.
ලැබෙන ප්රතිඵලය මත අවුරුදු 1 සිට 3 දක්වා හෝ ඊට වැඩි කාලයක් මෙය ලබා දීමට සිදු වේ. ඇතැම් විට ඊට වඩා වැඩි කාලයක් වුව ද ගත විය හැකියි.
මෙය නතර කළහොත්
එන්නත් ඉතා ඉක්මනින් නතර කළහොත් ආහාර රුචිය නැවත වැඩි වී, බර නැවත වැඩි වේ. එබැවින් වෛද්ය අධීක්ෂණය යටතේ නැවැත්වීම කළ යුතුය. එහිදී ඉලක්කගත බර ලබාගෙන පවත්වා ගෙන යාම, ජීවන රටා පුරුදු හොඳින් ස්ථාපිත කර තිබීම සහ රෝගියාට ඖෂධ නොමැතිව ප්රතිඵල පවත්වා ගත හැකිවීම යන කරුණු සලකා බැලේ.
එන්නත් පමණක් ප්රමාණවත්ද?
බොහෝ දෙනා සිතන්නේ මෙම එන්නත් ලබා ගත් පසු ආහාර පාලනයක් හෝ ව්යායාමයක් අවශ්ය නොවන බවයි. නමුත් එය වැරදි මතයකි.
මෙම ප්රතිකාරය වඩාත් සාර්ථක වන්නේ සමබර ආහාර රටාවක්, නිතිපතා ශාරීරික ක්රියාකාරකම් සහ සෞඛ්ය සම්පන්න ජීවන රටාවක් සමඟ ඒකාබද්ධ කළ විටය.
අවධානය යොමු කළ යුතු අවස්ථා
මාත්රාව ක්රමයෙන් වැඩි දියුණු වීමත් සමඟ ආහාර ජීර්ණ රෝග ඇති වේ. මෙය වඩාත් සුලභම අතුරු ආබාධය වේ. වේගවත් බර අඩු වීම නිසා පිත්තාශයේ ගල් ඇතිවිය හැකියි. කලාතුරකින් කෙනකුට අග්න්යාශ ප්රදාහය ඇතිවිය හැකියි. එබැවින් දරුණු උදර වේදනාවක් ඇති වේ නම් වහාම වෛද්යවරයාට දැන්විය යුතුයි. ඔබ මේ එන්නත ගන්න සූදානම් වන කාලවකවානුවේදි තයිරොයිඩ් රෝගයෙන් සහ දියවැඩියාවෙන් පෙළෙන්නේ නම් ඒ බව ද වෛද්යවරයාට දන්වන්න.
නවීනතම එන්නත් කාණ්ඩය වන Retatrutide සඳහා ද සුළු අතුරු ආබාධ පවතියි.
මැජික් විසඳුමක් නොව වෛද්ය ප්රතිකාරයක්
සමාජ මාධ්ය තුළ බොහෝ විට බර අඩු කර ගැනීමේ එන්නත් පිළිබඳ අතිශයෝක්තියෙන් යුත් ප්රචාර දැකිය හැකි වුවද, ඒවා මැජික් විසඳුම් නොවේ. තරබාරුකම යනු ප්රතිකාර කළ හැකි නිදන්ගත සෞඛ්ය තත්ත්වයක් වන අතර, මෙම එන්නත් එය කළමනාකරණය කිරීම සඳහා භාවිත කරන නවීන වෛද්ය ක්රමයක් පමණි.
නිවැරදි රෝගීන් සඳහා, නිවැරදිව නිසි වෛද්ය අධීක්ෂණය යටතේ භාවිත කළ විට, මෙම ප්රතිකාර මඟින් බර අඩු කර ගැනීමට පමණක් නොව, දියවැඩියාව, අධි රුධිර පීඩනය සහ වෙනත් පරිවෘත්තීය ගැටලු පාලනය කිරීමට ද උපකාරී විය හැකිය.
TEXT – විදුමිණි දිසාකරුණා
